(កំពង់ចាម)៖ ព្រះមុនីសោភ័ណ បត តាំងឆេង ត្រូវបានប្រកាសតែងតាំងជាព្រះមេគណខេត្តកំពង់ចាម ក្រោយអតីតមេគណលាចាកសិក្ខាបទ។
ពិធីតែងតាំង និងស្រោចស្រពសុគន្ធវារី បានធ្វើឡើងនៅថ្ងៃទី១៣ ខែមីនា ឆ្នាំ២០១៩ នៅវត្តខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម ក្រោមអធិបតីភាព សម្ដេចព្រះសង្ឃនាយក នៃព្រះរាជាណាចក្រកម្ពុជា នន្ទ ង៉ែត និងមានការចូលរួមពីលោក ហ៊ុន ណេង អ្នកតំណាងរាស្ត្រមណ្ឌលកំពង់ចាម និងលោក គួច ចំរើន អភិបាលខេត្តកំពង់ចាម។
លោក ស្រី សុភ័ក្រ្ត ប្រធានមន្ទីរធម្មការ និងសាសនាខេត្តកំពង់ចាម បានឲ្យដឹងថា អតីតមេគណខេត្តកំពង់ចាមជំនាន់ទី៤ គឺលោក អន ធាងអាន បានលាចាកសិក្ខាបទនៅថ្ងៃទី១ ខែវិច្ឆិកា ឆ្នាំ២០១៨ ហើយរហូតមកដល់ថ្ងៃទី១៣ ខែមីនា ឆ្នាំ២០១៩ ព្រះមុនីសោភណ ប៊ត រងឆេង ព្រះរាជាគណៈថ្នាក់កិត្តិយស ត្រូវបានតំឡើងតាមឋានានុក្រម ជាព្រះនាគមុនីមេគណខេត្តកំពង់ចាមជំនាន់ទី៥។
លោក ហ៊ុន ណេង បានថ្លែងថា ព្រះពុទ្ធសាសនាបានចូលរួមចំណែកកសាងមនុស្សល្អ តាមរយៈការអប់រំសីលធម៌ និងចរិយាធម៌ ព្រះពុទ្ធសាសនាធ្វើឲ្យមនុស្សស្គាល់បុណ្យបាបអាក្រក់ល្អ អំពើណាគួរប្រព្រឹត្ត និងអំពើណាមិនគួរប្រព្រឹត្ត។
លោកថា ចំណុចនេះ បានចូលរួមយ៉ាងសកម្មក្នុងយុទ្ធសាស្រ្តចតុកោណ របស់រាជរដ្ឋាភិបាល ពិសេសគោលនយោបាយ ភូមិ-ឃុំ មានសុវត្ថិភាពតែម្ដង ព្រោះថា បើសង្គមយើងមាន មនុស្សល្អកាន់តែច្រើន នោះអំពើអបាយមុខក្នុងសង្គម ក៏នឹងកាត់បន្ថយបាន ហើយស្ថេរភាព សណ្ដាប់ធ្នាប់ក្នុងសង្គម ក៏នឹងកើតឡើងដែលជាចំណុចស្នូល នៃជ្រុងមួយយុទ្ធសាស្ត្រ ចតុកោណរបស់រាជរដ្ឋាភិបាល។
លោក ហ៊ុន ណេង បានបន្តទៀតថា តាមរយៈព្រះពុទ្ធសាសនា បានធ្វើឲ្យមនុស្សដែលស្អប់គ្នា ប្រែមករាប់អានគ្នា សាមគ្គីគ្នា ធ្វើឲ្យមនុស្សកំណាញ់ ប្រែមកចេះចែករំលែក ធ្វើឲ្យមនុស្សអស់សង្ឃឹម ប្រែមកមានសង្ឃឹម ធ្វើឲ្យមនុស្សដែលចុះចាញ់ប្រែមកតស៊ូ និយាយរួមព្រះពុទ្ធសាសនា គឺជាទីពំនឹងនៃផ្លូវចិត្ត របស់ប្រជាជនយើង៕
