(ភ្នំពេញ)៖ លោកស្រី មិណាមិណុ យ៉ូកុ (Minamino Yoko) ម្ចាស់បទ «ឥន្ទធនូសម្រាប់ថ្ងៃស្អែក» នឹងទៅជួបកុមារា និងកុមារីកំព្រារបស់កម្ពុជា ដែលលោកស្រីធ្លាប់ជួបកាលពីឆ្នាំ១៩៨៩។ លោកស្រី មិណាមិណុ យ៉ូកុ គឺជាតារាចម្រៀង និងជាតារាងសម្តែង ដ៏មានប្រជាប្រិយភាពមួយរូបរបស់ជប៉ុន តាំងពីឆ្នាំ១៩៨៥ រហូតដល់បច្ចុប្បន្ន។

លោកស្រី មិណាមិណុ យ៉ូកុ (Minamino Yoko) បានបញ្ជាក់បែបនេះ ខណៈចូលជួបសម្តែងការគួរសមជាមួយ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ជាមួយលោក តាកេ ហ្ស៊ឺនសឹកិ (TAKEI Shunsuke) រដ្ឋលេខាធិការក្រសួងការបរទេសជប៉ុន នៅព្រឹកថ្ងៃព្រហស្បតិ៍ ទី២៣ ខែកុម្ភៈ ឆ្នាំ២០២៣ នៅវិមានសន្តិភាព។

លោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន បានឲ្យដឹងពីលទ្ធផលជំនួបនេះថា លោកស្រី មិណាមិណុ បានគោរពជម្រាបជូនសម្តេច អំពីដំណើរទស្សនកិច្ចរបស់លោកស្រីមកកាន់ព្រះរាជាណាចក្រកម្ពុជា កាលពីឆ្នាំ១៩៨៩ និងឆ្នាំ២០១៣ ដែលសន្តានចិត្តដ៏ប្រពៃរបស់ប្រជាជនកម្ពុជា នៅពេលនោះ ទទួលស្វាគមន៍លោកស្រីយ៉ាងកក់ក្តៅ ជាទីបំផុតដែលធ្វើឲ្យបេះដូងរបស់លោកស្រី ដក់ជាប់នៅកម្ពុជា ហើយបាននិពន្ធ និងច្រៀងបទ «ឥន្ទធនូសម្រាប់ថ្ងៃស្អែក» ដែលអធិប្បាយអំពីអតីតកាលរបស់កម្ពុជា ដែលលោកស្រីបានឃើញដោយផ្ទាល់។

«ក្នុងដំណើរទស្សនកិច្ចនេះ លោកស្រីបានគោរពជម្រាបសម្តេច ដែរថា លោកស្រីនឹងទៅជួបកុមារានិងកុមារីកំព្រា ដែលលោកស្រីធ្លាប់បានជួបកាលពីឆ្នាំ១៩៨៩ ហើយក្នុងនាមជាឯកអគ្គរដ្ឋទូតសុឆន្ទៈសម្រាប់ខួបមិត្តភាពនៃការបង្កើតទំនាក់ទំនងផ្លូវការរវាងកម្ពុជា-ជប៉ុន លោកស្រីនឹងប្រឹងប្រែងធ្វើយ៉ាងណា ជំរុញទំនាក់ទំនងរវាងប្រទេសទាំងពីរ ឲ្យកាន់តែខ្លាំងឡើង»។ នេះបើតាមលោក អ៊ាង សុផល្លែត។

ក្នុងជំនួបនោះ សម្តេចតេជោ ហ៊ុន សែន បានសម្តែងក្តីរីករាយ ជាមួយទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ហើយបានថ្លែងអំណរគុណជប៉ុន ដែលបានលើកទឹកចិត្តឲ្យអ្នកវិនិយោគ មកវិនិយោគនៅកម្ពុជា បញ្ជូនកីឡាមកពិនិត្យការប្រកួតកីឡាស៉ីហ្គេម និងជំនួយដទៃទៀត។ សម្តេចតេជោ ក៏បានថ្លែងអំណរគុណចំពោះលោកស្រី មិណាមិណុ ដែលបាននិពន្ធ និងសម្តែងបទចម្រៀង «ឥន្ទធនូសម្រាប់ថ្ងៃស្អែក» ដែលឆ្លុះបញ្ចាំងពីតថភាពកម្ពុជា កាលពីអតីតកាល។

