(កណ្ដាល)៖ លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម (គ.ល.ក) បានដាស់តឿន និងជំរុញអាជ្ញាធរខេត្តកណ្ដាល ពិសេសកងកម្លាំងមានសមត្ថកិច្ច ដែលមានតួនាទីបង្ក្រាបល្បែងស៊ីសងខុសច្បាប់ ក្នុងមូលដ្ឋានខេត្តកណ្ដាល មិនត្រូវមានការសង្ស័យក្នុងការបង្ក្រាបល្បែងផ្សងសំណាងនានា នៅក្នុងភូមិសាស្ត្រខេត្តកណ្ដាល ព្រោះគណៈកម្មការគ្រប់គ្រងល្បែងពាណិជ្ជកម្ម (គ.ល.ក) ចេញអាជ្ញាប័ណ្ណឱ្យក្រុមហ៊ុនចំនួន៤ ទីតាំងប៉ុណ្ណោះនៅក្នុងភូមិសាស្ត្រខេត្តកណ្ដាលទាំងមូល។

លោក រស់ ភីរុណ បានណែនាំបែបនេះក្នុងឱកាសលោក អញ្ជើញជាអធិបតីតំណាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ល.ក ក្នុងកិច្ចប្រជុំពិភាក្សា ស្តីពីការគ្រប់គ្រងល្បែងផ្សងសំណាង និងគ្រប់គ្រងផលប៉ះពាល់ពីល្បែងស៊ីសងខុសច្បាប់គ្រប់ប្រភេទ នៅខេត្តកណ្ដាល នាព្រឹកថ្ងៃទី២៦ ខែមីនា ឆ្នាំ២០២៤។

លោកបន្តថា គណៈកម្មការគ្រប់គ្រងល្បែងពាណិជ្ជកម្ម (គ.ល.ក) បានចេញអាជ្ញាប័ណ្ណឱ្យក្រុមហ៊ុនចំនួន៤ ទីតាំង រួមមាន៖

*ទី១៖ ក្រុមហ៊ុន ដំរីមាស ឯ.ក ដែលមានអាសយដ្ឋានផ្ទះលេខបេ ៩២៨ ផ្លូវមេត្រី១៤ (បុរីមនោរម្យ ព្រែកតាទែន) ភូមិស្នែងដីដុះ ឃុំព្រែកតាទែន ស្រុកពញាឮ
*ទី២៖ ក្រុមហ៊ុន ម៉ូឌែន ឡូតធើរី ឯ.ក មានអាសយដ្ឋានផ្ទះលេខ១២៦J (បុរីវិមានភ្នំពេញ)ផ្លូវលេខ២៤ ភូមិក្រោម ឃុំព្រែកអញ្ចាញ ស្រុកមុខកំពូល
*ទី៣៖ ក្រុមហ៊ុន ឆ្នោតខ្មែរ មានអាសយដ្ឋានផ្ទះលេខ៣៧៣ ផ្លូវលេខ២០៥ ភូមិតាខ្មៅ សង្កាត់តាខ្មៅ ក្រុងតាខ្មៅ
*ទី៤៖ ក្រុមហ៊ុន លាភមហាសម្បត្តិ ឡូតូ ឯ.ក ដែលមានអាសយដ្ឋានផ្ទះលេខ៥៦-៤៨ ផ្លូវលេខA09 ភូមិព្រែកសំរោង សង្កាត់តាខ្មៅ ក្រុងតាខ្មៅ។

លោកសង្កត់ធ្ងន់ថា ក្នុងករណីមានល្បែងផ្សងសំណាងខុសទីតាំងចំនួន៤ នៅក្នុងភូមិសាស្ត្រខេត្តកណ្ដាលខាងលើ ត្រូវបង្ក្រាបឱ្យបានទាន់ពេលវេលា និងមិនត្រូវមានការសង្ស័យថាទីតាំងទាំងនោះមានអាជ្ញាប័ណ្ណត្រឹមត្រូវឡើង។

ក្នុងឱកាសនោះលោក គង់ សោភ័ណ្ឌ អភិបាលខេត្តកណ្ដាល បានបញ្ជាក់អំពីល្បែងស៊ីសងខុសច្បាប់ បើមាននៅខេត្តកណ្ដាល លោកនឹងដាក់ដាក់បទបញ្ជាដាច់ខាតថា បើល្បែងស៊ីសងខុសច្បាប់នោះ បានកើតឡើងនៅ ក្រុង-ស្រុកណាត្រូវឱ្យអាជ្ញាធរ និងកម្លាំងសមត្ថកិច្ច ក្រុង ស្រុក ចុះបង្ក្រាបបទល្មើសល្បែងស៊ីសងខុសច្បាប់នេះជាបន្ទាន់ ហើយបើកើតមាននៅ ក្រុង-ស្រុក ណាមួយ អភិបាលក្រុង-ស្រុក និងកងកម្លាំងសមត្ថកិច្ច ត្រូវរឹតបន្តឹង បើករណីនេះនៅតែមានកើតឡើងនៅដែនសមត្ថកិច្ចខ្លួនទទួលខុសត្រូវ។

ក្នុងឱកាសនោះមន្រ្តីជំនាញ របស់គណៈកម្មការគ្រប់គ្រងល្បែងពាណិជ្ជកម្ម បានឡើងធ្វើបទបង្ហាញ និងពន្យល់អំពីច្បាប់គ្រប់គ្រងល្បែងស៊ីសងមានច្បាប់ និងអត់ច្បាប់ផងដែរ។ សូមជម្រាបជូនថា បើតាមការខ្សឹបខ្សៀវពីពលរដ្ឋនៅមូលដ្ឋានខេត្តកណ្ដាលតាមតុកាហ្វេនិយាយថា ល្បែងស៊ីសងខុសច្បាប់នៅខេត្តកណ្ដាល នៅតែរីកស្រស់ស្រាយដូចផ្ការីកគ្រប់រដូវ ៕