(ស្វាយរៀង)៖ លោក ម៉ែន វិបុល អភិបាលខេត្តស្វាយរៀង បានលើកឡើងថា ការពិតក្មួយៗកំព្រាឪពុកម្តាយមែន តែចិត្តក្មួយៗមិនកំព្រាទេ ព្រោះក្មួយៗ មានសម្ដេចទាំងពីរ ព្រមទាំងជាអាជ្ញាធរគ្រប់លំដាប់ថ្នាក់ និងមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តស្វាយរៀង តែងតែនៅក្បែជានិច្ច ដើម្បីដោះស្រាយការលំបាក និងក្តីកង្វល់នានា ដូចជាកម្មវិធីនៅថ្ងៃនេះ ជាក់ស្ដែងត្រូវបានប្រារព្ធឡើងជារៀងរាល់ឆ្នាំ ហើយនឹងនៅតែបន្តប្រារព្ធនាឆ្នាំក្រោយៗទៀត។
ការថ្លែងបែបនេះរបស់លោកអភិបាលខេត្ត នៅក្នុងពិធីចុះជួបសំណេះសំណាល និងសួរសុខទុក្ខ ព្រមទាំងរៀបចំអាហារសាមគ្គីជូនក្មួយៗ កុមារកំព្រាដែលកំពុងស្នាក់នៅមណ្ឌលនានា ក្នុងខេត្តចំនួន១៣០នាក់ ដែលធ្វើឡើងនៅសាលប្រជុំធំសាលាខេត្តស្វាយរៀង នាព្រឹកថ្ងៃទី១៥ ខែធ្នូ ឆ្នាំ២០១៨នេះ ដែលមានការចូលរួមពីលោកស្រី ឌី សុខីទីឃាយុកោ ជាភរិយារបស់លោកហ៊ុន មានិត និងកញ្ញា ឌី សុភ័ក្របញ្ញា ព្រមទាំងក្រុមការងារផងដែរ។
លោក ម៉ែន វិបុល ក៏បាននាំនូវការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្ដេចតែងតែគិតគូរពីសុខទុក្ខ ផ្ដល់នូវភាពកក់ក្ដៅ តាមរយៈការជួយឧបត្ថម្ភទាំងសម្ភារ ថវិកា គាំទ្រ និងលើកទឹកដល់ក្មួយៗកុមារកំព្រាទាំងអស់ នៅទូទាំងប្រទេស ក៏ដូចជានៅខេត្តស្វាយរៀង។
ទន្ទឹមនេះលោកអភិបាលខេត្ត ក៏បានផ្តាំផ្ញើដល់ក្មួយទាំងអស់ ត្រូវខិតខំរៀនសូត្រ គោរពតាមការណែនាំរបស់ប្រធានមជ្ឈមណ្ឌល លោកគ្រូ អ្នកគ្រូ និងត្រូវមាន សីលធម៌ សុជីវធម៌ គុណធម៌ ដើម្បីឲ្យក្លាយជាពលរដ្ឋគំរូ ជាទំពាំងស្នងឬស្សី និងជាធនធានសម្រាប់រួមចំណែកក្នុងការអភិវឌ្ឍប្រទេសជាតិ។
នៅក្នុងឱកាសនេះ លោកស្រី ឌី សុខីទីឃាយុកោ និងក្រុមការងារ ក៏បានចែកជូននូវសម្ភារសិក្សា និងថវិកាដល់ក្មួយៗកុមារកំព្រា ចំនួន១០៦នាក់ ក្នុងម្នាក់ ទទួលបានសម្ភារសិក្សា និងឃីត១កញ្ចប់ ព្រមទាំងថវិកា៥ម៉ឺនរៀល ចំណែកអ្នកគ្រប់គ្រងមណ្ឌលម៉ែដោះ និងអ្នកបើកបរ ក្នុងម្នាក់ៗទទួលបានឃីត១កញ្ចប់ និងថវិកា៥ម៉ឺនរៀលផងដែរ៕
