(ភ្នំពេញ)៖ កញ្ញា ធី សុវណ្ណថា ប្រធានអង្គការ «យុវជន និងកិច្ចការសង្គម» បានហៅគម្រោងធ្វើមហាបាតុកម្មរបស់ លោក កឹម សុខា ប្រធានស្ដីទីគណបក្សសង្គ្រោះជាតិ ដើម្បីប្រឆាំងនឹងការសម្រេចរបស់តុលាការថា មានចេតនាចង់បង្កចលាចល និងអសន្តិសុខដល់ប្រទេសជាតិ។ កញ្ញា បានព្រមានថា បើសិនជាមានមហាបាតុកម្មដឹកនាំដោយ លោក កឹម សុខា មែននោះ នាងនឹងដឹកនាំប្រជាពលរដ្ឋធ្វើបាតុកម្មប្រឆាំងនឹងមហាបាតុកម្មនោះវិញផងដែរ។

ការព្រមានរបស់កញ្ញា ធី សុវណ្ណថា អតីតអ្នកគាំទ្រគណបក្សសង្រ្គោះជាតិ បានធ្វើឡើង បន្ទាប់ពីមេដឹកនាំគណបក្សប្រឆាំង លោក កឹម សុខា បានព្រមានជាថ្មី កាលពីម្សិលមិញថា លោក និងតំណាងរាស្រ្តគណបក្សសង្រ្គោះជាតិ នឹងធ្វើបាតុកម្មទ្រង់ទ្រាយធំទូទាំងប្រទេស បើសិនជាតុលាការនៅតែបន្តផ្តន្ទាទោសលើរូបលោក ហើយមិនអាចរកដំណោះស្រាយនយោបាយ ជាមួយគណបក្សកាន់អំណាចបាន។

នៅថ្ងៃទី១២ ខែកញ្ញា ឆ្នាំ២០១៦នេះ កញ្ញា ធី សុវណ្ណថា បានអះអាងប្រាប់ Fresh News ឲ្យដឹងថា «លោក កឹម សុខា ថោកទាបណាស់ប្រមូលពលរដ្ឋធ្វើបាតុកម្ម ការពារអំពើខុសច្បាប់របស់ខ្លួន គឺមានចេតនាបង្កចលាចល និងអសន្តិសុខប្រទេសជាតិ។ នាងខ្ញុំ ធី សុវណ្ណថា នឹងដឹកនាំពលរដ្ឋរាប់ម៉ឺននាក់ ប្រឆាំងនឹងបាតុកម្មរបស់លោក កឹម សុខា ដើម្បីការពារសន្តិភាព»។

កញ្ញា ក៏បានអំពាវនាវឱ្យប្រជាពលរដ្ឋទាំងអស់ ចូលរួមគាំទ្រកញ្ញា ក្នុងការទប់ស្កាត់មហាបាតុកម្មនោះផងដែរ។

សូមបញ្ជាក់ថា លោក កឹម សុខា ប្រធានស្តីទីគណបក្សសង្រ្គោះជាតិ ត្រូវបានសាលាដំបូងរាជធានីភ្នំពេញ បានកាត់ទោសឱ្យជាប់ ពន្ធនាគារ៥ខែ និងពិន័យប្រាក់៨០ម៉ឺនរៀល ពីបទមិនចូលខ្លួនក្នុងនាមជាសាក្សីនៃសំណុំរឿងសញ្ចារកម្ម។ ទោះជាយ៉ាងណាសាលក្រមនេះ មិនទាន់ក្លាយជាសាលក្រមស្ថាពរនៅឡើយទេ ខណៈដែល ក្រុមមេធាវីរបស់លោក គ្រោងនឹងដាក់ពាក្យប្តឹងជំទាស់ ទៅសាលាឧទ្ធរណ៍ អំឡុងពេល១ខែនេះ៕