(ហាណូយ)៖ ប្រធានាធិបតីវៀតណាម លោក Tran Dai Quang ដែលជាមេដឹកនាំលំដាប់ទីពីរ​ បន្ទាប់ពី​ប្រធានបក្សកុម្មុយនិស្តវៀត​ណាម បាន​ទទួលមរណភាពនាព្រឹកថ្ងៃសុក្រសប្តាហ៍នេះ ដោយសារជំងឺបៀតបៀន ក្នុងវ័យ៦១ឆ្នាំ។

មរណភាពរបស់លោក Quang នៅតែមិនអាចបញ្ចៀសបាន ទោះបីជាមានការខិតខំប្រឹងប្រែងអស់សមត្ថភាពយ៉ាងណាក្តី ​ពីសំណាក់​ក្រុមវេជ្ជបណ្ឌិតជាតិ និងអន្តរជាតិជំនាញៗ រួមជាមួយការយកចិត្តទុកដាក់ជាទីបំផុត​របស់​បណ្តាថ្នាក់ដឹកនាំប្រទេសក៏ដូចជា​គណបក្ស។ បើតាមការបញ្ជាក់ពីរដ្ឋាភិបាលវៀតណាម លោក Quang បានទទួលមរណភាព នៅឯមន្ទីរយោធាមួយកន្លែង ក្នុងទីក្រុង​ហាណូយ ប៉ុន្តែពុំមានការរៀបរាប់លម្អិតពីអការៈជំងឺរបស់លោកឡើយ។

ដោយឡែក បើតាមសារព័ត៌មានរដ្ឋវៀតណាម VnExpress ដែលស្រង់សម្តី​​អតីតរដ្ឋមន្រ្តីសុខាភិបាល និងជា​ប្រធានគណៈ​កម្មាធិការ​​ជាតិទទួលបន្ទុកតាមដានស្ថានភាពជំងឺរបស់ថ្នាក់ដឹកនាំវៀតណាម លោក Nguyen Quoc Trieu បានឲ្យដឹងថា លោក Quang បាន​ឆ្លង​វីរុសដ៏កាចសាហាវម៉្យាង តាំងតែពីខែកក្កដា ឆ្នាំមុនមកម្ល៉េះ ហើយធ្លាប់បានធ្វើដំណើរទៅប្រទេសជប៉ុន០៦លើកមកហើយ ដើម្បី​ទទួល​ការព្យាបាល។ លោក Trieu បានបង្ហើបឲ្យដឹងទៀតថា លោក Quang បានសន្លប់ស្តូកស្តឹងរហូត នៅប៉ុន្មានម៉ោងក្រោយ បញ្ជូនទៅ​កាន់​មន្ទីរពេទ្យយោធា១០៨ កាលពីរសៀលថ្ងៃព្រហស្បតិ៍សប្តាហ៍នេះ ជាទីដែលរូបលោកបានទទួលមរណភាព។

ខាងក្រោមនេះគឺជាជីវប្រវត្តិសង្ខេបខ្លះ របស់ប្រធានាធិបតីវៀតណាមរូបនេះ៖

*ប្រធានាធិបតីទី៨នៃ​ប្រទេសវៀតណាម៖ ពីថ្ងៃទី០២ ខែមេសា ឆ្នាំ២០១៦ រហូតដល់ ថ្ងៃទី២១ ខែកញ្ញា ឆ្នាំ២០១៨ (ថ្ងៃទទួលមរណភាព)​
*សមាជិកនៃរដ្ឋសភា៖ ពីឆ្នាំ២០១១ រហូតដល់ ឆ្នាំ២០១៨
*រដ្ឋមន្រ្តីក្រសួងសន្តិសុខសាធារណៈ៖ ពីថ្ងៃទី០៣ ខែសីហា ឆ្នាំ២០១១ រហូតដល់ ថ្ងៃទី០៨ ខែមេសា ឆ្នាំ២០១៦
*លេខានៃគណៈកម្មាធិការសន្តិសុខជាតិ៖ ពីថ្ងៃទី៣០ ខែសីហា ឆ្នាំ២០១១ រហូតដល់ ថ្ងៃទី០៤ ខែឧសភា ឆ្នាំ២០១៦
*ប្រធានគណៈកម្មាធិការអភិវឌ្ឍន៍តំបន់ខ្ពប់រាបកណ្តាល៖ ពីថ្ងៃទី០៣ ខែសីហា ឆ្នាំ២០១១ រហូតដល់ ថ្ងៃទី៣១ ខែកក្កដា ឆ្នាំ២០១៦
*ថ្ងៃខែឆ្នាំកំណើត៖ ១២ តុលា ១៩៥៦
*បក្សនយោបាយ៖ គណបក្សកុម្មុយនិស្តវៀតណាម (ចាប់ពីឆ្នាំ១៩៨១)។
*ភរិយា៖ លោកស្រី Nguyen Thi Hien

