(ព្រះសីហនុ)៖ នគរបាលខេត្តព្រះសីហនុ ក្រោមការបញ្ជាផ្ទាល់ពី លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបន្ដប្រតិបត្តិការបង្ក្រាបគ្រឿងញៀន ជាក់ស្ដែងនៅថ្ងៃទី៦ ខែមករា ឆ្នាំ២០១៧នេះ កម្លាំងនគរបាលជំនាញរបស់លោក បានឃាត់ខ្លួនជនសង្ស័យ៥នាក់ ក្នុងនោះជនបរទេសម្នាក់ ដោយដកហូតបានថ្នាំ២៧កញ្ចប់ នៅ៣ទីតាំងផ្សេងគ្នា។
មន្រ្តីនគរបាលខេត្តព្រះសីហនុ បានបញ្ជាក់ថា ការបង្ក្រាបនៅករណីទី១៖ នៅវេលាម៉ោង៩៖៤០នាទី នៅចំណុចរង្វង់មូលតោ២ ស្ថិតនៅភូមិ៤ សង្កាត់លេខ៤ ក្រុងព្រះសីហនុ ដោយកម្លាំងនគរបាលចរាចរណ៍ផ្លូវគោក ដែលកំពុងរឹតបន្តឹងការអនុវត្តច្បាប់ចរាចរណ៍ ពេលនោះកម្លាំងបានឆែកឃើញ ជនជាតិអាមេរិកម្នាក់ ឈ្មោះ Soto Michael មានថ្នាំញៀនម៉ាទឹកកក៨កញ្ចប់ និងកញ្ឆា១កញ្ចប់ ព្រមទាំងសម្ភារពាក់ព័ន្ធមួយចំនួនទៀត។
ករណីទី២៖ នៅសង្កាត់៤ ក្រុងព្រះសីហនុ ឃាត់ខ្លួនជនសង្ស័យ ៣នាក់ មានឈ្មោះ ឡាង ទី អាយុ៣១ឆ្នាំ, ឈ្មោះ ដាំ ម៉ី អាយុ១៨ឆ្នាំ និងឈ្មោះ ផៃ ប៊ុនឈាង អាយុ១៩ឆ្នាំ ដកហូតបានថ្នាំញៀនមេតំហ្វេតាមីន១១កញ្ចប់ ទូរស័ព្ទដៃ១គ្រឿង និងលុយចំនួន៥០,០០០រៀល។
ករណីទី៣៖ នៅសង្កាត់៣ ក្រុងព្រះសីហនុ ឃាត់ខ្លួនជនសង្ស័យម្នាក់ ឈ្មោះ ទី សេង អាយុ២២ឆ្នាំ ដកហូតបានថ្នាំញៀន មេតំហ្វេតាមីន៨កញ្ចប់ ម៉ូតូ១គ្រឿង និងទូរស័ព្ទ១គ្រឿង។
បើតាមមន្រ្តីនគរបាល ក្រោយឃាត់ខ្លួនជនសង្ស័យទាំង៣នាក់ ត្រូវបញ្ជូនខ្លួនទៅសួរនាំ ដើម្បីចាត់ការបន្ដតាមច្បាប់៕
