(បន្ទាយមានជ័យ)៖ នៅថ្ងៃទី៣ ខែធ្នូ ឆ្នាំ២០២២ លោក អ៊ុំ រាត្រី អភិបាលខេត្តបន្ទាយមានជ័យ និងជាប្រធានក្រុមការងារចុះជួយមូលដ្ឋានស្រុកថ្មពួក បានអញ្ជើញចុះត្រួតពិនិត្យ និងដោះស្រាយបញ្ហាប្រឈម

នានាក្នុងស្រុកថ្មពួក ដោយធ្វើការកសាង និងជួសជុលផ្លូវ ដែលមានការលំបាក ឬខូចខាតក្នុងភូមិក្នុងឃុំថ្មពួក និងឃុំគំរូ ស្រុកថ្មពួក ស្រុកថ្មពួក ដើម្បីបង្កលក្ខណៈ ងាយស្រួលក្នុងការធ្វើដំណើរងាយស្រួលក្នុងជីវភាពប្រចាំថ្ងៃ។

ក្នុងឱកាសចុះពិនិត្យមើលលោក អ៊ុំ រាត្រី បានជំរុញឲ្យមន្ត្រីជំនាញខេត្ត និងអ្នកបច្ចេកទេសពន្លឿនការសិក្សារួច ត្រូវប្រញាប់ប្រញាល់ដាក់គ្រឿងចក្រធ្វើផ្លូវដែលជាកន្លែងអទិភាពមុន ព្រោះរដូវនេះជារដូវប្រមូលផលកសិកម្ម របស់ប្រជាពលរដ្ឋ ត្រូវការដឹកជញ្ជូនភោគផល ធ្វើដំណើរទៅមក។

លោកបានគូសបញ្ជាក់ថា ក្នុងនាមក្រុមការងារទទួលស្រុកថ្មពួកនឹងបន្តខិតខំរួមគ្នាទាំងអស់ ដើម្បីសិក្សាដោះស្រាយបញ្ហាប្រឈមនានាឲ្យអស់លទ្ធភាព ដើម្បីរួមសហការជាមួយអាជ្ញាធរមូលដ្ឋានប្រជាពលរដ្ឋ អភិវឌ្ឍន៍ភូមិឃុំ។

ជាមួយគ្នានោះលោក អ៊ុំ រាត្រី អភិបាលខេត្ត បានក្រើនរំលឹកដាស់តឿនបន្ថែមដល់ក្រុមការងារទទួលឃុំ ភូមិទាំងអស់ក្នុងស្រុកថ្មពួក សូមចុះមូលដ្ឋានជាប់ជាប្រចាំដល់ភូមិ ខ្នងផ្ទះផ្ទះដើម្បីក្តាប់បញ្ហា ដោះស្រាយឲ្យបាន បើករណីដោះស្រាយមិនបានសូមធ្វើរបាយការណ៍ច្បាស់លាស់មកខេត្ត ដើម្បីលើកគម្រោង និងប្រជុំដោះស្រាយជាបន្តបន្ទាប់ទៀត៕