(ព្រៃវែង)៖ មន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង បានចុះប្រតិបត្តិការ ស្ទាក់ឃាត់បានឈ្មួញនាំចូល គ្រឿងក្នុងគោ មាន សួត ថ្លើម និងពោះវៀនគោ ចំនួន១២៥គីឡូក្រាម និងម៉ូតូហុងដា១គ្រឿង នៅចំណុចភូមិព្រៃអាស្ទាំង ឃុំអង្គររាជ្យ ស្រុកព្រះស្តេច ខេត្តព្រៃវែង ដឹកចូលតាមច្រកបន្ទាយចក្រី ស្រុកព្រះស្តេច។
មន្រ្តីមន្ទីរកសិកម្ម រុក្ខាប្រមាញ់ និងនេសាទ និងលោក បិច សុង អភិបាលស្រុកព្រះស្តេច ក៏បានធ្វើការដុតកម្ទេចចោលនូវគ្រឿងក្នុងគោទាំងអស់នោះ នៅទីស្នាក់ការផលិតកម្ម និងបសុព្យាបាលស្រុកព្រះស្តេចផងដែរនៅថ្ងៃដដែលនេះ។
ការឃាត់បានខាងលើនេះ ធ្វើឡើងនៅក្នុងប្រតិបត្តិការត្រួតពិនិត្យអនាម័យសត្វ និងផលិតផល ដែលមានដើមកំណើតពីសត្វ និងមានការចូលរួមពីលោក ចិន វិសាល ប្រធានការិយាល័យផលិតកម្ម និងបសុព្យាបាលខេត្ត នៅថ្ងៃទី១៩ ខែមករា ឆ្នាំ២០១៧នេះ។
ឈ្មួញដែលដឹកគ្រឿងក្នុងគោ មានឈ្មោះ លាស់ ទ្រី ភេទ ប្រុស អាយុ៥៥ឆ្នាំ ជនជាតិខ្មែរ មានទីលំនៅ ក្នុងភូមិកោះតាជោ ឃុំគគីធំ ស្រុកគៀនស្វាយ ខេត្តកណ្តាល។ក្រុមការងារចុះឃាត់ និងរឹបអូសបានខាងលើ បញ្ជាក់ឲ្យដឹងថា ការនាំចូលនេះ គឺពុំមានលិខិតបញ្ជាក់ពីអនាម័យសត្វ និងគុណភាពផលិតផល ពុំមានលិខិតអនុញ្ញាតឲ្យនាំចូលពីក្រសួងកសិកម្ម រុក្ខាប្រមាញ់ និងនេសាទ ក្រោយពីការពិនិត្យពីមន្រ្តីជំនាញឃើញថា ផលិតផលសត្វនេះពុំមានគុណភាព និងមិនបំរើការហូបចុក របស់អតិថិជន។
រីឯជនដែលបានប្រព្រឹទ្ធបទល្មើស ការិយាល័យជំនាញបានកសាងសុំណុំរឿងបញ្ជូនទៅ មន្ទីរកសិកម្ម រុក្ខាប្រមាញ់ និងនេសាទ ដើម្បីចាត់ការបន្ត។
ជាមួយគ្នានោះដែរ លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់និងនេសាទ បានណែនាំដល់ប្រជាពលរដ្ឋទាំងអស់ នៅតាមព្រំដែនត្រូវបរិភោគ គ្រឿងក្នុងគោ ដែលនាំចូលមកពីប្រទេសវៀតណាម ដែលឈ្មួញនាំចូល ដោយខុសចច្បាប់នោះទេ ពីព្រោះគ្រឿងក្នុងទាំងនោះសុទ្ធតែខូចគុណភាព និងដាក់សារធាតុគីមីដើម្បីស្អុយ ឬទុកបានយូរ៕
