(ភ្នំពេញ)៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោកស្រី ​នៅព្រឹកថ្ងៃទី១២ ខែតុលា ឆ្នាំ២០១៨ស្អែកនេះ នឹងអញ្ជើញ​ជាអធិបតីភាព ក្នុងពិធីបំបែកកំណត់ត្រាឯតទគ្គកម្ម ទូក «ង» វែងជាងគេ​លើពិភពលោក នៅតំបន់អ្នកលឿងត្រើយខាងកើត។

ទូក «ង» របស់កម្ពុជាដែលត្រៀមបំបែកឯតទគ្គកម្មនេះ ត្រូវបានប្រសិទ្ធនាមថា «កម្ពោជិកបុត្តាខេមរាតរី» ដែលមានអត្ថន័យថា «ទូកងរបស់កូនខ្មែររស់នៅក្នុងដែនដីកម្ពុជា»។

ទូកនេះ មានប្រវែងរហូតដល់៨៧.៣ម៉ែត្រ, ទទឹង១.៩៤​ម៉ែត្រ និងជម្រៅ០.៨ម៉ែត្រ ត្រូវរចនាឡើងដោយផ្នែកខាងក្បាលទូក ធ្វើជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណិត ដែលផ្ទុកបានចំណុះ រហូត​ដល់១៧៩នាក់ឯណោះ ដោយ១០០នាក់មកពីទាហានជើងទឹក និង៧៩នាក់ មកពីនគរបាលជើងទឹក។

លោក ស សុខា អនុប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការកសាងទូកងវែងជាងគេ នៅលើពិភពលោក បានថ្លែងថា ការធ្វើទូកងនេះធ្វើឡើង ​មិនមែនចង់ត្រឹមតែឲ្យវែងជាងគេ ហើយបំបែកកំណត់ត្រាពិភពលោកនោះទេ ពោលចង់ឲ្យទង់ជាតិរបស់ប្រទេសកម្ពុជា ត្រូវបានដាក់បង្ហាញ នៅក្នុងសៀវភៅ World Guinness Record ជាសាធារណៈ។

​លោក ស សុខា បានបញ្ជាក់យ៉ាងដូច្នេះថា «ទូកងនេះ យើងបានចាប់ផ្ដើមមុនដំបូង ​នៅលើក្រដាសស ហើយឈានទៅដល់ចេញជារូបរាង ​មានភាពអស្ចារ្យ ហើយគោលបំណង នៃការបង្កើតទូកងនេះធំបំផុត មិនមែនចង់ឲ្យគេឃើញវែងជាងគេ ចង់ឲ្យបំបែកកំណត់ត្រានោះទេ ប៉ុន្ដែពេលដែលយើងបើកសៀវភៅ World Guinness Record គឺឃើញទូកមកពីប្រទេសកម្ពុជារបស់យើង មានដងទង់ជាតិនៅលើសៀវភៅ»។

បើតាមលោក ស សុខា គោលបំណងផ្សេងទៀត​ការកសាងទូកនេះ ដើម្បីទាកទាញផ្នែកទេសចរណ៍ ក៏ដូចជាបង្ហាញនូវសមិទ្ធផលផ្សេងៗទៀតផងដែរ ជាក់ស្ដែងទូកងវែងជាងគេនេះ នឹងត្រូវយកមកដាក់បង្ហាញឲ្យមហាជន បានទស្សនានៅក្នុងព្រះរាជពិធីបុណ្យអុំទូក ដែលនឹងប្រព្រឹត្តទៅនៅថ្ងៃទី២១-២៣ ខែវិច្ឆិកា ឆ្នាំ២០១៨ បន្ទាប់មកនឹងយកទៅដាក់តាំង នៅមុខវាលព្រះមេនរុ រយៈពេលយ៉ាងយូរ១០ថ្ងៃ ទើបយកត្រឡប់ទៅខេត្តព្រៃវែងវិញ។

