(នេប៉ាល់)៖ បក្សកុម្មុយនីស្តនេប៉ាល់ នៅថ្ងៃពុធនេះ បានប្រកាសតែងតាំងលោក Pushpa Kamal Dahal ជានាយករដ្ឋមន្ត្រីថ្មី នៃប្រទេសនេប៉ាល់ បន្ទាប់ពីលោក Khadga Prasad Oli ចុះចេញពីតំណែងដោយខ្លួនឯង។ នេះបើយោងតាមការចេញផ្សាយរបស់ សារព័ត៌មាន Reuters នៅល្ងាចថ្ងៃពុធ ទី០៣ ខែសីហា ឆ្នាំ២០១៦។
អស្ថេរភាពផ្នែកនយោបាយនៅក្នុងប្រទេសនេប៉ាល់ ត្រូវបានកើតឡើងតាំងពីឆ្នាំ ១៩៩០មកម៉្លេះ ហើយលោក Pushpa គឺជានាយករដ្ឋមន្ត្រីនេប៉ាល់ ទី២៤ ហើយក៏ជានាយករដ្ឋមន្ត្រី ដែលទទួលបានការតែងតាំងក្រោយពេលមានការកាប់សម្លាប់ ក្រុមអ្នកតវ៉ាទាមទារឲ្យលទ្ធិប្រជាធិបតេយ្យពហុបក្ស។
គួរបញ្ជាក់ផងដែរថា លោក Khadga Prasad Oli បានចុះចេញពីតំណែងកាលពីប៉ុន្មានថ្ងៃមុន មុនពេលសភានេប៉ាល់បោះឆ្នោត ដកសេចក្ដីទុកចិត្ត ព្រោះតែអសមត្ថភាព ចំណែកលោក Pushpa គឺជាអតីតប្រធានក្រុមឧទ្ទាមម៉ៅនិយម៕
