(សេអ៊ូល)៖ រដ្ឋាភិបាលនៃប្រទេសកូរ៉េខាងត្បូង នៅថ្ងៃនេះ បានចេញសេចក្ដីប្រកាសឲ្យម្ចាស់ក្រុមហ៊ុនចំនួន ១២៤ និងពលរដ្ឋកូរ៉េខាងត្បូងទាំងអស់ ចាកចេញពីទីក្រុង Kaesong ប្រទេសកូរ៉េខាងជើង ជាបន្ទាន់ ពោលគឺរាល់ក្រុមហ៊ុនដែលមានម្ចាស់ជាជនជាតិកូរ៉េខាងត្បូង ត្រូវបិទទាំងអស់ ដែលនេះជាផ្នែកមួយនៃការដាក់ទណ្ឌកម្មសេដ្ឋកិច្ចទៅលើប្រទេសកូរ៉េខាងជើង ក្រោយពីគគ្លើនបាញ់សាកល្បងមីស៊ីលកាលពីសប្ដាហ៍មុន នេះបើយោងតាមការចេញផ្សាយរបស់ទីភ្នាក់ងារព័ត៌មានចិនស៊ិនហួ នៅថ្ងៃទី១១ ខែកុម្ភៈ។
Kaesong ជាសួនឧស្សាហកម្មសេដ្ឋកិច្ច ដែលប្រទេសកូរ៉េខាងត្បូង និងខាងជើង បានធ្វើការដោះដូរពាណិជ្ជកម្ម និងច្រកព្រំដែនសំខាន់តែមួយគត់សម្រាប់ប្រទេសទាំងពីរ ប៉ុន្តែនៅពេលនេះ រដ្ឋាភិបាលក្រុងសេអ៊ូលបានបញ្ជាឲ្យបិទរាល់អាជីវកម្មទាំងអស់ ដើម្បីដាក់ទណ្ឌកម្មដល់កូរ៉េខាងជើង។
ប៉ុន្មានថ្ងៃមុននេះ លោកស្រីប្រធានាធិបតីកូរ៉េខាងត្បូង Park Geun-hey បានទូរស័ព្ទដោយផ្ទាល់ ទៅកាន់លោកប្រធានាធិបតីសហរដ្ឋអាមេរិក Barak Obama និង លោកនាយករដ្ឋមន្ត្រីជប៉ុន Shinzo Abe ដើម្បីពិភាក្សាគ្នា រឿងទណ្ឌកម្ម ដែលត្រូវដាក់ទៅលើប្រទេសកូរ៉េខាងជើង ពីបទដែលរដ្ឋកុម្មុយនិស្តមួយនេះ បានរំលោភម្តងហើយ ម្តងទៀតទៅលើការព្រមានរបស់អន្តរជាតិ ស្តីពីការហាមមិនឲ្យបាញ់គ្រាប់រ៉ុក្កែតនោះ។
គួរបញ្ជាក់ផងដែរថា កាលពីថ្ងៃទី ០៧ ខែកុម្ភៈកន្លងទៅនេះ កូរ៉េខាងជើង បានបាញ់សាកល្បងគ្រាប់រ៉ូកែតរយៈចម្ងាយឆ្ងាយ ដោយបានធ្លាក់នៅក្បែរកោះជប៉ុន និងបានបាញ់បង្ហោះផ្កាយរណប ដោយផ្ដាយរណបនោះ ត្រូវបានក្រសួងការពារជាតិកូរ៉េខាងត្បូង ជឿជាក់ថា កំពុង គោចរនៅក្នុងគន្លងតារាវិថី ប្រកបដោយជោគជ័យ៕