(ត្បូងឃ្មុំ)៖ នាព្រឹកថ្ងៃទី១៦ ខែមីនា ឆ្នាំ២០២២នេះ លោកបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងលោកស្រី ម៉េង វ៉ាន់ដានីន ជាមច័ន្ទសោភ័ណ បានអញ្ជើញជាធិបតីភាពប្រារព្ធទិវាវប្បធម៌ជាតិ ៣ មិនា លើកទី២៤ ឆ្នាំ២០២២ ក្រោមប្រធានបទ «យុវជនដើម្បីវប្បធម៌ជាតិ» ដែលបានរៀបចំឡើងដោយរដ្ឋបាលខេត្ត សហការជាមួយមន្ទីរវប្បធម៌ និងវិចិត្រសិល្បៈខេត្តត្បូងឃ្មុំ នៅសាលប្រជុំធំ (សាល គ)សាលាខេត្តត្បូងឃ្មុំ ។
ក្នុងនោះក៏មានការអញ្ជើញចូលរួម អភិបាលរងខេត្ត លោក-លោកស្រី នាយក-នាយករង រដ្ឋបាលខេត្ត ទីចាត់ការខេត្ត ប្រធាន-អនុប្រធានមន្ទីរ/អង្គភាពជុំវិញខេត្ត សាស្ត្រាចារ្យ លោកគ្រូ -អ្នកគ្រូ សិស្ស/និស្សិត ក្រុមសិល្បៈមន្ទីរវប្បធម៌ខេត្ត និងអ្នកពាក់ព័ន្ធផងដែរ។
បន្ទាប់ពីលោក កួ ហុក ប្រធានមន្ទីរវប្បធម៌ខេត្ត បានស្វាគមន៍ ដោយបានលើកឡើងអំពីរបាយការណ៍ សមិទ្ធផលសម្រេចបាននូវលទ្ធផលនានា ដែលបានអនុវត្តកន្លងទៅរបស់ស្ថាប័ន ជាពិសេសដើម្បីឆ្លើយតបទៅនឹងទិវាជាតិ ៣ មីនា ក្នុងឆ្នាំនេះ។
នាឱកាសនោះ លោកបណ្ឌិត ជាម ច័ន្ទសោភ័ណ បានលើកឡើងពីតឹកតាងប្រវត្តិសាស្ត្រនៃខេត្តត្បូងឃ្មុំ ពាក់ព័ន្ធនឹងកុលាលភាជន៍ (ភាជន៍) ដែលមានអាយុកាលជាងបីពាន់ឆ្នាំមុនគ្រឹស្តសករាជ ដែលរកឃើញក្នុងភូមិសាស្ត្រ ខេត្តត្បូងឃ្មុំ និងប្រាក់ស្លឹង ដែលបានផលិតដំបូងនៅទីតាំងបឹងប្រាក់ ក្នុងបរិវេណរមណីយដ្ឋានព្រៃនគរ ក្នុងរជ្ជកាលហ្លួងព្រះស្តេចកន ដែលត្រូវបានយកមកធ្វើជានិម្មិតសញ្ញារបស់ខេត្តត្បូងឃ្មុំ ក្នុងគោលបំណងបង្ហាញ និងរក្សាពីកេរ្ត៍ដំណែលប្រវត្តិសាស្ត្រសម្រាប់យុវជនជំនាន់ក្រោយទៀត។
លោកបណ្ឌិតអភិបាលខេត្ត បានបន្ថែមថា ខេត្តត្បូងឃ្មុំ ជាខេត្តបង្កើតថ្មីលើទឹកដីចាស់ ដែលពោរពេញទៅដោយសម្បត្តិវប្បធម៌ធម្មជាតិជាច្រើន មិនចាញ់ខេត្តនានាប៉ុន្មានឡើយ ជាតំបន់ដីក្រហមដែលមានជីជាតិ ក្នុងការដាំដុះកសិផល ឧស្សាហកម្ម កសិកម្ម នឹងជាទឹកដីប្រវត្តិសាស្ត្រទុំទាវ តំបន់ប្រវត្តិសាស្រ្តហ្លួងព្រះស្ដេចកន តំបន់ផលិតប្រាក់ស្លឹង (រូបិយវត្ថុខ្មែរដំបូងបំផុតបោះពុម្ពដាក់ឲ្យចរាចរណ៍ប្រើប្រាស់ប្រាក់បុរាណខ្មែរក្នុងរជ្ជកាលស្ដេចកន ១៥១២-១៥២៥)ទឹកធ្លាក់ហោង ជាដើម សក្កានុពលទាំងនេះ បានធ្វើឱ្យខេត្តមានការរីកចម្រើនលើគ្រប់វិស័យ។
លោកបណ្ឌិត ជាម ច័ន្ទសោភ័ណ បានលើកឡើងបន្តថា ជាការពិត ប្រមុខរាជរដ្ឋាភិបាលសម្តេចតេជោ ហ៊ុន សែន តាមរយៈការអានសារលិខិតដ៏ខ្ពង់ខ្ពស់របស់សម្តេច ដែលតែងតែយកចិត្តទុកដាក់ ប្រារព្ធទិវាវប្បធម៌ជាតិនេះឡើង ជារៀងរាល់ឆ្នាំ ដើម្បីរំឭកគុណូបការៈ និងស្នាដៃដ៏វិសេសវិសាលនៃបុព្វបុរសយើង ដែលបានបន្សល់ទុកនូវមរតកវប្បធម៌ ដ៏សម្បូរបែបដល់កូនចៅជំនាន់ក្រោយ។
លោកបណ្ឌិតអភិបាលខេត្ត បញ្ជាក់បន្ថែមថា ការប្រារព្ធទិវាវប្បធម៌ជាតិ ៣ មីនានេះ ជាការជំរុញការផ្សព្វផ្សាយ ការផ្ទេរចំណេះដឹង ចំណីធ្វើ ជំនាញ បច្ចេកទេស និងទេពកោសល្យវប្បធម៌ ក៏ដូចជាការក្រើនរំឭក បំផុសស្មារតី និងមនសិការ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាំងស្នងឫស្សី មានកាតព្វកិច្ចក្នុងការថែរក្សាការពារ ឲ្យបានស្ថិតស្ថេរគង់វង្សនូវវប្បធម៌ជាតិ និងវប្បធម៌ចម្រុះ របស់សហគមន៍ជនជាតិ ក្នុងព្រះរាជាណាចក្រកម្ពុជា ក្រោមប្រធានបទ «យុវជនដើម្បីវប្បធម៌»៕
