(ភ្នំពេញ)៖ ដោយទទួលបានបទបញ្ជាដោយផ្ទាល់ពីឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ, ការិយាល័យព្រហ្មទណ្ឌកម្រិតស្រាល នៃស្នងការដ្ឋានគរបាលរាជធានីភ្នំពេញ សហការជាមួយកម្លាំងព្រហ្មទណ្ឌខណ្ឌពោធិ៍សែនជ័យ ធ្វើការស្រាវជ្រាឃាត់ខ្លួនចោរឆក់ចំនួន២នាក់ បានបន្ទាប់ពីធ្វើសកម្មភាពបាន២ម៉ោង។

បើតាមលោកវរសេនីយ៍ឯក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានបញ្ជាក់ប្រាក់បណ្តាញព័ត៌មាន Fresh News ថា នៅថ្ងៃទី១៨ ខែវិច្ឆិកា ឆ្នាំ២០២២ វេលាម៉ោង០៧ និង១០នាទី មានករណីលួចមានស្ថានទម្ងន់ទោស (ឆក់កាបូបស្ពាយ) ពីស្ត្រីម្នាក់កំពុងជិះម៉ូតូតាមដងផ្លូវ នៅចំណុចស្ពានអាកាសចោមចៅ ភូមិថ្នល់បំបែក សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ សម្ភារបាត់បង់មាន ខ្សែដៃមាសចំនួន ០១ខ្សែ ជញ្ជៀនមាស ០១វង្ស ក្រវិលផ្លាកទីន ០១ចំនួន១គូរ និងប្រាក់រៀលចំនួន ៦០ម៉ឺនរៀល ជនសង្ស័យមានគ្នាប្រហែល ១២នាក់ ជិះម៉ូតូចំនួន ០៦គ្រឿង ក្នុងនោះមានម៉ូតូម៉ាក SUZUKI NEX ចំនួន ០៣គ្រឿង ម៉ូតូម៉ាកសង់សេ១២៥ ចំនួន ០២គ្រឿង និងម៉ូតូម៉ាក Scoopy I ចំនួន ០១ គ្រឿង ដោយម៉ូតូម៉ាក SUZUKI NEX មិនចាំស្លាកលេខ និងមិនស្គាល់ឆ្នាំផលិត ជិះម្នាក់ឯងជាអ្នកឆក់កាបូបស្ពាយនោះ។

លោកវរសេនីយ៍ឯក បានបន្តថា ក្រោយកើតហេតុក៍មានប្រជាជនធ្វើដំណើរតាមដងផ្លូវ ថតបានស្លាកលេខម៉ូតូម៉ាក សង់សេ ១២៥ ចំនួន ០២គ្រឿង ដែលមានស្លាកលេខ ភ្នំពេញ 1JT-8029 និង ភ្នំពេញ 1II-4208 រួចរាយការណ៍មកសមត្ថកិច្ច។

នៅម៉ោងប្រហែល ០៩ និង១០នាទី (ក្រោយកើតហេតុរយៈពេល ប្រហែល ០២ម៉ោង) ក្រុមការងាររបស់ការិយាល័យព្រហ្មទណ្ឌកម្រិតស្រាល និងកម្លាំងព្រហ្មទណ្ឌខណ្ឌពោធិ៍សែនជ័យ ដែលទទួលបទបញ្ជាពីថ្នាក់លើឱ្យស្រាវជ្រាវ និងល្បាត ក៏ប្រទះឃើញម៉ូតូដែលមានភិនភាគខាងលើក៏ដេញ ឃាត់ខ្លួនបានចំនួន ០២នាក់ ក្រោយសាកសួរ ជនសង្ស័យទាំង ០២នាក់នោះ បានសារភាពថាពួកគេ និងបក្ខពួកប្រហែល១០នាក់ទៀត ពិតជាបានធ្វើសកម្មភាព ឆក់កាបូបពីស្ត្រីម្នាក់នោះមែន រួចយកគ្រឿងអលង្ការទាំងនោះទៅលក់នៅផ្សារពោធិ៍ចិនតុង បានប្រាក់ចំនួន ១,៣០០​ដុល្លារ ចែកគ្នាបានម្នាក់ចំនួន ១០០ដុល្លារ។

លោកបានបញ្ជាក់ថា បច្ចុប្បន្នការិយាល័យកំពុងបន្តស្វែងរកបក្ខពួកបន្ថែម និងបន្តនីតិវិធីដើម្បីបញ្ជូនជនសង្ស័យទៅសាលាដំបូងរាជធានីភ្នំពេញ៕