(ប៉េកាំង)៖ អ្នកនាំពាក្យក្រសួងការបរទេសចិន លោក ជែង ហ្ស័ង (Geng Shuang) បាននិយាយថា សេចក្ដីរាយការណ៍របស់ប្រព័ន្ធផ្សព្វផ្សាយ អាមេរិកពីការវាយប្រហារដោយអាវុធឡាស៊ែរនៅឯសមុទ្រចិនខាងកើត គឺជាព័ត៌មានប្រឌិត និងគ្មានមូលដ្ឋាន។ នេះបើតាមការចេញផ្សាយដោយសារព័ត៌មាន CGTN នៅព្រឹកថ្ងៃសៅរ៍ ទី២៣ ខែមិថុនា ឆ្នាំ២០១៨។
ប្រតិកម្មរបស់ទីក្រុងប៉េកាំង កើតមានឡើងបន្ទាប់ពីសារព័ត៌មានអាមេរិក Wall Street Journal បានឱ្យដឹងថា អាវុធឡាស៊ែរត្រូវបានគេប្រើប្រាស់ ដើម្បីវាយប្រហារលើ ពីឡុតបើកយន្តហោះចម្បាំងអាមេរិកជាង ២០លើក ចាប់ពីដើមឆ្នាំ២០១៨មក ហើយហេតុការណ៍ទាំងអស់នេះទៀតសោត កើតឡើងនៅពីលើដែនអាកាស ឬនៅក្បែរសមុទ្រចិនខាងកើត ជាពិសេសនៅតំបន់ដែលយោធាចិនកំពុងប្រតិបត្តិការ។ ប៉ុន្តែឆ្លើយតបនឹងសេចក្ដីរាយការណ៍នេះ លោក Geng Shuang បានអះអាងនៅក្នុងសន្និសីទសារព័ត៌មាននៅ ថ្ងៃសុក្រសប្ដាហ៍នេះថា «វាគឺជាព័ត៌មានប្រឌិត និងគ្មានមូលដ្ឋាន»។
គួរបញ្ជាក់ថា បើតាម Wall Street Journal អាវុធឡាស៊ែរត្រូវបានគេបាញ់ចេញពីទូកនេសាទទំនងជាកម្មសិទ្ធរបស់ចិន និងចេញពី លើដីគោកជាង ២០លើក ទៅលើពីឡុតបើកយន្ដហោះចម្បាំងអាមេរិក។ ប៉ុន្តែក្រុមមន្ត្រីអាមេរិក បានបដិសេធទទួលស្គាល់ថាយោធា ចិនជាអ្នកនៅពីក្រោយការវាយប្រហារទាំងនេះ។
យ៉ាងណាក៏ដោយ កាលពីខែឧសភា កន្លងទៅ មន្ទីរបញ្ចកោណធ្លាប់បានចោទប្រកាន់ទីក្រុងប៉េកាំងម្ដងរួចមកហើយថា បានបាញ់ ឡាស៊ែរលើពីឡុតអាមេរិក នៅក្បែរមូលដ្ឋានទ័ពចិនក្នុងប្រទេស ជីបួទី (Djibouti) ដោយបណ្ដាលឱ្យពីឡុតអាមេរិកពីរនាក់រងរបួស ហើយទីក្រុងវ៉ាស៊ីនតោនក៏បានស្នើឱ្យចិនបើកការស៊ើបអង្កេតលើករណីបាញ់អាវុធឡាស៊ែរនេះដែរ៕
