(កំពត)៖ លោក សេង ទៀង ជំនួយការផ្ទាល់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២៨ ខែមករា ឆ្នាំ២០២០នេះ បានបន្ដនាំយកថវិកាសម្តេចតេជោ ហ៊ុន សែន ដែលទទួលបានពីការបរិច្ចាកពីសប្បុរសជន ទៅផ្តល់ជូនគ្រួសារសព៦នាក់ នៅខេត្តកំពត ដែលរងគ្រោះក្នុងឧបទ្ទវហេតុ បាក់រលំអគារកម្ពស់៦ជាន់ នៅខេត្តកែប កាលពីល្ងាចថ្ងៃទី០៣ ខែមករា ឆ្នាំ២០២០កន្លងទៅ។

លោក សេង ទៀង បានបញ្ជាក់ថា តាមពិតជនរងគ្រោះរស់នៅខេត្តកំពត ដែលបានស្លាប់ក្នុងឧបទ្ទវហេតុបាក់រលំអគារ នៅខេត្តកែប មានចំនួន៧នាក់ ប៉ុន្តែមានជនរងគ្រោះម្នាក់ (ប្តីស្លាប់) ត្រូវបានប្រគល់ថវិការួចហើយ នៅមន្ទីរពេទ្យលោកសង្ឃ នារាជធានីភ្នំពេញ ហើយទើបថ្ងៃនេះប្រគល់ថវិការរបស់សម្តេចតេជោ ជូនគ្រួសារសព៦នាក់បន្ថែមទៀត នៅខេត្តកំពតផ្ទាល់តែម្តង។

ក្នុងឱកាសនោះ លោក សេង ទៀង បាននាំនូវប្រសាសន៍ផ្តាំផ្ញើសាកសួរសុខទុក្ខ និងចូលរួមរំលែកទុក្ខ ចំពោះក្រុមគ្រួសារសព ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់អំពាវនាវដល់សប្បុរសជន និងគិតគូរចំពោះប្រជាពលរដ្ឋដែលរងគ្រោះ ដោយអគារបាក់រលំ។

លោក សេង ទៀង បានឲ្យដឹងថា គ្រួសារសពដែលទទួលបានថវិកាឧបត្ថម្ភនេះរួមមាន៖ គ្រួសារទី១ ដែលប្តីស្លាប់, គ្រួសារទី២ ស្លាប់ម្តាយ និងកូន (២នាក់), គ្រួសារទី៣ ស្លាប់កូនស្រី (នៅលីវ), គ្រួសារទី៤ ស្លាប់ប្រពន្ធ និងគ្រួសាទី៥ ស្លាប់ប្តី។

គួររំលឹកថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសឧបត្ថម្ភថវិកាដល់ជនរងគ្រោះ និងអ្នករងរបួសនៅក្នុងករណីបាក់រលំអគារ នៅខេត្តកែប ដោយសពជនរងគ្រោះម្នាក់ៗ ទទួលបាន៥ម៉ឺនដុល្លារ និងបន្ថែម១០លានរៀលទៀត សម្រាប់ពិធីបុណ្យសព ខណៈដែលអ្នករងរបួសម្នាក់ៗ ទទួលបានថវិកា១ម៉ឺនដុល្លារ។

ករណីបាក់រលំអគារកម្ពស់៦ជាន់ នៅក្នុងខេត្តកែប បានបណ្តាលឱ្យមនុស្សរងគ្រោះនិងបាត់បង់ជីវិតសរុប៥៩នាក់ (ស្រី២២នាក់) ក្នុងនោះបាត់បង់ជីវិតចំនួន៣៦នាក់ (ស្រី១៤នាក់) ក្នុងចំណោមជនរងគ្រោះទាំងនេះ មានក្មេងចំនួន០៦នាក់ (ក្មេងស្រី២នាក់) និងរងរបួសចំនួន២៣នាក់ (ស្រី០៨នាក់)៕