(កំពង់ឆ្នាំង)៖ អ្នកជួញដូរ និងចែកចាយគ្រឿងញៀនចំនួន៥នាក់ និងគ្រឿងញៀនចំនួន៩កញ្ចប់ ព្រមទាំងកាំបិត និងដាវមួយចំនួនទៀត ត្រូវបានសមត្ថកិច្ច នគរបាលខេត្តកំពង់ឆ្នាំង ចុះប្រតិបត្តិការបង្ក្រាប រយៈពេល៣ថ្ងៃជាប់គ្នា និងបានបង្ហាញឲ្យអ្នកសារព័ត៌មានថតរូប នៅព្រឹកថ្ងៃទី០៣ ខែឆ្នូ ឆ្នាំ២០២០នេះ។
លោកវរសេនីយ៍ឯក ហ៊ុល វាសនា ស្នងការរងនគរបាលខេត្តកំពង់ឆ្នាំង បានឲ្យដឹងថា ដោយមានការបញ្ជារផ្ទាល់ពីឧត្តមសេនីយ៍ទោ ខូវ លី ស្នងការនគរបាលខេត្ត និងដោយមានការសម្របសម្រួលពីលោក អិត សុធា ព្រះ រាជអាជ្ញានៃអយ្យការសាលាដំបូងខេត្តកំពង់ឆ្នាំង ទើបសមត្ថកិច្ចឈានទៅដល់ ការឃាត់ខ្លួនលោក៥នាក់ ក្នុងករណីគ្រឿងញៀនខាងលើនេះ។
ករណីទី១៖ សមត្ថកិច្ចបានចុះបង្ក្រាបថ្ងៃទី៣០ ខែវិច្ឆិកា ឆ្នាំ២០២០ វេលាម៉ោង៧៖៣០នាទី នៅចំណុចភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង។ លទ្ធផល ឃាត់ខ្លួនជនសង្ស័យបាន២នាក់១៖ ឈ្មោះ រឿន មនោ ភេទប្រុស អាយុ២៦ឆ្នាំ និង២៖ ឈ្មោះ ចាន់ ផល្លា ភេទប្រុស អាយុ២៥ឆ្នាំ អ្នកទាំង២ រស់នៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង។ ក្នុងប្រតិបត្តិការនេះ សមត្ថកិច្ចដកហូតបានទូរស័ព្ទដៃ១គ្រឿង បាឡាស្មាច់១គ្រឿង និងឧបករណ៍ជក់មួយចំនួន។
ករណីទី២៖ នៅថ្ងៃទី១ ខែធ្នូ ឆ្នាំ២០២០ វេលាម៉ោង៥៖១០នាទីល្ងាច សមត្ថកិច្ចបានចុះបង្ក្រាបនៅចំណុចភូមិកំពង់ត្រឡាចក្រោម ឃុំលង្វែក ស្រុកកំពង់ត្រឡាច ករណីជួញដូរ និងប្រើប្រាស់គ្រឿងញៀន។ ដោយឃាត់ខ្លួនជនសង្ស័យបាន១នាក់ ឈ្មោះស្មាន ចិត្ត អាយុ២៦ឆ្នាំ រស់នៅភូមិវត្តពោធិ ឃុំវាំងចាស់ ស្រុកឧដ្ដុង្គ ខេត្តកំពង់ស្ពឺ។ ករណីនេះ បានដកហូតគ្រឿងញៀនបាន១កញ្ចប់ មានទម្ងន់៤.១៦ ក្រាម ទូរស័ព្ទដៃ១គ្រឿង ម៉ូតូ១គ្រឿង។
ករណីទី៣៖ សមត្ថកិច្ចបានពន្លាតដែន សមត្ថកិច្ចចុះបង្ក្រាបនៅថ្ងៃទី២ ខែធ្នូ ឆ្នាំ២០២០ នៅវេលាម៉ោង២៖២៥នាទីរសៀល នៅចំណុចភូមិប្រក់ក្តារ ឃុំវិហារល្លួង ស្រុកពញាឮ ខេត្តកណ្ដាល ករណីជួញដូរ និងប្រើប្រាស់ថ្នាំញៀន។ ដោយឃាត់ខ្លួនជនសង្ស័យ បាន២នាក់ ១៖ឈ្មោះ ស្រេង វុទ្ឋី ភេទប្រុស អាយុ៣៧ឆ្នាំ រស់នៅភូមិប្រក់ក្តារ ឃុំវិហារហ្លួង ២៖ឈ្មោះ វន វិសាល ភេទប្រុស អាយុ២៥ឆ្នាំ រស់នៅភូមិតាជាល ឃុំវាំងចាស់ ស្រុកឧត្តុង្គ ខេត្តកំពង់ស្ពឺ។ ដោយដកហូតបាន ថ្នាំញៀនបានចំនួន៨កញ្ចប់ មានទម្ងន់៦២.៧៣ក្រាម និងឧបករណ៍ប្រើប្រាស់ថ្នាំញៀនមួយចំនួន។
លោកស្នងការរង បានបញ្ជាក់ឲ្យដឹងថា ជនសង្ស័យទាំង៥នាក់ខាងលើនេះ នឹងត្រូវបញ្ជូនទៅកាន់តុលាការ នៅព្រឹកថ្ងៃទី០៣ ខែធ្នូ ឆ្នាំ២០២០នេះ។
លោកស្នងការរង ក៏បានអំពាវនាវដល់ប្រជាពលរដ្ឋ សូមចូលរួមទប់ស្កាត់គ្រឿងញៀនទាំងអស់គ្នាដោយត្រូវអនុវត្តតាមអនុសាសន៍ របស់ប្រមុខរាជរដ្ឋាភិបាលគឺ ៣កុំ និង១ រាយការណ៍។ កុំបីគឺ១៖ កុំពាក់ព័ន្ធនឹងគ្រឿងញៀន ២៖កុំអន្តរាគមន៍ និង៣៖ កុំលើកលែង ចំណែក១រាយការណ៍ គឺត្រូវរាយការណ៍ គ្រប់ករណីគ្រឿងញៀនជូនសមត្ថកិច្ច ដែលនៅក្នុងមូលដ្ឋានរបស់បងប្អូន៕
