(ភ្នំពេញ)៖ នៅរសៀលថ្ងៃអង្គារ ទី៣០ ខែវិច្ឆិកា ឆ្នាំ២០២១នេះ លោកស្រី រ៉េតណូ អិល.ភី. ម៉ារស៊ូឌី រដ្ឋមន្រ្តីការបរទេសឥណ្ឌូនេស៊ី នឹងអញ្ជើញមកបំពេញទស្សនកិច្ចផ្លូវការនៅកម្ពុជារយៈពេលពីរថ្ងៃ គឺពីថ្ងៃទី៣០ ខែវិច្ឆិកា ដល់ថ្ងៃទី០១ ខែធ្នូ។
ការបំពេញទស្សនកិច្ចរបស់ រដ្ឋមន្រ្តីការបរទេសឥណ្ឌូនេស៊ី ធ្វើឡើងតបតាមការអញ្ជើញរបស់ ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា។
យោងតាមក្រសួងការបរទេសកម្ពុជា បានឱ្យដឹងថា ក្នុងឱកាសនៃដំណើរទស្សនកិច្ចនេះ លោកស្រី រ៉េតណូ អិល.ភី. ម៉ារស៊ូឌី នឹងអញ្ជើញចូលជួបសម្តែងការគួរសមចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជា។
លោកស្រី រ៉េតណូ អិល.ភី. ម៉ារស៊ូឌី នឹងមានជំនួបជាមួយលោកឧបនាយករដ្ឋមន្ត្រី ប្រាក់ សុខុន ដោយនឹងពិភាក្សាលើទិដ្ឋភាពមួយចំនួននៃទំនាក់ទំនង និងកិច្ចសហប្រតិបត្តិការទ្វេភាគី រួមទាំងអាទិភាពនានារបស់កម្ពុជាពេលធ្វើជាប្រធានអាស៊ាន ឆ្នាំ២០២២។
ក្រសួងការបរទេសកម្ពុជា បានបង្ហាញក្តីរំពឹងថា ដំណើរទស្សនកិច្ចផ្លូវការរបស់ លោកស្រី រ៉េតណូ អិល.ភី. ម៉ារស៊ូឌី មកកាន់កម្ពុជា នឹងបន្តពង្រឹង និងធ្វើឱ្យស៊ីជម្រៅបន្ថែមទៀតនូវទំនាក់ទំនងដ៏យូរអង្វែង និងកិច្ចសហប្រតិបត្តិការដ៏ជិតស្និទ្ធរវាងកម្ពុជា និងឥណ្ឌូនេស៊ី ទាំងក្នុងក្របខណ្ឌទ្វេភាគី និងពហុភាគី សម្រាប់ផលប្រយោជន៍ទៅវិញទៅមករបស់ប្រជាជាតិទាំងពីរ និងពិភពលោក។
សូមបញ្ជាក់ថា ប្រទេសកម្ពុជា និងឥណ្ឌូនេស៊ី បានភ្ជាប់ទំនាក់ទំនងជាផ្លូវការនឹងគ្នានាថ្ងៃទី១៣ ខែកុម្ភៈ ឆ្នាំ១៩៥៩។ តែត្រូវបានកាត់ផ្តាច់ទៅវិញនៅឆ្នាំ១៩៧៥ ហើយបានភ្ជាប់ឡើងវិញជាថ្មីនៅឆ្នាំ១៩៩២។ ក្រោយពេលភ្ជាប់ទំនាក់ទំនងឡើងវិញ ប្រទេសកម្ពុជា និងឥណ្ឌូនេស៊ី ក៏បានពង្រឹងទំនាក់ទំនង និងកិច្ចសហប្រតិបត្តិការនឹងគ្នាកាន់តែល្អប្រសើរ។ ក្នុងនោះមេដឹកនាំនៃប្រទេសទាំងពីរតែងតែផ្លាស់ប្តូរដំណើរទស្សនកិច្ចរវាងគ្នាជាញឹកញាប់ផងដែរ។
សម្តេចតេជោ ហ៊ុន សែន ធ្លាប់បានទស្សនកិច្ចនៅប្រទេសឥណ្ឌូនេស៊ីចំនួនពីរដង គឺនៅឆ្នាំ២០១៥ និង២០១៩។ ដោយឡែកឥណ្ឌូនេស៊ី ក៏មានអតីតប្រធានាធិបតី និងថ្នាក់ដឹកនាំជាន់ខ្ពស់ជាច្រើន បានបំពេញទស្សនកិច្ចនៅកម្ពុជាផងដែរ។ ដោយឡែកលោក ចូកូ វីដូដូ មិនដែលបានមកទស្សនកិច្ចនៅកម្ពុជានៅឡើយទេ តាំងពីឡើងជាប្រធានាធិបតីនៅឆ្នាំ២០១៤មក។
តាមរយៈទំនាក់ទំនងល្អប្រសើរនេះ កម្ពុជា និងឥណ្ឌូនេស៊ី ក៏បានបង្កើតឱ្យមានកិច្ចព្រមព្រៀងលើផ្នែកសេដ្ឋកិច្ច និងបច្ចេកវិទ្យាផងដែរ។
ពាក់ព័ន្ធការធ្វើពាណិជ្ជកម្មវិញ ឃើញថា កម្ពុជា និងឥណ្ឌូនេស៊ី មានការផ្លាស់ប្តូពាណិជ្ជកម្មជាមួយគ្នាគួរឱ្យកត់សម្គាល់ផងដែរ។ នៅឆ្នាំ២០២០ ទំហំពាណិជ្ជកម្មរវាងប្រទេសទាំងពីរមានចំនួនជិត ៥៧៨លានដុល្លារ។ ក្នុងនោះកម្ពុជានាំចេញទៅឥណ្ឌូនេស៊ី ជិត ២៩លានដុល្លារ ហើយនាំចូលជិត ៥៤៩លានដុល្លារ។
ដោយឡែករយៈពេល ១០ខែឆ្នាំ២០២១ ទំហំពាណិជ្ជកម្មរវាងប្រទេសទាំងពីរសម្រេចបានជាង ៥១៣លានដុល្លារ ធ្លាក់ចុះជាង ១១ភាគរយ។ ក្នុងនោះកម្ពុជា នាំចេញទៅឥណ្ឌូនេស៊ី បានជាង ២៦លានដុល្លារ ហើយនាំចូលពីឥណ្ឌូនេស៊ី ជាង ៤៨៧លានដុល្លារ។
រីឯការវិនិយោគវិញ កាលពីឆ្នាំ២០១៦ ឥណ្ឌូនេស៊ី បានវិនិយោគនៅកម្ពុជាប្រមាណ ៣៥០លានដុល្លារ។ តែបើតាមមន្ត្រីក្រុមប្រឹក្សាសេដ្ឋកិច្ចកម្ពុជា បានអះអាងថា បច្ចុប្បន្នគម្រោងវិនិយោគរបស់ឥណ្ឌូនេស៊ីនៅកម្ពុជា មានចំនួនតិចតួចប៉ុណ្ណោះ៕
