(ភ្នំពេញ)៖ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៅថ្ងៃទី១២ ខែកញ្ញា ឆ្នាំ២០១៩នេះ បានផ្ញើសារចូលរួមរំលែកទុក្ខជូន លោកស្រី ខាំ ភៀន ភរិយារបស់ព្រឹទ្ធាចារ្យ ប៊ូ ថង និងក្រុមគ្រួសារ ចំពោះមរណភាពរបស់ព្រឹទ្ធាចារ្យ ប៊ូ ថង សមាជិកគណៈអចិន្រ្តៃយ៍ នៃគណៈកម្មាធិការកណ្តាល គណបក្សប្រជាជនកម្ពុជា ឧត្តមក្រុមប្រឹក្សាផ្ទាល់ព្រះមហាក្សត្រ ក្នុងជន្មាយុ៨២ឆ្នាំ ដោយរោគាពាធ។
ក្នុងសារលិខិតរបស់សម្តេចវិបុលសេនាភក្តី សាយ ឈុំ បានចាត់ទុកថា មរណភាពរបស់ព្រឹទ្ធាចារ្យ ប៊ូ ថង គឺជាការបាត់បង់នូវស្វាមី បិតា មាតា ជាទីគោរពស្រឡាញ់ ប្រកបដោយព្រហ្មវិហារធម៌ និងជាការបាត់បង់ឥស្សរជនស្នេហាជាតិដ៏សំខាន់មួយរូប ដែលបានចូលរួមតស៊ូជាប្រវត្ថិសាស្រ្តរំដោះជាតិ មាតុភូមិ និងប្រជាជ នចេញពីរបបប្រល័យពូជសាសន៍ប៉ុលពត និងទប់ស្កាត់ការវិលត្រលប់របស់របបប៉ុលពត ខិតខំកសាង អភិវឌ្ឍន៍ប្រទេសជាតិ ពីគំនរផេះផង់។
សម្តេចវិបុលសេនាភក្តី សាយ ឈុំ បានមានប្រសាសន៍ នៅក្នុងសារចូលរួមរំលែកទុក្ខថា «ក្នុងឱ កាសដ៏សែនក្រៀមក្រំនេះ ខ្ញុំ និងភរិយា សូមចូលរួមរំលែកទុក្ខ និងសេចក្តីសោកស្តាយអាឡោះអាល័យជាទីបំផុត ជាមួយក្រុមគ្រួសារនៃសព និងសូមលើកហត្ថបួងសួងដល់វត្ថុស័ក្កសិទ្ធិ ក្នុងលោកតាមបីបាច់ថែរក្សាដល់ វិញ្ញាណក្ខន្ធ ឯកឧត្តម ប៊ូ ថង សូមបានទៅកាន់សុខ ក្នុងគតិភពកុំបីឃ្លៀងឃ្លាតឡើយ»៕
