(តាកែវ)៖ អំណោយដ៏ច្រើនសន្ធឹកសន្ធាប់របស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបានលោក ឡាយ វណ្ណៈ អភិបាលខេត្តតាកែវ និងជាប្រធានកិត្តិយសសាខាកាកបាទក្រហម ខេត្តតាកែវ អមដំណើរដោយលោកស្រី នូ សុវណ្ណនី អភិបាលរងខេត្ត និងជាប្រធានសាខាកាកបាទក្រហមកម្ពុជាខេត្ត និងអាជ្ញាធដែនដីគ្រប់លំដាប់ថ្នាក់រួម និងក្រុមយុវជន១៥៧ផងនោះ បាននាំយកអំណោយទៅជូនលោកយាយ ខាន់ កៅ ដែលមានទីលំនៅក្នុងភូមិត្រពាំងត្រយឹង ឃុំចំបក់ ស្រុកបាទី ដែលកំពុងតែជួបការលំបាក និងមានជំងឺរួមរឹតរាងកាយ ព្រមទាំងងឹតភ្នែក ដោយមានកូនបីនាក់រស់នៅក្នុងបន្ទុក ដោយក្នុងនោះកូនប្រុសម្នាក់ពិការជើងម្ខាង និងភ្នែកម្ខាងថែមទៀតផង។
នៅក្នុងឱកាសនាំយកអំណោយទៅចែកជូនលោកយាយ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានជួបដោយផ្ទាល់តាមរយៈទូរស័ព្វជាមួយកូនស្រីលោកយាយ ដោយសម្ដេចកិត្តិព្រឹទ្ធបណ្ឌិត បានធ្វើការផ្ដាំផ្ញើឲ្យកូនស្រីលោកយាយត្រូវខឹតខំថែរក្សាសុខភាពម្ដាយ និងមើលថែលោកយាយឲ្យបានល្អ។
ជាមួយនិងអារម្មណ៏រីករាយកូនស្រីលោកយាយ បានថ្លែងអំណរគុណយ៉ាងជ្រាលជ្រៅចំពោះ សម្ដេចតេជោនាយករដ្ឋមន្រ្តី និងសម្ដេចកិត្តិព្រឹទ្ធបណ្ឌិត ដែលជានិច្ចកាលតែងតែយកចិត្តទុកដាក់ចំពោះសុខទុក្ខប្រជារាស្រ្តហើយបានរួមសុខរួមទុក្ខជាមួយប្រជារាស្រ្តគ្រប់កាលៈទេសៈ។
បន្ថែមពីលើនោះលោក ឡាយ វណ្ណៈ អភិបាលខេត្តតាកែវ ក៏បានធ្វើការផ្ដាំផ្ញើដល់គណៈកម្មាធិការសាខាកាកបាទក្រហមខេត្តតាកែវ ជួយជួសជុលផ្ទះជូនលោកយាយ ដែលមានសភាពទ្រុឌទ្រោម ឲ្យបានល្អប្រសើរជាង មុនតាមការណែនាំពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។
គួរបញ្ជាក់ថា អំណោយសម្ដេចតេជោនាយករដ្ឋមន្រ្តី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលលោកអភិបាលខេត្តតាកែវ នាំយកទៅផ្ដល់ជូនលោកយាយ កៅ ខាន់ រួមមាន មីយើង អង្ករ ទឹកសុទ្ធ ទឹកក្រូច ត្រីខកំប៉ុង ទឹកដោះគោ ទឹកស៊ីអ៊ីវ កន្ទេស ពូក ខ្នើយ មុង ភួយនិងសម្ភារៈប្រើប្រាស់ជាច្រើនទៀតព្រមទាំងថវិការមួយចំនួនផងដែរ។
ដោយឡែកសាខាកាកបាទក្រហមខេត្តតាកែវ និងអនុសាខាស្រុកបាទី ក៏បានផ្ដល់អំណោយជាសម្ភារៈហូបចុកនិងប្រើប្រាស់ ព្រមទាំងថវិការមួយចំនួនដល់លោកយាយផងដែរ។
