(ឡូសអាន់ជែឡែស)៖ អវកាសយានិកអន្តរជាតិមួយក្រុម បានធ្វើការហ្វឹកហាត់ និងតេស្តឧបករណ៍អង្កេតអាចម៍ផ្កាយពិតៗមួយ ដែលមានឈ្មោះថា 2012 TC4 ដែលបណ្តោយ ១៥ម៉ែត្រ និងទទឹង ០៨ម៉ែត្រ ប្រកបដោយជោគជ័យ ជាលើកដំបូងបំផុត ដែលប្រការនេះជាក្តីសង្ឃឹមមួយ ក្នុងការការពារភពផែនដី ពីការវាយប្រហារដោយអាចម៍ផ្កាយធំៗជាងនេះ ដែលយើងអាចកំណត់បាននៅថ្ងៃអនាគត។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃអាទិត្យ ទី០៥ ខែវិច្ឆិកា ឆ្នាំ២០១៧។
ចំពោះអាចម៍ផ្កាយទំហំតូចខាងលើ ត្រូវបានក្រុមអវកាសយានិកកំណត់បាន និងយកជាវត្ថុអវកាសសម្រាប់ធ្វើការហ្វឹកហាត់ជំនាញជាក់ស្តែង ដោយសារតែវាមានចលនាកៀកនឹងផែនដីបំផុត ហើយក៏នឹងបង្កគ្រោះថ្នាក់ដល់ផែនដីផងដែរ។ បេសកកម្មដែលគេឲ្យឈ្មោះថា «ការអង្កេត TC4» ត្រូវបានបាញ់បង្ហោះកាលពីខែមេសា កន្លងទៅនេះ ដោយមានការជួយជ្រោមជ្រែងពី ការិយាល័យសម្របសម្រួលផ្នែកការពារ នៃអង្គការ NASA សហរដ្ឋអាមេរិក។
កម្មវិធីខាងលើនេះ គឺមានតួនាទីអង្កេតអាចម៍ផ្កាយ ឬវត្ថុអវកាសនានា ដែលមានទិសដៅអាចគំរាមកំហែងដល់ភពផែនដី ហើយយើងចាប់ផ្តើមប្រើឧបករណ៍អវកាស តាមដានវាតែម្តង ដើម្បីបានដឹងថា តើវានឹងអាចបុកផែនដី ឬទេ។ ការធ្វើលំហាត់ហ្វឹកហ្វឺននេះ ចាប់ផ្តើមដំបូងបំផុតកាលពីចុងខែកក្កដា នៅពេលដែលកែវយឺតមួយរបស់អឺរ៉ុប បានរកឃើញអាចម៍ផ្កាយមួយ ដែលអាចគំរាមកំហែងផែនដី ហើយនៅទីបំផុតវាត្រូវបានគេសិក្សា អំពីលទ្ធភាពជាក់ស្តែងតែម្តង ដើម្បីតេស្តប្រព័ន្ធផ្តល់សញ្ញាព្រមាន ដែលមានស្រាប់នៅលើឧបករណ៍ ដែលត្រូវបានបង្ហោះ ពេលអាចម៍ផ្កាយនោះមកកៀកនឹងផែនដីបំផុត កាលពីពាក់កណ្តាលខែតុលា ប្រកបដោយជោគជ័យ។
គួរបញ្ជាក់ថា អាចម៍ផ្កាយ 2012 TC4 បានហោះមកកៀងនឹងផែនដីបំផុត កាលពីថ្ងៃទី១២ ខែតុលា ក្នុងរយៈចម្ងាយ ៤៣,៧៨០គីឡូម៉ែត្រ ដែលវត្ថុអវកាសមួយនេះ មានរង្វិលលឿនណាស់ដែលត្រូវបានអង្កេតដោយកែវយឺតជាច្រើន នៅបណ្តាប្រទេសដូចជា អាមេរិក កាណាដា កូឡុំប៊ី អាល្លឺម៉ង់ អ៊ីស្រាអែល ជប៉ុន ហូឡង់ រុស្ស៊ី និងអាហ្វ្រិកខាងត្បូង។ ការអង្កេតអំពីលទ្ធភាពបង្កគ្រោះថ្នាក់របស់អាចម៍ផ្កាយនានា ដោយឧបករណ៍របស់ NASA ខាងលើនេះ គឺជាជោគជ័យមួយ ឆ្ពោះទៅរកការសិក្សា និងអង្កេតអាចម៍ផ្កាយផ្សេងៗ ទាំងតូចទាំងធំ ដែលមានទិសដៅមកកៀកផែនដី៕
https://img.purch.com/h/1000/aHR0cDovL3d3dy5zcGFjZS5jb20vaW1hZ2VzL2kvMDAwLzA0Ni8xMDMvb3JpZ2luYWwvTmVvLUFsYW15LXZpYS1uZW9zaGVpbGQuanBn