គិតចាប់តាំងពីដំណើរការសាងសង់ រហូតមកដល់លេចចេញជារូបរាងទូកជាស្ថាពរនេះ គឺមានរយៈពេលជិត៧ខែ ពោលមានចំនួន១៩២ថ្ងៃ ដោយមានទាំងថ្នាក់ដឹកនាំ មន្ដ្រីរាជការ កងកម្លាំងប្រដាប់អាវុធ និងប្រជាពលរដ្ឋទូទៅ ដែលរស់នៅជុំវិញខេត្តព្រៃវែង សមាជិក ស.ស.យ.ក សរុបចំនួន​១៤,០០០​នាក់ ​បានចូលរួមកសាង ខណៈខ្ទង់​ចំណាយអស់ថវិកាប្រមាណ៥-៦ម៉ឺនដុល្លារអាមេរិក ដោយមិនទាន់បូកបញ្ចូល លើការចំណាយផ្សេងៗ។

លោក ជា សុមេធី អភិបាលខេត្តព្រៃវែងក៏បានឲ្យដឹងថា ទូកងវែងជាងគេ នៅលើពិភពលោកនេះ មិនមែនធ្វើមកដើម្បីប្រណាំងនោះទេ ពោលគឺចង់បង្ហាញពីស្នាដៃរបស់កូនខ្មែរ ដែលបានខិតខំរួមរួបសាមគ្គីគ្នា ដែលនឹងបន្សល់ទុកនូវស្នាដៃជូនកូនខ្មែរជំនាន់ក្រោយ ដែលដូចពាក្យស្លោកបញ្ជាក់ថា «ខ្មែររួមគ្នា ខ្មែរសាមគ្គី គឺខ្មែរឈ្នះ»។

បន្ថែមពីនេះ លោក ងិន បាណាល់ អនុប្រធានគណៈកម្មការកសាងទូកងវែងជាងគេ ក៏បានគូសបញ្ជាក់ថា ទូកងនេះធ្វើចេញពីដើមគគីរចំនួន៦ដើម ដែលមាន៥ដំណរ ដោយ៣ដំណរនៅតួទូក និង២ដំណរទៀត នៅក្បាលទូក និងកន្សៃ ហើយដោយឡែកច្រវាត្រូវបានធ្វើឡើងពីឈើស្រឡៅ។

លោកអនុប្រធានរូបនេះ ក៏បានលើកឡើងថា សម្រាប់ការបំបែកកំណត់ត្រានេះ World Guinness Record បានកំណត់នូវគោលការណ៍សំខាន់ៗចំនួន៣ ដើម្បីឲ្យគណៈកម្មការបំពេញ ដោយលក្ខខណ្ឌទី១៖ សម្រាប់ទូកនាគដែលវែងជាងគេ ផ្ដោតទៅលើការរចនា របៀបផលិត និងវត្ថុធាតុដើម ដែលប្រើប្រាស់សម្រាប់ការផលិត ត្រូវទទួលបានការឯកភាពពីសហព័ន្ធទូកនាគអន្ដរជាតិ, លក្ខខណ្ឌទី២៖ គឺជាលិខិតផ្លូវការមួយ​ពីសហព័ន្ធទូកនាគអន្ដរជាតិ ដើម្បីបញ្ជាក់ថា ទូករបស់កម្ពុជាជា ទូកនាគ និងលក្ខខណ្ឌទី៣៖ ការបរិយាយលម្អិតអំពីការផលិតទូក។

ទាំងអស់នេះ ជាមោទនភាពសម្រាប់អ្នកខេត្តព្រៃវែង និយាយដោយឡែក ហើយនិយាយជារួម គឺប្រទេសកម្ពុជាតែម្ដង ដែលបានសាងសង់ទូក បំបែកកំណត់ត្រាពិភពលោក ខណៈប្រទេសចិនជាម្ចាស់កំណត់ត្រាទូកងវែងជាងគេនេះនៅលើពិភពលោក នាពេលបច្ចុប្បន្ន៕