(បាងកក)៖ ប្រទេសថៃនឹងចាប់ផ្តើម ដាក់ឲ្យប្រើប្រាស់ក្រដាសប្រាក់ថ្មី ដែលមានព្រះឆាយាល័ក្ខណ៍ របស់ព្រះរាជាអង្គថ្មី គឺព្រះបាទ មហា វិច្ឆិរ៉ាឡុងកន ឬស្តេចរាមាទី ១០ នៃព្រះរាជាណាចក្រថៃ នៅពីខាងមុខសន្លឹកលុយបាត ចាប់ពីខែក្រោយតទៅ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃព្រហស្បតិ៍ ទី០៨ ខែមីនា ឆ្នាំ២០១៨។
ទេសាភិបាលនៃធនាគារជាតិថៃ លោក Veerathai Santiprabhob បានប្រកាសឲ្យដឹងនាថ្ងៃព្រហស្បតិ៍នេះថា ប្រភេទក្រដាសប្រាក់ Series 17 ដែលនឹងត្រូវចេញឲ្យប្រើប្រាស់ ក្រោមរាជានុញ្ញាតរបស់ព្រះបាទ មហា វិច្ឆិរ៉ាឡុងកន ផ្ទាល់ បង្ហាញឲ្យឃើញពីព្រះឆាយាល័ក្ខណ៍ នៃព្រះរាជាអង្គថ្មីនេះនៅពីខាងមុខ និងព្រះឆាយាល័ក្ខណ៍នៃអតីតព្រះមហាក្សត្រអង្គដទៃទៀត នៅពីខាងក្រោយ។
ក្រដាសប្រាក់ថ្មីទាំងនោះ រួមមានក្រដាស ២០បាត, ៥០បាត, និង ១០០បាត ដែលនឹងត្រូវចេញឲ្យធ្វើចរាចរណ៍លើទីផ្សារ នៅថ្ងៃទី០៦ ខែមេសាខាងមុខ ដោយវាគឺជាគម្រប់ខួប នៃការប្រសូត្ររជ្ជកាលចក្រី ដែលជារជ្ជកាលគ្រប់គ្រងសព្វថ្ងៃរបស់ប្រទេសថៃ ខណៈក្រដាសប្រាក់ ៥០០បាត និង ១,០០០បាតថ្មី នឹងត្រូវចេញឲ្យប្រើប្រាស់នៅថ្ងៃទី២៨ ខែកក្កដា ដែលជាថ្ងៃចម្រើនព្រះជន្មាយុរបស់ព្រះបាទ វិច្ឆិរ៉ាឡុងកន។
គួរជម្រាបថា បើតាមលោក Veerathai រាល់ក្រដាសប្រាក់បាតថៃទាំងអស់ នឹងនៅបន្តមានសុពលភាព និងអាចដោះដូរបានដូចធម្មតាដដែលទេ៕
