(ឥណ្ឌូនេស៊ី)៖ លោក ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា (AEM Lead for Cambodia) បានដឹកនាំគណៈប្រតិភូកម្ពុជាចូលរួមកិច្ចប្រជុំចង្អៀតរដ្ឋមន្រ្តីសេដ្ឋកិច្ចអាស៊ានលើកទី២៩ (The Twenty-Nine ASEAN Economic Ministers’ Retreat– the 29th AEM Retreat) និងកិច្ចប្រជុំពាក់ព័ន្ធ នៅសណ្ឋាគារ Plataran Heritage Borobudur Hotel ក្នុងទីក្រុងម៉ាហ្គាឡាំង ប្រទេសឥណ្ឌូនេស៊ី នាថ្ងៃទី២២ ខែមីនា ឆ្នាំ២០២៣ ។

កិច្ចប្រជុំនេះ បានដឹកនាំដោយលោកបណ្ឌិត Zulkifli Hasan រដ្ឋមន្រ្តីក្រសួងពាណិជ្ជកម្មឥណ្ឌូនេស៊ី ក្នុងនាមប្រធាននៃកិច្ចប្រជុំរដ្ឋមន្រ្តីសេដ្ឋកិច្ចអាស៊ានសម្រាប់ ឆ្នាំ២០២៣ និងមានការចូលរួមដោយរដ្ឋមន្ត្រីសេដ្ឋកិច្ចអាស៊ាន នៃប្រទេសសមាជិកទាំងអស់ អគ្គលេខាធិការអាស៊ាន ប្រធាននៃក្រុមប្រឹក្សាពិគ្រោះយោបល់ធុរកិច្ចអាស៊ាន សម្រាប់ឆ្នាំ២០២៣ និងតំណាងពាក់ព័ន្ធ និងគណៈប្រតិភូនៃប្រទេសសមាជិកអាស៊ានទាំងអស់ ព្រមទាំងមន្ត្រីលេខាធិការដ្ឋានអាស៊ានផងដែរ។

ក្នុងនាមជារដ្ឋមន្រ្តីសេដ្ឋកិច្ចអាស៊ាន សម្រាប់កម្ពុជា លោក ប៉ាន សូរស័ក្ដិ បានថ្លែងអំណរគុណប្រទេសឥណ្ឌូនេស៊ី ដែលធ្វើជាម្ចាស់ផ្ទះរៀបចំកិច្ចប្រជុំចង្អៀត និងកិច្ចប្រជុំពាក់ព័ន្ធនេះ បានយ៉ាងល្អប្រសើរ និងបានផ្តល់បដិសណ្ជាកិច្ចយ៉ាងកក់ក្តៅដល់គណៈប្រតិភូទាំងអស់ ក្រោមភាពជាប្រធានអាស៊ានរបស់ឥណ្ឌូនេស៊ីសម្រាប់ឆ្នាំ២០២៣។

លោក ប៉ាន សូរស័ក្ដិ បញ្ជាក់ពីការគាំទ្ររបស់កម្ពុជា ចំពោះឥណ្ឌូនេស៊ីក្នុងនាមជាប្រធានកិច្ចប្រជុំរដ្ឋមន្រ្តីសេដ្ឋកិច្ច អាស៊ានសម្រាប់ឆ្នាំ២០២៣ ក្រោមមូលបទ “ASEAN Matters: Epicentrum of Growth” ព្រមទាំងបានប្ដេជ្ញាចិត្តគាំទ្រ និងផ្តល់កិច្ចសហការយ៉ាងជិតស្និទ្ធ សំដៅអាចសម្រេចបានសមិទ្ធផលបន្ថែមទៀត ក្នុងដំណើរការកសាងសហគមន៍សេដ្ឋកិច្ចអាស៊ាន។

បើតាមរដ្ឋមន្រ្តីក្រសួងពាណិជ្ជកម្មកម្ពុជា បានបង្ហាញលទ្ធផលកិច្ចប្រជុំដ៏មានសារៈសំខាន់ទាំងពីរនេះ ទទួលបានលទ្ធផលដូចខាងក្រោម៖

១៖ កិច្ចប្រជុំពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន និងក្រុមប្រឹក្សាពិគ្រោះយោបល់ធុរកិច្ចអាស៊ាន៖
តំណាងក្រុមប្រឹក្សាពិគ្រោះយោបល់ធុរកិច្ចអាស៊ាន នៃប្រទេសនីមួយៗបានធ្វើបទបង្ហាញសង្ខេប ជូនរដ្ឋមន្រ្តីសេដ្ឋកិច្ចអាស៊ាន អំពីគម្រោងអាទិភាព និងគំនិតផ្តួចផ្តើមរបស់ខ្លួនសម្រាប់ឆ្នាំ២០២៣។ អង្គប្រជុំ បានគូសបញ្ជាក់ផងដែរ អំពីសារៈសំខាន់ក្នុងការពង្រឹងយន្តការទំនាក់ទំនង រវាងក្រុមការងារអន្តរវិស័យអាស៊ានជាមួយនឹងវិស័យឯកជន ដើម្បីធានាបាននូវប្រសិទ្ធភាពក្នុងការអនុវត្តគំនិតផ្តួចផ្តើម និងកិច្ចការនានារបស់អាស៊ាន។

២៖ កិច្ចប្រជុំចង្អៀតថ្នាក់រដ្ឋមន្រ្តីសេដ្ឋកិច្ចអាស៊ានលើកទី២៩៖
អង្គប្រជុំ បានផ្លាស់ប្តូរមតិយោបល់យ៉ាងផុសផុល លើរបៀបវារៈសំខាន់ៗ របស់សហគមន៍សេដ្ឋកិច្ចអាស៊ាន រួមមាន៖ (១) កិច្ចការដែលត្រូវបន្តតាមដានស្របតាមអនុសាសន៍ និងការណែនាំរបស់ថ្នាក់ដឹកនាំអាស៊ាន ក្នុងកិច្ចប្រជុំកំពូលអាស៊ានលើកទី៤០ និងទី៤១ ដែលបានប្រព្រឹត្តទៅកាលពីខែវិចិ្ឆកា ឆ្នាំ២០២២ នារាជធានីភ្នំពេញ (២) សមិទ្ធផលអាទិភាពសេដ្ឋកិច្ចក្រោមភាព ជាប្រធានអាស៊ានរបស់ឥណ្ឌូនេស៊ីសម្រាប់ឆ្នាំ២០២៣ (៣) ការងារអាទិភាពប្រចាំឆ្នាំ២០២៣ របស់ក្រុមការងារអន្តរវិស័យ (៤) អនុសាសន៍របស់ក្រុមការងារជាន់ខ្ពស់ ស្តីពីសមាហរណកម្មសេដ្ឋកិច្ច អាស៊ាន (៥) របាយការណ៍ និងបច្ចុប្បន្នភាពនៃការចរចាដំទ្បើងកម្រិតកិច្ចព្រមព្រៀងពាណិជ្ជកម្មទំនិញអាស៊ាន (ATIGA Upgrade) (៦) អាទិភាពនៃការចរចាកិច្ចព្រមព្រៀងពាណិជ្ជកម្មសេរី (៧) ការអនុវត្តកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) (៨) ការអនុវត្តផែនការសហគមន៍សេដ្ឋកិច្ចអាស៊ានឆ្នាំ ២០២៥ និង (៩) បញ្ហាផ្សេងៗ។

គួរបញ្ជាក់ផងដែរថា អង្គប្រជុំនេះ ក៏មានការអញ្ជើញចូលរួមពី រដ្ឋមន្រ្តីទេសចរណ៍ ពាណិជ្ជកម្ម និងឧស្សហកម្មនៃសាធារណរដ្ឋប្រជាធិបតេយ្យទីម័រខាងកើត ក្នុងនាមជាសមាជិកសង្កេតការណ៍ បន្ទាប់ពីថ្នាក់ដឹកនាំកំពូលនៃសមាជិកអាស៊ានទាំងអស់បានឯកភាពគ្នាជាគោលការណ៍ អនុញ្ញាតជូនសាធារណរដ្ឋប្រជាធិបតេយ្យទីម័រខាងកើតចូលរួមជាសមាជិកសង្កេតការណ៍នៃអាស៊ាន ក្នុងកិច្ចប្រជុំកំពូលអាស៊ានលើកទី៤០ និង ៤១ និងកិច្ចប្រជុំកំពូលពាក់ព័ន្ធ ដែលបានប្រព្រឹត្តទៅនៅថ្ងៃទី១០-១៣ ខែវិច្ឆិកា ឆ្នាំ២០២២ នៅរាជធានីភ្នំពេញ៕