ជីវិតពីកុមារភាព៖

លោក Tran Dai Quang មានទីកំណើតនៅ​ខេត្ត​ Ninh Binh ដែលកាលពីសម័យនោះគេហៅថាសាធារណរដ្ឋប្រជាធិបតេយ្យវៀតណាម​ ឬ វៀតណាមខាងជើង នៅពេលដែលប្រទេសនេះបានបែកជាពីរ។ ឪពុករបស់លោក គឺជាអ្នកនេសាទត្រីនៅតាមដងទន្លេ រីឯម្តាយ​វិញ​មានមុខរបរជាអ្នកលក់ផ្លែចេក។ លោក Quang មានបងប្អូនសរុបទាំងអស់០៦នាក់ ក្នុងនោះប្រុស០៤នាក់។ ក្រោយមកឪពុកលោក​ក៏​បានបាត់បង់ជីវិត ហើយម្តាយរបស់លោក បានជួបទុក្ខលំបាកជាខ្លាំង ក្នុងការចិញ្ចឹមបីបាច់កូនៗទាំង០៦នាក់ ទើបបណ្តាលឲ្យលោក Quang ខិតខំជួយអ្នកម្តាយ​ក្នុងការធ្វើស្រែ។ លោក Quang ត្រូវគេស្គាល់ថា ជាមនុស្សពូកែខិតខំតស៊ូ មានការតាំងចិត្តខ្ពស់ មានស្មារតី​រឹងមាំ និងមានចិត្តត្រជាក់។

ការប្រឡូកនយោបាយ៖

លោក Tran Dai Quang ​បាន​ចូលសិក្សានៅសាលាប៉ូលិសកាលពីឆ្នាំ១៩៧២ ហើយដល់ឆ្នាំ១៩៧៥ លោក Quang បានចាប់ផ្តើម​បម្រើ​ការនៅក្នុងស្ថាប័នរដ្ឋនៃប្រទេសវៀតណាមជាបន្តបន្ទាប់។ លោក Quang បានឡើងកាន់មុខតំណែងជា រដ្ឋមន្រ្តី​សន្តិសុខ​សា​ធារ​ណៈ​ចាប់​ពីឆ្នាំ២០១១ ដល់ឆ្នាំ២០១៦ និងជាអនុប្រធាន​នៃ​គណៈកម្មាធិការទប់ស្កាត់វីរុសនិងជំងឺអេដស៍​ ពី២០១១ដល់២០១៤ ហើយលោក គឺជាសមាជិក​នៅ​ក្នុងគណៈ​កម្មា​ធិការ​​នយោបាយ​ដ៏​មានឥទ្ធិពល Poliburo នៃបក្សកុម្មុយនិស្តវៀតណាម ដោយមានឋានៈ​ក្រោម​អគ្គ​លេខា​ធិការ​បក្ស​គឺ​លោក Nguyen Phu Trong តែម្នាក់​ប៉ុណ្ណោះ​។

លោក Tran Dai Quang បានចូលរួមក្នុងបក្សកុម្មុយនិស្តវៀតណាម នៅថ្ងៃទី២៦ ខែកក្កដា ឆ្នាំ១៩៨០ និងបានក្លាយជាសមាជិក​ផ្លូវការ​នៅថ្ងៃទី២៦ ខែកក្កដា ឆ្នាំ១៩៨១ ហើយដល់ឆ្នាំ១៩៩៧ លោកបានក្លាយជាសមាជិកនៃគណៈកម្មាធិការ Politburo នៃបក្សកុម្មុយនិស្ត​វៀតណាម និងជាសមាជិកនៃគណៈកម្មាធិការមជ្ឈិមរបស់បក្ស។

កាលពីអំឡុងសមាជលើកទី១២នៃបក្សកុម្មុយនិស្តវៀតណាម នាខែមករា ឆ្នាំ២០១៦ លោក Tran Dai Quang ត្រូវបានលើកឲ្យធ្វើជា​ប្រធានាធិបតីនៃសាធារណរដ្ឋសង្គមនិយមវៀតណាម ហើយត្រូវបានទទួលស្គាល់ជាផ្លូវការនៅថ្ងៃទី០២ ខែមេសា ឆ្នាំ២០១៦ ដោយ​រដ្ឋសភានៃប្រទេសវៀតណាម។ នាថ្ងៃនោះលោក Quang បានឡើងកាន់តំណែងជំនួស​លោក Truong Tan Sang និងបានស្នើ​ឲ្យលោក Nguyen Xuan Phuc ធ្វើជាប្រមុខរដ្ឋាភិបាល ពោលគឺជានាយករដ្ឋមន្រ្តី។

គួរជម្រាបថា រយៈពេលជាង​ពីរ​ឆ្នាំមកនេះ លោក Quang បានដើរ​តួនាទីយ៉ាងសំខាន់បំផុត ក្នុងនាមជាថ្នាក់ដឹកនាំ​ជាន់ខ្ពស់មួយ​​រូប​ក្នុង​ចំណោម​បីរូប​ នៃប្រទេសវៀតណាម ដើម្បីទទួល​ស្វាគមន៍ដំណើរទស្សនកិច្ច​ របស់​ថ្នាក់ដឹកនាំកំពូលៗអន្តរជាតិ​​ មកកាន់ប្រទេស​វៀតណាម និងបានធ្វើដំណើរ​ទៅបំពេញទស្សនកិច្ច​​ នៅតាមបណ្តាប្រទេស​ជាមិត្តរបស់​វៀតណាម​ជាច្រើន ដែលជាការលើក​ស្ទួយ​មុខ​មាត់​​ប្រទេស​អាស៊ាន​មួយនេះ នៅលើ​ឆាក​អន្តរជាតិ៕