(ភ្នំពេញ)៖ ព្រះអង្គម្ចាស់ក្សត្រិយ៍ នរោត្តម រតនា ទេវី ព្រះបុត្រី យាងជាព្រះតំណាងសម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិច នៅព្រឹកថ្ងៃទី០៧ ខែវិច្ឆិកា ឆ្នាំ២០២១ បានដឹកនាំគណៈប្រតិភូ អញ្ជើញចូលរួមរំលែកទុក្ខដ៏ក្រៀមក្រំ ជាមួយគ្រួសារសព ឯកឧត្តម កិត្តិនីតិកោសលបណ្ឌិត ងួន ញ៉ិល អនុប្រធានទី១នៃរដ្ឋសភា ដែលបានទទួលមរណភាពនៅថ្ងៃទី៥ ខែវិច្ឆិកា ឆ្នាំ២០២១ វេលាម៉ោង ១០៖៣៦នាទីព្រឹក ក្នុងជន្មាយុ៧៩ឆ្នាំ ដោយរោគាពាធ។ ពិធីបុណ្យប្រព្រឹត្ដទៅនៅគេហដ្ឋាន សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
នៅក្នុងមរណទុក្ខដ៏ក្តុកក្តួលនេះ ព្រះអង្គម្ចាស់ក្សត្រិយ៍ នរោត្តម រតនា ទេវី ព្រះបុត្រី ទ្រង់បានចូលរួមសោកស្តាយ និងរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារនៃសព ហើយចំពោះមរណភាពរបស់ ឯកឧត្ដម កិត្តិនីតិកោសលបណ្ឌិត ងួន ញ៉ិល គឺជាការបាត់បង់ដ៏ធំធេងនូវ ឪពុក ឪពុកក្មេក ជីតា ជីតាទួត ជាទីគោរពស្រឡាញ់ប្រកបដោយគុណធម៌ ព្រហ្មវិហារធម៌ ដែលក្នុងមួយជីវិត របស់ ឯកឧត្ដម បានពលិកម្មជាច្រើន បូជាទាំងកម្លាំងកាយ ចិត្ត ជម្នះរាល់ឧបសគ្គនានា ក្នុងការឃុំគ្រងថែរក្សាក្រុមគ្រួសារពោរពេញដោយភាពកក់ក្ដៅ។
ស្ថិតក្នុងមរណទុក្ខដ៏ក្រៀមក្រំនេះ ព្រះអង្គម្ចាស់ក្សត្រិយ៍ នរោត្តម រតនា ទេវី ព្រះបុត្រី និងសហការីទាំងអស់ សូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោកទាំងអស់ សូមប្រោសដួងវិញ្ញាណក្ខន្ធ របស់ឯកឧត្ដម កិត្តិនីតិកោសលបណ្ឌិត ងួន ញ៉ិល បានទៅកាន់ក្នុងសុគតិភពជានិច្ចនិរន្តរ៍ កុំបីឃ្លៀងឃ្លាតឡើយ៕
