(ភ្នំពេញ)៖ លោក យឿន យ៉ុង ជំទប់ទី២ របស់គណបក្សសិទ្ធិមនុស្ស ដែលអះអាងថា ខ្លួនជាបេក្ខជនក្រុមប្រឹក្សាឃុំ-សង្កាត់របស់ គណបក្សសង្រ្គោះជាតិ នៅឃុំកោះអន្លង់ចិន នៅស្រុកស្អាង ខេត្តកណ្តាល បានប្រកាសចាកចេញពីគណបក្សសង្រ្គោះជាតិ ជាមួយនឹងការចោទថ្នាក់ដឹកនាំមូលដ្ឋាននៅក្នុងគណបក្សនេះថា បានឃុបឃិតគ្នាពុករលួយ ប្រកាន់បក្ខពួកនិយម។
លោក យឿន យ៉ុង បានថ្លែងប្រាប់នៅក្នុងកិច្ចសម្ភាសន៍ឱ្យដឹងថា មូលហេតុដែល លោកសម្រេចចិត្តចាកចេញពីគណបក្សសង្រ្គោះជាតិពេលនេះ ដោយសារតែលោកអស់ ជំនឿចិត្តនឹងបក្សនេះ បន្ទាប់ពីថ្នាក់ដឹកនាំមូលដ្ឋាន ឃុបឃិតគ្នាប្តូរលេខរៀងរបស់លោកពីជំទប់ទី២ មកនៅលេខរៀងទី៧។ លោកចាត់ទុកថា ការធ្វើបែបនេះគឺជារឿង ពុករលួយ និងបក្ខពួកនិយម ហើយមិនគោរពចំពោះអ្នកប្រតិបត្តិផ្ទាល់នៅមូលដ្ឋាន។ លោក យឿន យ៉ុង បានចូលរួមបម្រើគណបក្សសិទ្ធិមនុស្សនៅឆ្នាំ២០១១ ហើយបានក្លាយជាជំទប់ទី២ របស់គណបក្សសិទ្ធិមនុស្ស នៅឃុំអន្លង់ចិន នៅឆ្នាំ២០១២។ លោកអះអាងថា លោកជាមនុស្សមានប្រជាប្រិយ និងមានការទទួលស្គាល់ និងស្រលាញ់ចូលចិត្តពីប្រជាពលរដ្ឋនៅមូលដ្ឋានរបស់លោក។
ទន្ទឹមគ្នានឹងការចាកចេញពីគណបក្សសង្រ្គោះជាតិនេះ លោក យឿន យ៉ុង បានរិះគន់ទៅលើគោលនយោបាយសន្យាខ្យល់របស់គណបក្សសង្រ្គោះជាតិ ក៏ដូចជាការញុះញង់ ទៅលើបញ្ហាជាតិធំៗជាច្រើនដូចជាការជំរុញឱ្យមានការរើសអើងជាតិសាសន៍ជាដើម។ លោកជឿជាក់ថា បើគណបក្សសង្រ្គោះជាតិ នៅតែបំបះបំបោអំពីបញ្ហា ជាតិសាសន៍ទៀតនោះ កម្ពុជានឹងមានទំនាស់ថ្ងៃណាមួយមិនខាន។
បន្ទាប់ពីចាកចេញនេះលោក យឿន យ៉ុង បានអះអាងថា លោកមានបំណងចូលរួមនយោបាយជាមួយគណបក្សប្រជាជនកម្ពុជា។ លោកបានហៅប្រមុខគណបក្ស ប្រជាជនកម្ពុជា សម្តេចតេជោ ហ៊ុន សែន ថាជា «មេចាស់» របស់លោក។ ស្តាប់កិច្ចសម្ភាសន៍ជាមួយលោក យឿន យ៉ុង កាលពីថ្ងៃទី១២ ខែមេសា ឆ្នាំ២០១៧កន្លងទៅ៖