សូមជម្រាបថា ឆ្នាំ២០២៣នេះ គឺជាខួប ៧០ឆ្នាំ នៃការបង្កើតទំនាក់ទំនងផ្លូវការរវាងកម្ពុជា-ជប៉ុន។ កម្ពុជា និងជប៉ុន បានកំណត់យកឆ្នាំ២០២៣នេះ ដំឡើងកម្រិតទំនាក់ទំនងទ្វេភាគី ទៅជាទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ។

កម្ពុជា និងជប៉ុន នឹងរៀបចំកម្មវិធីជាច្រើន ដើម្បីអបអរសាទរខួបទំនាក់ទំនង៧០ឆ្នាំ។ ក្នុងនោះ ក៏មានកម្មវិធីផ្លាស់ប្តូរដំណើរទស្សនកិច្ចថ្នាក់ដឹកនាំប្រទេសទាំងពីរ។

ដំណើរទស្សនកិច្ចរបស់ លោក តាកេ ហ្ស៊ឺនសឹកិ គឺជាផ្នែកមួយនៃការអបអរសាទរ និងពង្រឹងដល់ទំនាក់ទំនងរវាងប្រទេសទាំងពីរ។ នៅថ្ងៃទី២៤ ខែកុម្ភៈ ខាងមុខនេះ លោក តាកេ ហ្ស៊ឺនសឹកិ នឹងចុះហត្ថលេខាលើលិខិតប្ដូរសារ ស្ដីពីការផ្ដល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់ចំនួន ៣.៩៨៦ លានយ៉េន ស្មើប្រមាណ ៣០.៦លានដុល្លារអាមេរិក ដើម្បីអនុវត្ត គម្រោងពង្រីកប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង។

ដោយឡែកលោកស្រី មិណាមិណុ យ៉ូកុ គឺជាតារាចម្រៀងដ៏មានប្រជាប្រិយភាពមួយរូបរបស់ជប៉ុន។ លោកស្រី ធ្លាប់បានមកប្រទេសកម្ពុជាចំនួនពីរដងមកហើយ សម្រាប់ការងារទូរទស្សន៍ គឺម្តងក្នុងឆ្នាំ ១៩៨៩ និងម្តងទៀតក្នុងឆ្នាំ២០១៣។

លោកស្រីមានទំនាក់ទំនងជ្រាលជ្រៅជាមួយប្រជាជន និងប្រទេសកម្ពុជា។ តាមរយៈទំនាក់ទំនងដ៏ជ្រាលជ្រៅជាមួយកម្ពុជា និងការចងចាំរបស់លោកស្រីចំពោះកុមារីកំព្រា ដែលលោកស្រីបានជួបក្នុងដំណើរទស្សនកិច្ចលើកដំបូងនៅប្រទេសកម្ពុជាក្នុងឆ្នាំ១៩៨៩ផងនោះ លោកស្រី បាននិពន្ធ និងច្រៀងចម្រៀងមួយបទមានចំណងជើងថា «ឥន្ទធនូដល់ថ្ងៃស្អែក»។

បទចម្រៀងរំលឹកដល់អានុស្សាវរីយ៍របស់លោកស្រី ជាមួយកុមារីកំព្រារបស់កម្ពុជា ដែលលោកស្រីបានជួបពេលទស្សនកិច្ចលើកដំបូងនៅកម្ពុជា។ បទចម្រៀងនេះ ត្រូវបានផលិតឡើងជាពិសេសសម្រាប់រំលឹកដល់ខួប ៧០ឆ្នាំនៃទំនាក់ទំនងរវាងកម្ពុជា និងជប៉ុន។

បទចម្រៀងនេះបានរំលេចនូវមនោសញ្ចេតនាយ៉ាងជ្រាលជ្រៅរវាងប្រជាពលរដ្ឋជប៉ុន និងប្រជាពលរដ្ឋកម្ពុជា។ បទចម្រៀងមួយបទនេះ ក៏ទទួលបានប្រជាប្រិយភាពខ្លាំងទាំងនៅជប៉ុន និងកម្ពុជា៕