(ព្រះវិហារ)៖ លោក គីម រិទ្ធី អភិបាលខេត្តព្រះវិហារ នៅព្រឹកថ្ងៃទី១៩ ខែមករា ឆ្នាំ២០២៣ ដោយមានការចូលរួមសហការជាមួយសហភាពសហព័ន្ធយុវជនកម្ពុជាខេត្តព្រះវិហារ ស្នងការដ្ឋាននគរបាលខេត្ត មន្ទីរ អង្គភាព ជុំវិញខេត្ត និងអាជ្ញាធរក្រុង-ស្រុក ទាំង៨ បានបើកយុទ្ធនាការគោយន្តមានភ្លើង ដើម្បីកាត់បន្ថយគ្រោះថ្នាក់ចរាចរណ៍ និងចែកភ្លើងបំភ្លឺទៅដល់អាជ្ញាធរក្រុង-ស្រុក ដើម្បីបន្តបិទលើគោយន្តនៅតាមមូលដ្ឋានរបស់ខ្លួន។
លោក គីម រិទ្ធី បានថ្លែងថា យុទ្ធនាការគោយន្តមានភ្លើង ដែលបានប្រារព្វធ្វើឡើងនាពេលនេះ គឺដើម្បីកាត់បន្ថយគ្រោះថ្នាក់ចរាចរណ៍ដែលបង្ក ឡើងដោយសារគោយន្តដែលបើកបរលើដងផ្លូវ ដោយគ្មានភ្លើងបំភ្លឺចរាចរណ៍។ យុទ្ធនា ការនាពេលនេះជាយុទ្ធការផ្សព្វផ្សាយ និងអប់រំទៅដល់បងប្អូនដើម្បីចូលរួមអនុវត្តន៍អោយបានគ្រប់ៗគ្នា ដែលមានរយះពេល៣ខែ ដោយចាប់ផ្ដើមពីថ្ងៃបើកយុទ្ធការនេះតទៅ។
ក្នុងដំណាក់កាលទី២ បើសិនបងប្អូនមិនព្រមដាក់ភ្លើងបំភ្លឺចរាចរណ៍នោះទេ មន្រ្តីអនុវត្តន៍ចរាចរណ៍ ក៏ដូចជា អាជ្ញាធរមានសម្ថតកិច្ចធ្វើការឃាត់គោយន្តរក្សាទុកនៅពេលដែលបងប្អូនធ្វើចរាចរណ៍ នៅតាមដងផ្លូវ រហូតដល់គោយន្តមានភ្លើងបំភ្លឺចរាចរណ៍ ទើបអនុញ្ញាតឲ្យចរាចរណ៍បាន។
លោកបន្តថា ក្នុងយុទ្ធការដំណាក់កាលទី១នេះ លោកបានទទួលថវិកា ដើម្បីទិញ ភ្លើងបំភ្លឺគោយន្តពីការរៃអង្គាសគ្នារបស់សហភាព សហព័ន្ធយុវជនកម្ពុជាខេត្តព្រះវិហារ ដោយក្នុង១ក្រុង-ស្រុក ទទួលបាន១០០គោយន្ត ហើយក្នុង១គោយន្តមានភ្លើងបំភ្លឺចំនួន៤ សរុបអស់ ភ្លើងបំភ្លឺចំនួន២៤០០ភ្លើងអំពូល។
ទន្ទឹមនេះ លោកអភិបាលខេត្តព្រះវិហារ បានផ្ដាំផ្ញើសហភាពសហព័ន្ធយុវជនកម្ពុជា ត្រូវសហការជាមួយអាជ្ញាធរក្រុង-ស្រុក អធិការស្រុក ប៉ុស្តិ៍រដ្ឋបាល ដើម្បីធ្វើការបំពាក់ជូនបងប្អូន ប្រជាពលរដ្ឋ ដែលពួកគាត់មានគោយន្តបើកបរ តាមដងផ្លូវ ក៏ដូចជាបងប្អូនមកបំពាក់នៅ ទីតាំងណាមួយ ពិសេសនៅតាមសាលាឃុំសង្កាត់។ អាជ្ញាធរត្រូវផ្ដល់ របាយការណ៍អំពីសកម្មភាពរបស់ក្រុមការងារស្ដីពីសកម្មភាព ចុះអនុវត្តន៍យុទ្ធការបំពាក់ ភ្លើងបំភ្លឺគោយន្តមករដ្ឋ បាលខេត្ត ដើម្បីធ្វើការបូកសរុបលទ្ធផល។
តាមរបាយការណ៍របស់ អាជាធរក្រុង-ស្រុងទាំង៨ មានគោយន្តសរុប ២០,០០០គ្រឿង។ ក្នុងដំណាក់កាលទី២ លោក គីម រិទ្ធី នឹងទិញភ្លើងបំភ្លឺបន្ថែមទៀត ដើម្បីផ្ដល់ជូនបងប្អូន ក្នុង១ក្រុង-ស្រុក នឹងទទួលបាន ១០០០គោយន្ត៕
