(សៀមរាប)៖ ផ្លូវក្រាលគ្រួសក្រហមប្រវែង ១៣.៥០គីឡូម៉ែត្រ ដែលជាគម្រោងថវិការរបស់ខេត្ត ស្ថិតនៅភូមិរំជៃច្រុះ ឃុំល្វឺងឬស្សី ស្រុកជីក្រែង ត្រូវបានធ្វើពិធីសម្ភោធបើកការដ្ឋាន នៅព្រឹកថ្ងៃទី១៣ ខែកុម្ភៈ ឆ្នាំ២០១៦នេះ ក្នុងអធិបតីភាពរបស់ លោក ឃឹម ប៊ុនសុង អភិបាលខេត្តសៀមរាប និងវត្តមានរបស់អស់លោក លោកស្រី ជាអភិបាលរងខេត្ត ក្រុមប្រឹក្សាស្រុក អភិបាលស្រុក លោកស្នងការនគរបាលខេត្ត ព្រះសង្ឃ តាជី យាយជី បងប្អូនប្រជាពលរដ្ឋប្រមាណជា ៥០០នាក់ផងដែរ។
លោក ពៅ ប៊ុនធឿន អភិបាលស្រុកជីក្រែង បានរាយការណ៍ថា ផ្លូវមួយខ្សែនេះមានប្រវែង១៣.៥០គីឡូម៉ែត្រ ក្រាលគ្រួសក្រហម បាប់ពីផ្លូវជាតិលេខ៦ កាត់តាមវត្តប្រហ៊ូត រហូតដល់ភូមិរំជៃច្រុះ ប្រើប្រាស់ជាប្រយោជន៍ ទូទៅសម្រាប់សាធារណៈ ពិសេសបងប្អូនប្រជាពលរដ្ឋរស់នៅក្នុងតំបន់នេះ។
លោកអភិបាលខេត្ត បានថ្លែងនៅក្នុងពិធីសម្ភោធផ្លូវនេះ ដោយបានរំលឹកឡើងវិញ អំពីជំនាន់របបកម្ពុជាប្រជាធិបតេយ្យ ប៉ុល ពត ៣ឆ្នាំ៨ខែ និង២០ថ្ងៃ និងការរំដោះជាតិមាតុភូមិ ការស្វែងរក និងរក្សានូវសុខសន្តិភាព របស់គណបក្សប្រជាជនកម្ពុជា ពិសេសក្រោមការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី នៃកម្ពុជា ដែលបានខិតខំប្រឹងប្រែងក្នុងការអភិវឌ្ឍន៍ ប្រទេសជាតិស្ទើរគ្រប់វិស័យ និងមានការរីកចម្រើនរហូតដល់បច្ចុប្បន្ននេះ។
លោកបន្ដថាក្នុងអាណត្តិទី៥នេះ ដើម្បីសម្រេចបាននូវការអភិវឌ្ឍន៍ប្រកបដោយចិរភាព និងយុត្តិធម៌ ពិសេសហេដ្ឋារចនាសម្ព័ន្ធរូបវ័ន្តនៅមូលដ្ឋាន ដែលមានជាអាទិ៍ ដូចជា សាលារៀន ផ្លូវថ្នល់ មន្ទីរពេទ្យ ប្រព័ន្ធធារាសាស្ត្រ ទឹកស្អាត បង្គន់អនាម័យ មធ្យោបាយកសិកម្ម លំនៅដ្ឋាន និងការបម្រើនូវសេវាកម្មទេសចរណ៍ ជាដើម៕
