(ត្បូងឃ្មុំ)៖ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៥ ខែសីហា ឆ្នាំ២០១៦នេះ បានដឹកនាំមន្រ្តីរាជការ ចុះលែងកូនត្រីក្នុងអាងទឹកជាំតាហឹង ស្ថិតក្នុងភូមិស្រម៉ ឃុំទឹកជ្រៅ ស្រុកតំបែរ ខេត្តត្បូងឃ្មុំ ព្រមទាំងបានផ្សព្វផ្សាយអនុសាសន៍មួយចំនួនរបស់ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ដល់អាជ្ញាធរ មន្រ្តីរាជការ និងប្រជាពលរដ្ឋក្នុងខេត្តផងដែរ។
ពិធីចុះលែងកូនត្រីនេះ ក៏មានការចូលរួមពីព្រះសង្ឃ មន្ត្រីក្រសួងកសិកម្ម អាជ្ញាធរមូលដ្ឋាន មន្ត្រីមន្ទីរជំនាញខេត្ត កងកម្លាំងសមត្ថកិច្ច និងប្រជាពលរដ្ឋក្នុងខេត្តត្បូងឃ្មុំ សរុបប្រមាណជាង១០០០នាក់ ព្រមទាំងបានផ្សព្វផ្សាយអនុសាសន៍មួយចំនួនរបស់ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ដល់អាជ្ញាធរ មន្រ្តីរាជការ និងប្រជាពលរដ្ឋក្នុងខេត្តផងដែរ។
ក្នុងឱកាសនេះ លោករដ្ឋមន្រ្តី បានគូសបញ្ជាក់ថា រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន នយករដ្ឋមន្រ្តីនៃកម្ពុជា បានពិនិត្យឃើញថាការរំលាយឡូត៍នេសាទចេញ ក្នុងគោលបំណងកាត់បន្ថយ ការបាត់បង់ធនធានជលផល ជាពិសេសប្រភេទត្រីមេពូជ។
លោកបានបន្តថា ប្រមុខរាជរដ្ឋាភិបាលក៏បានជំរុញឱ្យប្រជាពលរដ្ឋ និងភាគីពាក់ព័ន្ធ ដូចជាអង្គការសង្គមស៊ីវិល និង វិស័យឯកជន ចូលរួមឱ្យបានសកម្ម ក្នុងការលែងត្រី និងពង្រីកការចិញ្ចឹមឱ្យបានទូលំទូលាយ ដើម្បីរក្សាបាននូវធនធានជលផលរបស់ជាតិ និងកាត់បន្ថយការនាំចូលត្រី ពីប្រទេសជិតខាងផងដែរ។
ជាមួយគ្នានេះ លោករដ្ឋមន្រ្តីក៏បានផ្សព្វផ្សាយបន្តនូវ អនុសាសរបស់សម្តេចតេជោ ដល់អាជ្ញាធរគ្រប់លំដាប់ថ្នាក់ ត្រូវតែផ្តល់សេវាសាធារណៈ ដល់ប្រជាពលរដ្ឋឱ្យទាន់ពេលវេលា និងមានតម្លាភាព។ ម្យ៉ងទៀត លោករដ្ឋមន្ត្រីក៏បានដោះស្រាយនូវបញ្ហាមួយចំនួន របស់ប្រជាពលរដ្ឋស់នៅឃុំទឹកជ្រៅ ស្រុកតំបែរ ខេត្តត្បូងឃ្មុំ ខាងលើផងដែរ៕
