(ភ្នំពេញ)៖ រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងថា ក្នុងរដូវភ្ជុំបិណ្ឌខាងមុខ ការជំរុញនិងគ្រប់គ្រងចលនាទេសចរណ៍ផ្ទៃក្នុងប្រកបដោយសុវត្ថិភាព គឺជាសញ្ញាវិជ្ជមាននៃការងើបឡើងវិញ សម្រាប់វិស័យទេសចរណ៍កម្ពុជា។

លោករដ្ឋមន្ត្រីបានលើកឡើងបញ្ហានេះ ក្នុងសន្និបាតបូកសរុបការងារទេសចរណ៍ផ្ទៃក្នុងរយៈពេល ៩ខែដើមឆ្នាំ២០២១ និងទិសដៅអនុវត្តបន្ត នាព្រឹកថ្ងៃទី១៥ ខែកញ្ញា ឆ្នាំ២០២១ តាមប្រព័ន្ធវីដេអូ ដោយមានការចូលរួមពីរដ្ឋបាលរាជធានី-ខេត្តទាំង២៥ មន្ទីរទេសចរណ៍រាជធានី-ខេត្តទាំង២៥ វិស័យឯកជន និងភាគីពាក់ព័ន្ធជាច្រើនរូបផងដែរ។

សន្និបាតនេះធ្វើឡើងដើម្បីត្រួតពិនិត្យ និងវាយតម្លៃលើលទ្ធផលការងារទេសចរណ៍ផ្ទៃក្នុងដែលបានអនុវត្តរយៈពេល ៩ខែដើម ឆ្នាំ២០២១ និងស្របពេលដាក់ចេញ នូវទិសដៅអនុវត្តការងារបន្ត ជំរុញការស្តារវិស័យទេសចរណ៍ក្នុងស្រុកឡើងវិញ តាមគន្លងប្រក្រតីភាពថ្មី ដើម្បីចូលរួមសំខាន់ក្នុងការស្តារ សេដ្ឋកិច្ចសង្គមជាតិ និងទទួលអំណរបុណ្យភ្ជុំបិណ្ឌ នៅពេលខាងមុខ។

លោកបន្ថែមថាវិស័យ ទេសចរផ្ទៃក្នុង ដែលរូមមានទាំងទេសចរជាតិ និង បរទេសផ្ទៃក្នុង គឺជាឧបករណ៍ដ៏មានប្រសិទ្ធភាព និងប្រកបដោយសក្តានុពលមួយនៅក្នុងការស្តារសេដ្ឋកិច្ច និងសង្គមឡើងវិញ និងជាពិសេសចូលរួមក្នុងការការសម្រួល និងទ្រទ្រង់ដល់ដំណើរការអាជីវកម្មនៅក្នុងឧស្សាហកម្មទេសចរណ៍។ រីឯបុណ្យភ្ជុំបិណ្ឌ ដែលនឹងខិតជិតមកដល់ក្នុងពេលខាងមុខនេះ ក៏ជាបុណ្យប្រពៃណីជាតិដ៏ធំជាងគេបង្អស់ក្នុងចំណោមបុណ្យប្រពៃណីខ្មែរយើង។

លោក ថោង ខុន បញ្ជាក់ទៀតថា៖ «បើពិនិត្យលើអត្រាចាក់វ៉ាក់សាំង គឺយើងចាក់បានជាង ៩០% បើគិតពីអាយុ ១២ ឆ្នាំឡើង ដូចនេះភាពស៉ាំក្នុងសហគមន៍ក៏អាចមានល្អប្រសើរហើយ។ សព្វថ្ងៃ ទោះបីអត្រាឆ្លងនៅមាន ប៉ុន្តែអការៈរោគវិវត្តន៍ទៅធ្ងន់ធ្ងរ និង អត្រាមរណៈដោយសារកូវីដក៏មានការថយចុះច្រើនផងដែរ។ ប៉ុន្តែទោះ ជាយ៉ាងណាក៏ដោយក៏យើងនៅតែត្រូវប្រុងប្រយ័ត្នខ្ពស់ជាប់ជានិច្ច ដោយត្រូវបន្តប្រកាន់ខ្ជាប់នូវវិធានបង្ការទាំងឡាយ ជាចាំបាច់ ពិសេសអនុវត្ត ៣កុំ ៣ ការពារ ជាប់ជានិច្ច»។

បើតាមលោករដ្ឋមន្ត្រី, ដើម្បីធានាថា គោលដៅទេសចរណ៍មួយ ប្រកបដោយសុវត្ថិភាព រដ្ឋបាលថ្នាក់ក្រោមជាតិ ដែលមានមន្ទីរទេសចរណ៍ ជាសេនាធិការ ត្រូវពិនិត្យ និងវាយតម្លៃ ឲ្យបានច្បាស់លើគោលដៅនីមួយៗ ទាំងគោលដៅរួម និង គោលដៅទេសចរណ៍ដោយឡែក ដែលមានលក្ខណៈប្រជាប្រិយ ដោយត្រូវផ្អែកលើសូចនាករសមិទ្ធកម្មចំនួន ៤ រួមមាន៖

១៖ អត្រានៃការចាក់វ៉ាក់សាំងសំដៅបង្កើតភាពស៉ាំសហគមន៍
២៖ អត្រានៃការរីករាលដាលជំងឺកូវីដ-១៩
៣៖ សមត្ថភាពឆ្លើយតប និងព្យាបាល និងការគ្រប់គ្រងហានិភ័យដែលអាចកើតមានពីវីរុសបំប្លែងថ្មី
៤៖ ការត្រៀមខ្លួនរបស់ឧស្សាហកម្មទេសចរណ៍ ពិសេស លើការអនុវត្តន៍ SOP ... ជាអាទិភាព ការចាក់វ៉ាក់សាំង គ្រប់គ្រាន់ របស់បុគ្គលិកបម្រើការក្នុងមូលដ្ឋានអាជីវកម្ម ការយល់ដឹង ពីការអនុវត្តវិធានសុវត្ថិភាព សុខាភិបាល អនាម័យ។ល។ និងការប្រើប្រាស់បច្ចេកវិទ្យាជាដំណោះស្រាយ (Technology) ស្របតាមគន្លងប្រក្រតីភាពថ្មី។

លោករដ្ឋមន្ត្រី ក៏បានបញ្ជាក់ទៀតថា ប្រសិនបើក្នុងរដូវភ្ជំបិណ្ឌខាងមុខនេះ រដ្ឋបាលគ្រប់ថ្នាក់ មន្ទីរ ជំនាញ ប្រត្តិបត្តិករទេសចរណ៍ និងទេសចរ រួមគ្នា អនុវត្តបាននូវនីតិវិធីប្រត្តិបត្តិតាមស្តង់អប្បបរមា SOP បានល្អ ទាំងនៅតាមទីផ្សារនានា និងវត្តអារាម បានល្អនោះ ចលនាទេសចរណ៍ផ្ទៃក្នុង យើងនឹងងើបឡើងវិញល្អ ដែលនេះ ក៏គឺជាបុរេលក្ខណៈសម្រាប់ការត្រៀមបើកទទួលទេសរអន្តរជាតិ ចាក់វ៉ាក់សាំង នាពេលឆាប់ៗខាងមុខនេះផងដែរ៕