(ស្ទឹងត្រែង)៖ អាជ្ញាធរខេត្តស្ទឹងត្រែង បានថ្លែងអំណរគុណដល់ក្រុមហ៊ុនខ្មែរប៊ែវើរីជីស ផលិតស្រាបៀរកម្ពុជា ដែលបានបញ្ជូនរថយន្តសម្អាតផ្លូវ ធុនធ្ងន់ចំនួនពីរគ្រឿង មកជួយសម្អាតផ្លូវក្នុងខេត្តរយៈពេលពីរសប្តាហ៍ ខណៈដែលខេត្តកំពុងរៀបចំពិធីបុណ្យជាតិ ដ៏ធំគឺបុណ្យទន្លេ ចាប់ពីថ្ងៃទី២៤ ដល់ថ្ងៃទី២៦ ឆ្នាំ២០១៧។
លោក ដួង ពៅ អភិបាលរង នៃគណៈអភិបាលខេត្តស្ទឹងត្រែង បានថ្លែងថា «រដ្ឋបាលខេត្តកំពុងរៀបចំសម្អាតបរិស្ថាន ក្នុងខេត្តស្ទឹងត្រែង ដើម្បីទទួលស្វាគមន៍ភ្ញៀវទេសចរណ៍ដ៏ច្រើនកុះករមកកម្សាន្តបុណ្យទន្លេ ប៉ុន្តែខេត្តខ្វះខាតកម្លាំងសម្អាតផ្លូវ ដូច្នេះខេត្តបានស្នើរសុំឲ្យស្ថាប័នរដ្ឋ និងឯកជននានា ចូលរួមជួយខេត្ត»។
លោកអភិបាលរងបានបន្តថា «ការបញ្ជូនរថយន្តសម្អាតផ្លូវ ដ៏ទំនើបទាំងពីរគ្រឿងមកខេត្តស្ទឹងត្រែងនេះ គឺជាការឆ្លើយតបដោយទាន់ពេលវេលាបំផុត ដូច្នេះខេត្តស្ទឹងត្រែងពិតជាសូមថ្លែងអំណរគុណដល់ក្រុមហ៊ុន ចំពោះការចួលរួមចំណែកមួយនេះ»។
ដោយឡែក លោកឧកញ៉ា លាង ឃុន ប្រធានក្រុមអគ្គនាយកក្រុមហ៊ុន ខ្មែរប៊ែវើរីជីស ក៏បានថ្លែងថា «ក្រុមហ៊ុនពិតជាមានកិត្តិយស ដែលបានចូលរួមចំណែកជាមួយអាជ្ញាធរ ខេត្តស្ទឹងត្រែង ក្នុងការជួយសម្អាតផ្លូវនានា ឲ្យបានស្អាតល្អ មុនពេលបុណ្យទន្លេត្រូវបានរៀបចំឡើង។ រថយន្តទាំងពីរនេះ នឹងបន្តនៅខេត្តស្ទឹងត្រែងរហូតដល់ថ្ងៃទី១ ខែមេសា ដើម្បីជួយសម្អាតផ្លូវក្នុងក្រុង ក្រោយពិធីបុណ្យទន្លេបញ្ចប់»។
សូមបញ្ជាក់ថា ក្រៅពីជួយសម្អាតផ្លូវក្នុងក្រុងស្ទឹងត្រែង ក្រុមហ៊ុនខ្មែរ ប៊ែវើរីជីស ក៏ជាអ្នកឧបត្ថម្ភធំ ក្នុងការរៀបចំពិធីបុណ្យទន្លេនេះ ផងដែរ៕
