(កំពង់ឆ្នាំង)៖ បេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយក្រសួង​សាធារណការ និងដឹកជញ្ជូន ព្រឹកថ្ងៃទី២៦ ខែមីនា ឆ្នាំ២០១៧នេះ បានចុះផ្សព្វផ្សាយច្បាប់ស្តីពីចរាចរណ៍ផ្លូវគោក និងច្បាប់ស្ដីពីការត្រួតពិនិត្យគ្រឿងញៀន ជូនដល់កម្មករ និងអ្នកបើកបរដឹកកម្មករ នៅភូមិតាំងត្បែងខ្ពស់ ឃុំតាំងក្រសាំង​ ស្រុកទឹកផុស​ ខេត្តកំពង់ឆ្នាំង។

លោក ជាវ ប៊ុនរិទ្ធ អ្នកនាំពាក្យ ប.ស.ស បានបង្ហាញថា ក្នុងត្រីមាសទី១ ឆ្នាំ២០១៧នេះ ក្រុមការងារបានចុះផ្សព្វផ្សាយ​ដល់កម្មករ និងអ្នកបើកឡានដឹកកម្មករ បានចំនួន១៣៦លើក ស្មើនឹង១៣៦រោងចក្រ មានអ្នកចូលរួមចំនួន១៧,៨៤៤នាក់ និងអ្នកបើកបរចំនួន៦,២៧៧នាក់។

ក្រុមការងារផ្សព្វផ្សាយនេះ មានសមាសភាពមកពី ប.ស.ស នៃក្រសួងការងារ នាយកដ្ឋានដឹកជញ្ជូនផ្លូវគោក នៃក្រសួង​សាធារណការ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃក្រសួងមហាផ្ទៃ និងមន្ត្រីជំនាញ​នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន។

លោកស្រី មឹន មាណវី រដ្ឋលេខាធិការក្រសួងសាធារណការ និងជាអគ្គលេធិការ នៃគណៈកម្មាធិការជាតិ​សុវត្ថិភាពចរាចរណ៍ផ្លូវគោក បានធ្វើការពន្យល់ និងណែនាំអប់រំពីសុវត្ថិភាពលើការធ្វើដំណើរ របស់កម្មករទាំងអស់ ត្រូវគោរពច្បាប់​ចរាចរណ៍ ជាពិសេសគោរពទៅលើសីលធម៌១០ចំណុច សម្រាប់សុវត្ថិភាពចរាចរណ៍ ដែលមានខ្លឹមសារដូចខាងក្រោម៖
-មិនត្រូវបើកបរលើសល្បឿនកំណត់ដាក់ខាត
-មិនត្រូវបើកបរស្ថិតនៅក្រោមឥទ្ធិពល នៃគ្រឿងស្រវឹងដាច់ខាត
-មិនត្រូវបើកបរស្ថិតនៅក្រោមឥទ្ធិពល នៃគ្រឿងញៀនដាច់ខាត
-មិនត្រូវបើកបរស្ថិតនៅក្រោមស្ថានភាពងងុយដេកដាច់ខាត
-ត្រូវចេះបើកបរឱ្យបានត្រឹមត្រូវដាច់ខាត
-ត្រូវពាក់មួកសុវត្ថិភាពជានិច្ច
-ត្រូវពាក់ខ្សែក្រវ៉ាត់សុវត្ថិភាពជានិច្ច
-ត្រូវប្រកាន់ស្តាំជានិច្ច
-ត្រូវត្រួតពិនិត្យបច្ចេកទេសយានយន្តជានិច្ច
-ត្រូវប្រុងប្រយ័ត្នជានិច្ច។

នៅក្នុងពិធីផ្សព្វផ្សាយខាងលើ លោកស្រី មឹន មាណវី ក៏បានចែកមួកសុវត្ថិភាពជូនដល់កម្មករ-កម្មការិនី អ្នកបើកបរដឹកកម្មករ និងចូលរួម៥០០នាក់ ក្នុងម្នាក់ៗទទួលបាន មួកសុវត្ថិភាពចំនួន១៕