(សេអ៊ូល)៖ យន្ដហោះទម្លាក់គ្រាប់បែកអាមេរិកធុន B-1B និងយន្ដហោះចម្បាំងបំបាំងកាយ F-22 Raptor បានធ្វើសមយុទ្ធយោធាទម្លាក់គ្រាប់បែក នៅលើទឹកដីកូរ៉េខាងត្បូង ក្រោមការឃ្លាំមើលយ៉ាងយកចិត្តទុកដាក់ពីកូរ៉េខាងជើង ដែលតែងតែព្រមានចាត់វិធានការ និងចាត់ទុកថា សមយុទ្ធរបៀបនេះ គឺជាសកម្មភាពត្រៀមឈ្លានពានទីក្រុងព្យុងយ៉ាង។ នេះបើតាមយោធាកូរ៉េខាងត្បូង ដកស្រង់ដោយសារព័ត៌មាន Sputnik នៅរសៀលថ្ងៃពុធ ទី០៦ ខែធ្នូ ឆ្នាំ២០១៧។
យោងតាមយោធាកូរ៉េខាងត្បូង នៅថ្ងៃពុធនេះយន្ដហោះទម្លាក់គ្រាប់បែក B-1B និងយន្ដហោះចម្បាំង F-22 Raptor បានធ្វើសមយុទ្ធយោធាហោះហើរ និងទម្លាក់គ្រាប់បែក នៅឯមូលដ្ឋានទ័ព Pilsung ស្ថិតនៅក្នុងខេត្ត Gangwon ប្រទេសកូរ៉េខាងត្បូង ជាមួយយន្ដហោះចម្បាំងជាច្រើនទៀត នៃយោធាអាមេរិក និងកូរ៉េខាងត្បូងមានដូចជា F-35, F-16, F-15K, KF-16។
ថ្លែងនៅក្នុងសេចក្ដីថ្លែងការណ៍របស់ខ្លួន យោធាកូរ៉េខាងត្បូងបានឱ្យដឹងយ៉ាងដូច្នេះថា «តាមរយៈការធ្វើសមយុទ្ធយោធានេះ កងកម្លាំងទ័ពអាកាសកូរ៉េខាងត្បូង និងអាមេរិក បានបង្ហាញពីឆន្ទៈយ៉ាងម៉ឺងម៉ាត់ និងសមត្ថភាពយោធាប្រទេសទាំងពីរ ក្នុងការធ្វើប្រតិកម្មឆ្លើយតបភ្លាមៗ ទៅនឹងការគំរាមកំហែងពីសំណាក់អាវុធនុយក្លេអ៊ែរ និងមីស៊ីលផ្លោងរបស់ កូរ៉េខាងជើង»។
គួរបញ្ជាក់ថា សមយុទ្ធយោធារបស់យន្ដហោះទម្លាក់គ្រាប់បែកអាមេរិកធុន B-1B និងយន្ដហោះចម្បាំងបំបាំងកាយ F-22 Raptor ធ្វើឡើងនៅក្រោមក្របខណ្ឌនៃសមយុទ្ធយោធា អាកាសទ្រង់ទ្រាយធំឈ្មោះ Vigilant ACE រវាងសហរដ្ឋអាមេរិក និងកូរ៉េខាងត្បូង។ សមយុទ្ធយោធានេះបានចាប់ផ្ដើមកាលពីថ្ងៃចន្ទ និងមានរយៈពេល ០៥ថ្ងៃ ដោយមានការចូល រួមពីយោធាអាមេរិក ១២,០០០នាក់ និងយន្ដហោះចម្បាំង ២៣០គ្រឿង៕
https://s3.reutersmedia.net/resources/r/?m=02&d=20171206&t=2&i=1212563700&r=LYNXMPEDB507O&w=1280
https://s2.reutersmedia.net/resources/r/?m=02&d=20171206&t=2&i=1212563694&r=LYNXMPEDB507I&w=940
