(ភ្នំពេញ)៖ លោកស្រី ផេថងថាន ស៊ីណា វ៉ាត់ត្រា ប្រធានគណបក្សភឿថៃ នៅថ្ងៃទី១៩ ខែមីនា ឆ្នាំ២០២៤នេះ បានជូនបាច់ផ្កាដ៏ស្រស់ស្អាត ព្រមទាំងជូនពរ និងអបអរសាទរ លោក ហ៊ុន ម៉ានី សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា ដែលត្រូវបានតែងតាំងជា ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ សម្រាប់នីតិកាលទី៧ នៃរដ្ឋសភា។
សូមបញ្ជាក់ថា នៅថ្ងៃទី១៨ ខែមីនា ឆ្នាំ២០២៤ម្សិលមិញ លោកស្រី ផេថងថាន ស៊ីណា វ៉ាត់ត្រា ប្រធានគណបក្សភឿថៃ ដែលជាបក្សកំពុងកាន់អំណាចនៅក្នុងប្រទេសថៃ បានដឹកនាំគណៈប្រតិភូបំពេញទស្សនកិច្ចនៅកម្ពុជា រយៈពេលមួយថ្ងៃតបតាមការអញ្ជើញរបស់សម្តេចតេជោ ហ៊ុន សែន។
ក្នុងដំណើរទស្សនកិច្ចនេះ មរតកឈាមអ្នកនយោបាយរបស់លោក ថាក់ស៊ីន ស៊ីណាវ៉ាត្រា ដែលជាអ្នក នយោបាយដ៏មានប្រជាប្រិយភាពរបស់ថៃ ទទួលបានការស្វាគមន៍ និងបដិសណ្ឋារកិច្ចប្រកបដោយភាព កក់ ក្តៅបំផុតពីថ្នាក់ដឹកនាំជាន់ខ្ពស់នៃស្ថាប័នព្រឹទ្ធសភា, រដ្ឋសភា និងរាជរដ្ឋាភបាល។
សម្តេចតេជោ ហ៊ុន សែន និងលោក ថាក់ស៊ី ស៊ីណាវ៉ាត្រា មានទំនាក់ទំនងស្អិតល្មួតល្អូកល្អិនប្រៀប ដូចជា បងប្អូន លើសពីទំនាក់ទំនងក្នុងនាមជាអ្នកនយោបាយមានប្រទេសជាប់របងគ្នា។ បើទោះបីមានវ័យ នៅ ក្មេងយ៉ាងណាក្តី ប៉ុន្តែដំណើរទស្សន កិច្ចប្រធានបក្សភឿថៃ ដែលជាកូនស្រៅពៅរបស់លោក ថាក់ស៊ីន ទទួលបានការទទួលស្វាគមន៍កក់ក្តៅ បំផុតពីសំណាក់សម្តេចតេជោ ហ៊ុន សែន អ្នកនយោបាយដ៏មាន ឥទ្ធិពល នៅកម្ពុជា។
ទស្សនកិច្ចរបស់ប្រធានបក្សភឿថៃ ដែលជាបក្សកាន់អំណាចនៅប្រទេសថៃ ជាការបង្ហាញឱ្យឃើញនូវស្មា រតីពូនជ្រុំទំនាក់ទំនងល្អរវាងបក្ស និងបក្ស ប្រទេស និងប្រទេស ដូចអ្វីដែលលោក ថាក់ស៊ី ធ្លាប់បានធ្វើពេលលោកកាន់អំណាច៕
