(សេអ៊ូល)៖ កូរ៉េខាងជើង​បានដោះលែងជនជាតិ​ជប៉ុនម្នាក់ ឱ្យមានសេរីភាព​ឡើងវិញ ក្រោមហេតុផល​មនុស្សធម៌ បន្ទាប់ពីរូបគេ​ត្រូវបានឃុំខ្លួនពីបទប្រព្រឹត្ត​បទល្មើសមួយ នៅអំឡុងពេល​ដើរកម្សាន្តក្នុងទីក្រុង​ព្យុងយ៉ាង។ នេះបើតាមការផ្សាយរបស់ KCNA ដកស្រង់​ដោយ​ទីភ្នាក់ងារសារព័ត៌មាន យ៉ុនហាប់ នៅរសៀលថ្ងៃចន្ទ ទី២៧ ខែសីហា ឆ្នាំ២០១៨។

យោងតាមសារព័ត៌មានរដ្ឋ​កូរ៉េខាងជើង KCNA បុរសជាភ្ញៀវទេសចរណ៍ជនជាតិ​ជប៉ុនខាងលើមាន​ឈ្មោះ តូម៉ូយូគិ ស៊ូជីម៉ូតុ (Tomoyuki Sugimoto) ត្រូវបានដោះលែង​ឱ្យមានសេរីភាពឡើងវិញ​ កាលពីល្ងាច​ថ្ងៃអាទិត្យ ប៉ុន្តែព័ត៌មានមិនបាន​បញ្ជាក់លម្អិតថា បុរសរូបនេះបាន​ប្រព្រឹត្តបទ​ល្មើសអ្វីឱ្យ​ប្រាកដ និងពេលវេលាឃុំខ្លួន​នោះឡើយ។

គួរបញ្ជាក់ថា បើតាមប្រព័ន្ធផ្សព្វផ្សាយ​ជប៉ុនលោក Tomoyuki Sugimoto មានអាយុ ៣៩ឆ្នាំ ក៏ជាអ្នកជំនាញផលិតវីដេអូ​ម្នាក់​ផងដែរ ហើយ​លោកត្រូវបាន​គេរាយការណ៍ថា ត្រូវអាជ្ញាធរកូរ៉េខាងជើង ចាប់ឃុំខ្លួន​កាលពីពាក់កណ្ដាល​ខែសីហា កន្លងទៅ៕