(ពោធិ៍សាត់)៖ កម្លាំងនគរបាលស្រុកក្រគរ ឃាត់ខ្លួនបុគ្គលិកអង្គការ សហការការពារសម្បត្តិធនធានធម្មជាតិ៧នាក់ តាមពាក្យបណ្តឹងរបស់ប្រជាពលរដ្ឋ ២នាក់ ដែលបានប្តឹងជនសង្ស័យទាំង៧នាក់នោះ ពីបទចាប់ជំរិតទារប្រាក់ពីពួកគាត់ រឿងលក់អុសម៉ែត្រ។ ប្រតិបត្តិការខាងលើនេះធ្វើឡើងថ្ងៃទី១៨ ខែកុម្ភៈ ឆ្នាំ២០១៧នេះ នៅចំណុចភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់។

លោក ឯម រុន អធិការនគរបាលស្រុកក្រគរ បានប្រាប់ភ្នាក់ងារ Fresh News ឲ្យដឹងមុននេះថា ពលរដ្ឋរងគ្រោះទាំង២នាក់ មានឈ្មោះ ១៖ អ៊ុំ រុន ភេទប្រុស អាយុ៥៧ឆ្នាំ ជាតិខ្មែរ ២៖ បីត បឿ ភេទប្រុស អាយុ៤៨ឆ្នាំ ទាំង០២នាក់ មានលំនៅភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ប្រកបមុខរបរកាត់អុសម៉ែត្រ។

លោកអធិការបន្តថា ក្រោយពេលទទួលបានបណ្តឹងពីជនរងគ្រោះ ២នាក់ បានប្តឹងជនសង្ស័យ៧នាក់ ពីបទជំរិតទារប្រាក់ ភ្លាមនោះកម្លាំងជំនាញរបស់អធិការដ្ឋាននគរបាលស្រុកក្រគរ សហការជាមួយកម្លាំងមូលដ្ឋានអាវុធហត្ថស្រុក បានឈានទៅដល់ការឃាត់ខ្លួនជនសង្ស័យទាំង ៧នាក់ ដែលមានឈ្មោះដូចខាក្រោម៖ ១-កែវ សារុន ភេទប្រុស អាយុ៧៨ឆ្នាំ ជាតិខ្មែរ រស់នៅភូមិកណ្តាល ឃុំក្បាលត្រាច ស្រុកក្រគរ ខេត្តពោធិ៍សាត់ ២-សុខ វឿន ភេទប្រុស អាយុ៣៧ឆ្នាំ ជាតិខ្មែរ រស់នៅភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់ ៣-ជា សាក់ ភេទប្រុស អាយុ៣៦ឆ្នាំ ជាតិខ្មែរ រស់នៅភូមិចក ឃុំចក ស្រុកបរិបូណ៌ ខេត្តកំពង់ឆ្នាំង ៤-សាក់ ថូ ភេទប្រុស អាយុ៣៧ឆ្នាំ ជាតិខ្មែរ រស់នៅភូមិត្រពាំចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ៥-ឡាយ សារឿន ភេទបុ្រស អាយុ៤៩ឆ្នាំ ជាតិខ្មែរ រស់នៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ៦-សុខ សុខុម ភេទប្រុស អាយុ៥៦ឆ្នាំ ជាតិខ្មែរ រស់នៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង និង៧-សំ សារ៉ាត់ ភេទប្រុស អាយុ៤៨ឆ្នាំ ជាតិខ្មែរ រស់នៅភូមិថ្កោលតូច ឃុំអន្សាចំបក់ ស្រុកក្រគរ ខេត្តពោធិ៍សាត់។

បច្ចុប្បន្នជនសង្ស័យទាំង៧នាក់ខាងលើ ត្រូវបានឃាត់ខ្លួននៅអធិការដ្ឋាននគរបាលស្រុកក្រគរ ដើម្បីសាកសួរ និងបង្ករសំណុំរឿង បំពេញទៅតាមនីតីវិធី បញ្ជូនឲ្យជំនាញខេត្តចាត់ការបន្ត។

គួរបញ្ជាក់ថា ជនសង្ស័យទាំង ៧នាក់ ដែលត្រូវបានឃាត់ខ្លួនខាងលើ ជាបុគ្គលិកអង្គការសហការការពារសម្បត្តិធនធានធម្មជាតិ មានស្នាក់ការនៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់ ដែលមានប្រធានអង្គកាខេត្ត ឈ្មោះ កែវ សារុន៕