(ត្បូងឃ្មុំ)៖ ដើម្បីជួយសម្រួលដល់ជីវភាពរបស់និស្សិតក្រីក្រ ៤០នាក់ ដែលជួបការលំបាកកំពុងស្នាក់នៅ និងសិក្សារៀនសូត្រនៅសាកលវិទ្យាល័យ ហេង សំរិន ត្បូងឃ្មុំ នាព្រឹកថ្ងៃទី១៤ ខែមិថុនា ឆ្នាំ២០១៩នេះ ព្រះសង្ឃនិមន្តមកពីវត្តមួយចំនួន ក្នុងស្រុកត្បូងឃ្មុំ និងស្រុកពញាក្រែក ខេត្តត្បូងឃ្មុំ បានឧបត្ថម្ភនូវសម្ភារសិក្សា សម្ភារផ្ទះបាយ និងថវិកាមួយចំនួនដល់ពួកគេ ដើម្បីជួយសម្រួលដល់ការលំបាក ដែលសម្ភារ និងថវិការទាំងនេះបានពីសិទ្ធាជ្រះថ្លា របស់សប្បុរសជននានា ប្រគេនដល់វត្ត កាលពីពេលកន្លងទៅ។
ពិធីចែកសម្ភារ និងថវិកា ដើម្បីសម្រួលដល់ជីវភាព ក្នុងនាមជានិស្សិតក្រីក្រខិតខំតស៊ូក្នុងការសិក្សារៀនសូត្រនេះ ធ្វើឡើងនៅសាកលវិទ្យាល័យ ហេងសំរិន ត្បូងឃ្មុំ ក្រោមវត្តមាន លោក ពិន វណ្ណារ៉ូ សកលវិទ្យាធិការនៃសាកលវិទ្យាល័យ ហេង សំរិន ត្បូងឃ្មុំ ដោយមានការអញ្ជើញ/និមន្ត និងចូលរួមពីសំណាក់ ព្រះសង្ឃ សប្បុរសជន សាស្ត្រាចារ្យ បុគ្គលិក និងសិស្សនិស្សិតនៃសាកលវិទ្យាល័យ ហេងសំរិន ត្បូងឃ្មុំ។
លើកឡើងក្នុងឱកាសនោះលោក ពិន វណ្ណារ៉ូ បានថ្លែងអំណរគុណ ដល់សប្បុរសជននានា ពិសេសព្រះតេជគុណទាំងអស់ ដែលបានប្រគេន និងនាំមកផ្តល់ជូនដោយផ្ទាល់នូវសម្ភារ:នានា និងថវិកាមួយចំនួន ជូនសិស្ស/ និស្សិត ដែលកំពុងមានជីវភាពខ្វះខាត តែមានចិត្តតស៊ូ អត់ធ្មត់សង្វាតស្រទេញក្នុងការសិក្សារៀនសូត្រ ក្រេបយកចំណេះវិជ្ជានេះ។ ដោយបានផ្តល់ជូនក្នុងនោះម្នាក់ៗ ទទួលបានសម្ភារ:សិក្សា សម្ភារ:ផ្ទះបាយ អង្ករ និងថវិការចំនួន៣ម៉ឺនរៀល ក៏ដូចជាផ្តល់នូវថវិកាមួយចំនួន ដល់សាលាផងដែរ ដើម្បីជួយទ្រទ្រង់ដល់សិស្ស/ និស្សិត មានជីវភាពខ្វះខាតជាបន្តទៀត។
លោក ពិន វណ្ណារ៉ូ បានសំណូមពរឱ្យសិស្ស/ និស្សិតទាំងអស់ដែលស្នាក់នៅ និងសិក្សារៀនសូត្រនៅទីនេះរួមគ្នា ត្រូវចេះស្រលាញ់រាប់អានគ្នា ដាស់តឿន ដឹកដៃ ណែនាំគ្នាខិតខំប្រឹងប្រែងពង្រីកចំណេះដឹង និងជៀសឱ្យឆ្ងាយនូវល្បែងស៊ីសង និងគ្រឿងញៀនគ្រប់ប្រភេទ ជាពិសេសត្រូវធ្វើខ្លួនជាកូនល្អ សិស្សល្អ ពលរដ្ឋល្អ ឱ្យសាកសមជាសសរទ្រូងប្រទេសជាតិ នាពេលអនាគត ជាងនេះទៅទៀតសិស្ស/ និស្សិតទាំងអស់ដែលកំពុងសិក្សារៀនសូត្រនៅទីនេះ ត្រូវខិតខំប្រឹងប្រែង សង្វាត ក្នុងការក្រេបយកចំណេះដឹង ដែលជាស្ពានចំលងឆ្លងដល់ត្រើយនៃអនាគតដ៍ភ្លឺស្វាង៕
