(ភ្នំពេញ)៖ ខ្សែភាពយន្តធំៗល្បីៗ ដែលជាសមិទ្ធផលរបស់ផលិតកម្មខ្មែរមេគង្គជាច្រើន ត្រូវបានមហាជនគាំទ្រ ព្រោះពីមួយរឿងទៅមួយរឿង មានការច្នៃប្រឌិតខ្ពស់ ជាមួយនឹងឈុតឆាកដ៏គួរឲ្យចាប់អារម្មណ៍ ត្រូវចិត្តទស្សនិកជនគ្រប់ស្រទាប់។ ក្នុងឆ្នាំ២០២០ នេះ ផលិតកម្មខ្មែរមេគង្គ កំពុងធ្វើគម្រោងភាពយន្តថ្មីមួយ ក្រោយចំណងជើងថា «Dance Till You Drop» ដែលប្រែជាភាសាខ្មែរថា «រាំមិនឆ្អែតទេ»។ យ៉ាងណាមិញ គម្រោងថ្មីនេះ ត្រូវបានផ្អាកដោយសារតែកូវីដ១៩ ហើយរហូតមកទល់នឹងពេលនេះ ទោះផលិតកម្មក្នុងស្រុកមួយចំនួន បានបើកដំណើរការថតឡើងវិញក្តី តែភាពយន្ត «រាំមិនចេះឆ្អែតទេ» នៅតែមិនទាន់បន្តចាប់ផ្តើមថតឡើងវិញឡើយ ដោយសារតែហេតុផលចូលរួមទប់ស្កាត់កូវីដ១៩។
ជាការកត់សម្គាល់ រឿង «រាំមិនចេះឆ្អែតទេ» គឺជាខ្សែភាពយន្តខ្នាតធំមួយ ដែលសាច់រឿងនិយាយទាក់ទងនឹងការរាំ។ ភាពយន្តនេះ មានទីតាំងថតនៅតំបន់ទីប្រជុំជនល្បីៗ ក្នុងរាជធានីភ្នំពេញ ដូចជាតំបន់រមណីយដ្ឋានវត្តមានភ្នំជាដើម។ បន្ថែមពីនេះ មានតារាភាពយន្តល្បីៗ ជួរមុខប្រចាំប្រទេសកម្ពុជា ជាច្រើនរូបចូលរួមសម្តែង។
ទាក់ទងនឹងការផ្អាកដំណើរការថតនេះ លោក ឡូវ មីឡេន ដែលជាប្រធានផ្នែកផលិតប្រចាំផលិតកម្មខ្មែរមេគង្គ បានថ្លែងប្រាប់ភ្នាក់ងារ Fresh News ផ្នែកកំសាន្តថា តាមពិតទៅ រឿង «Dance Till You Drop» ផលិតបានប្រមាណ ៥០% ហើយ ប៉ុន្តែដោយសារតែការចូលមកនៃជំងឺកូវីដ១៩ ទើបខាងក្រុមការងារសម្រេចថាផ្អាកថតវិញ ដើម្បីការពារការឆ្លងមេរោគកូវីដ១៩នេះ។
លោកបន្ថែមថា ក្រុមការងាររបស់លោកបានសម្រេចថា នឹងចាប់ផ្តើមដំណើរការថតឡើងវិញ នៅក្នុងខែមិថុនានេះ ប៉ុន្តែដោយសារមើលឃើញថា កូវីដ១៩នៅតែជាហានិភ័យ ទើបបន្តផ្អាកការផលិតបន្ថែមទៀត។ មូលហេតុនៃការបន្តផ្អាក ស្របពេលដែលផលិតកម្មក្នុងស្រុកមួយចំនួន បានដំណើរការថតឡើងវិញជាធម្មតាហើយនោះ ត្រូវបានលោក ឡូវ មីឡេន បញ្ជាក់ថា ដោយសារតែក្នុងរឿង «Dance Till You Drop» មានការជួបជុំមនុស្សច្រើន ដើម្បីថត។ ជាពិសេស នៅត្រង់ឈុតឆាករាំ ដែលមានទីតាំងនៅវត្តភ្នំ គឺត្រូវការមនុស្សជាង ១០០នាក់ឯណោះ។ ហេតុនេះហើយ ទើបមិនអាចថតបាន។ ការបន្តផ្អាក ថតភាពយន្តនេះ គឺដើម្បីចូលរួមទប់ស្កាត់ ការរីករាលដាលកូវីដ១៩។
ប្រធានផ្នែកផលិតរូបនេះ បានសង្កត់ធ្ងន់ថា លោក និងក្រុមការងារ មិនទាន់ដឹងនៅឡើយទេថា នឹងចាប់ផ្តើមថតឡើងវិញនៅពេលណា ព្រោះចាំមើលស្ថានភាពកូវីដ១៩បន្តសិន។ ជាពិសេស ក្រុមការងារលោកអនុវត្តន៍ តាមការណែនាំរបស់រដ្ឋាភិបាល ពោលគឺពេលណាដែលរដ្ឋាភិបាលប្រកាសថា អនុញ្ញាតឲ្យជួបជុំគ្នាបានជាធម្មតាវិញ ទើបក្រុមការងារលោកបន្តផលិតភាពយន្តនេះ បន្តទៀត៕