(ភ្នំពេញ)៖ ក្រុមហ៊ុន មាតុភូមិយើងអចលនទ្រព្យ ដែលកំពុងរកស៊ីពុះដីឡូតិ៍លក់ នៅភូមិអង្គស្រែពោធិ៍ ឃុំទួលព្រេជ ស្រុកអង្គស្នួល ខេត្តកណ្តាល បានរងនូវការចោទប្រកាន់ថា បានទិញដីពីម្ចាស់ដើមបង់តែលុយកក់ គ្មានលុយបង់បង្គ្រប់ ទុករហូតទាល់តែហូសកិច្ចសន្យា ហើយបែរជាយកដីនោះទៅពុះឡូតិ៍ លក់បន្តឲ្យអតិថិជនដោយខុសច្បាប់ គ្មានការដឹងឮពីអាជ្ញាធរភូមិ-ឃុំ និងពីម្ចាស់ដីអ្វីឡើយ បើទោះបីម្ចាស់ដីបានប្ដឹងសុំមោឃភាពកិច្ចសន្យាទិញ លក់រួចហើយក៏ដោយ។
លោកស្រី អ៊ឹង សៀកទៀង និង ឈ្មោះ សិក មិត្តផេង ដែលជាម្ចាស់ដីទំហ៊ំ៥៤,៤០០ម៉ែត្រការ៉េ មានទីតាំង នៅក្នុងភូមិ អង្គស្រែពោធិ៍ ឃុំទួលព្រេជ ស្រុកអង្គស្នួល ខេត្តកណ្តាល បានថ្លែងប្រាប់ក្រុមអ្នកសារព័ត៌មានថា កាលពីថ្ងៃទី១០ ខែកុម្ភៈ ឆ្នាំ២០១៧ ឈ្មោះ ធិប ចន្ទ្រា ភេទប្រុស អាយុ ២៩ឆ្នាំ មុខរបរ ប្រធានក្រុមហ៊ុន មាតុភូមិយើងអចលនទ្រព្យ មានទីលំនៅផ្ទះលេខ៧៨ ផ្លូវលេខ១០៨៩ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានមកទិញដីពីពួកគាត់ ក្នុងតម្លៃ ៥,៥០ដុល្លារ ដោយភាគីអ្នកទិញ បានព្រមប្រគល់ប្រាក់កក់ចំនួន ១៥,០០០ដុល្លារ។ នៅក្នុងកិច្ចសន្យាទិញលក់នោះ ភាគីអ្នកទិញឈ្មោះ ធិប ចន្ទ្រា បានសន្យាថា និងប្រគល់លុយថ្លៃដីឱ្យគ្រប់ចំនួន នៅថ្ងៃទី១០ ខែមិថុនា ឆ្នាំ២០១៧។ ប៉ុន្តែពេលដល់ថ្ងៃកំណត់ប្រគល់លុយបង្គ្រប់ បែរជាឈ្មោះ ធិប ចន្ទ្រា គ្មានប្រាក់ប្រគល់ឱ្យភាគី អ្នកលក់នោះទៅវិញ ដោយបានសុំពន្យារពេលម្តងហើយម្តងទៀត។
បើទោះជាគ្មានលុយប្រគល់ឱ្យម្ចាស់ដីតាមកិច្ចសន្យាក៏ដោយ ក៍ឈ្មោះ ធិប ចន្ទ្រា បានយកគ្រឿងចក្រទៅឈូសឆាយដីនោះរៀបចំពុះជាឡូតិ៍លក់ជាបន្តបន្ទាប់ឲ្យ អតិថិជនរហូតដល់អស់៧០% ដោយមិនគោរពតាមកិច្ចសន្យានោះទេ។ ដោយសារតែឈ្មោះ ធិប ចន្ទ្រា បានយកដីដែលខ្លួនទិញបង់លុយកិនគ្រប់ទៅលក់បន្តបែបនេះ ទើបភាគីម្ចាស់ដីឈ្មោះ អ៊ឹង សៀកទៀង និង សិក មិត្តផេង បានប្តឹងទៅអាជ្ញាធរមូលដ្ឋានឱ្យមោឃភាពកិច្ចសន្យាទិញ លក់នោះចោលវិញ ដោយមានការយល់ព្រមពីគូភាគីទាំងសងខាងទៀតផង។
ប៉ុន្តែឈ្មោះធិប ចន្ទ្រា មិនបានបញ្ឈប់សកម្មភាពនោះទេ ពោលគឺនៅតែបន្តយកដីរបស់ឈ្មោះ អ៊ឹង សៀកទៀង ទៅពុះឡូតិ៍លក់ ដោយខុសច្បាប់ដដែល។ ជាងនេះទៅទៀតនៅថ្ងៃទី២៩ ខែមិថុនា ឆ្នាំ២០១៧ លោក ផូង វណ្ណ ចៅក្រមនៃសាលាដំបូងខេត្តកណ្តាល បានចេញដីការក្សាការពារអនុវត្តភ្លាមៗផ្ដល់ប្រយោជន៏ឱ្យឈ្មោះ ធិប ចន្ទ្រា ដើម្បីកុំឱ្យម្ចាស់ដីឈ្មោះ អ៊ឹង សៀកទៀង និង ឈ្មោះ សិក មិត្តផេង មានសិទ្ធិចាត់ចែងអ្វីទាំងអស់នៅលើដីរបស់ពួកគេ តែអាចទុកឱ្យឈ្មោះ ធិប ចន្ទ្រា បន្តពុះឡូតិ៍លក់ជាធម្មតាទាំងមិនឱ្យលុយម្ចាស់ ដីគ្រប់ចំនួនផង។ ក្រោយមកនៅថ្ងៃទី២៨ ខែកក្កដា ឆ្នាំ២០១៧ លោក ផូង វណ្ណ ចៅក្រមនៃសាលាដំបូងខេត្តកណ្ដាលដដែល បានសម្រេច លុបដីការក្សាការពារចុះថ្ងៃទី២៩ ខែមិថុនា ឆ្នាំ២០១៧នោះចោលវិញ។
ទាក់ទងករណីនេះ លោក ជឹម ជួន មេឃុំស្តីទី និងលោក មឿន រុណ ជាក្រុមប្រឹក្សាឃុំទួលព្រេជ បានថ្លែងអះអាងថា ពួកគាត់ពិតជាបានដឹងរឿង ឈ្មោះ អ៊ឹង សៀកទៀង និងឈ្មោះ សិក មិត្តផេង លក់ដីខាងលើ ឱ្យទៅឈ្មោះ ធិប ចន្ទ្រា មែនដោយមានអាជ្ញាធរខាងលោក ជាអ្នកបោះត្រាដឹងឮ។ ក្រោយមកដោយសារភាគីអ្នកទិញឈ្មោះ ធិប ចន្ទ្រា គ្មានលុយឱ្យភាគីអ្នកលក់តាម កាលកំណត់ ទើបភាគីអ្នកលក់បានហៅភាគីអ្នកទិញមកធ្វើមោឃភាព លើកិច្ចសន្យាទិញ លក់នោះវិញ នៅចំពោះមុខ អាជ្ញាធរលោកដែរ។ ពួកគាត់បន្តថា ករណីដែលឈ្មោះ ធិប ចន្ទ្រា នៅតែបន្តយកគ្រឿងចក្រទៅឈូសឆាយ និងបោះបង្គោល ពុះឡូតិ៍លើដីរបស់ឈ្មោះ អ៊ឹង សៀកទៀង និងឈ្មោះសិក មិត្តផេង លក់នោះ គឺគ្មានសុំការអនុញ្ញាតពីអាជ្ញាធរឃុំទេ ហើយ ការលក់ដូរដីឡូតិ៍នោះទៀតសោធក៏អាជ្ញាធរឃុំមិនបានដឹងឮដែរ ព្រោះឃុំមិនដែលបានទទួលស្គាល់លើលិខិតទិញ លក់រវាង ឈ្មោះ ធិប ចន្ទ្រា ជាមួយអ្នកទិញដីឡូតិ៍នោះទេ។ទោះជាយ៉ាងណា តំណាងក្រុមហ៊ុនមាតុភូមិយើងអចលនទ្រព្យ លោក សាទ សេងហុង បានអះអាងប្រាប់អ្នកកាសែតថា ចំពោះដំណើរការលក់ដីឡូតិ៍នេះ គឺក្រុមហ៊ុនបានធ្វើកិច្ចសន្យាទិញ លក់ បង់រំលួសតែជាមួយអតិថិជនប៉ុណ្ណោះ ដោយគ្មានឱ្យអាជ្ញាធរណាដឹងឮទេ ចាំទាល់តែអតិថិជនបង់លុយគ្រប់ចំនួន បានរត់ការ ធ្វើប្លង់ទន់ដែលទទួលស្គាល់ដោយអាជ្ញាធរឃុំ និងស្រុកជូនអតិថិជនតែម្ដង។
ប្រជាពលរដ្ឋរដ្ឋម្ចាសដីបានចោទជាសំនួរថា តើឈ្មោះ ធិប ចន្ទ្រា ឬក្រុមហ៊ុនមាតុភូមិយើងអចលនទ្រព្យ ពិតជាបានទទួល អាជ្ញាប័ណ្ណពីសាលាស្រុកអង្គស្នួល ក្នុងខណៈដែលបុគ្គលនេះ មិនទាន់បានប្រគល់លុយគ្រប់ចំនួនដល់ម្ចាស់ដីឈ្មោះ អ៊ឹងសៀកទៀង និងឈ្មោះសិក មិត្តផេង ប្រាកដមែនទេ? បើសិនជាដូច្នេះមែននោះ អាជ្ញាធរស្រុកអង្គស្នួល កំពុងតែបង្កឲ្យមានបញ្ហាវិវាទដីធ្លី បន្ថែមលើបញ្ហាវិវាទដីធ្លី ដែលរាជរដ្ឋាភិបាល បាននឹងកំពុងព្យាយាមដោះស្រាយយ៉ាងយកចិត្តទុកដាក់នេះបន្ថែមទៀតហើយ។
តើហេតុអ្វីបានជាតុលាការមិនចាត់វិធានការបន្ទាន់ដើម្បីទប់ស្កាត់កុំឲ្យបញ្ហាវិវាទដីធ្លីនេះរីករាលដាលកាន់តែធំឡើងៗនោះ៕
