(ពិភពលោក)៖ នៅថ្ងៃពុធ ទី១៣ ខែកញ្ញា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោក ដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ ទល់ពេលនេះមនុស្សសរុបចំនួន១៧នាក់ហើយ បានបាត់បង់ជីវិតនៅសហរដ្ឋអាមេរិក បន្ទាប់ពីព្យុះហឺរីខិន Irma បានបោកបក់ពីតំបន់ការីបៀន សង្រ្គប់មកលើបណ្តារដ្ឋភាគអាគ្នេយ៍ របស់អាមេរិក ក្នុងអំឡុងពេលចុងសប្តាហ៍កន្លងទៅ៕
២៖ អតីតប្រធានសភាលោកស្រី ហាលីម៉ាហ៍ រ៉ាកូប (Halimah Yacob) ត្រូវបានប្រកាសតែងតាំងជាប្រធានាធិបតីសិង្ហបុរីស្ត្រីដំបូងគេបំផុតក្នុងប្រវត្តិសាស្ត្រ៕
៣៖ ប្រធានាធិបតីអាមេរិក លោក ដូណាល់ ត្រាំ បានជួបជាមួយនាយករដ្ឋមន្រ្តីម៉ាឡេស៊ី លោក ណាជីប រ៉ាហ្សាក់ (Najib Razak) នៅឯសេតវិមាននៃរដ្ឋធានីវ៉ាស៊ីនតោននិងហុចដៃស្វាគមន៍ កិច្ចព្រមព្រៀងពាណិជ្ជកម្ម ក៏ដូចជាការបណ្តាក់ទុនវិនិយោគជាច្រើនថែមទៀតពីសំណាក់ប្រជាជាតិអាស៊ានមួយនេះ៕
៤៖ ប្រធានក្រុមប្រឹក្សារដ្ឋមីយ៉ាន់ម៉ា លោកស្រី អោងសាន ស៊ូជី បានសម្រេចលុបចោលគម្រោងចូលរួម និងថ្លែងសុន្ទរកថារបស់លោកស្រី នៅឯមហាសន្និបាតនៃអង្គការសហប្រជាជាតិ (UNGA) លើកទី៧២ក្នុងខែនេះ ដោយសារតែនៅជាប់ដៃជាប់ជើង នឹងបញ្ហារវាងជនជាតិភាគតិចរ៉ូហ៊ីងយ៉ា៕
៥៖ ប្រជាជនប្រមាណជាង ២០០,០០០នាក់ ត្រូវបានប្រកាសឲ្យជម្លៀសចេញពីខេត្ត ហ្វ៊ូជាន (Fujian) និង ហ្សេជាំង (Zhejiang) ភាគអាគ្នេយ៍ប្រទេសចិនដើម្បីគេចេញពីចង្កូមនៃព្យុះ ទីហ្វុង តាលីម (Talim) ដែលត្រូវជាព្យុះទី ១៨ នឹងវាយលុកតំបន់ភាគអាគ្នេយ៍ចិន នៅក្នុងឆ្នាំ២០១៧៕
៦៖ អាជ្ញាធរខេត្ត Quang Ninh ភាគខាងជើង រហូតដល់ខេត្ត Khanh Hoa ភាគកណ្តាលប្រទេសវៀតណាម នាថ្ងៃស្អែកនឹងធ្វើការហាមឃាត់ កប៉ាល់-នាវាផ្សេងៗ មិនឲ្យចេញដំណើរទៅកាន់ផ្ទៃសមុទ្រនោះឡើយ ដើម្បីចៀសពីព្យុះទីហ្វុងដ៏ខ្លាំងក្លាមួយ ដែលកំពុងឆ្ពោះមករកប្រជាជាតិអាស៊ីអាគ្នេយ៍មួយនេះ៕
៧៖ ផ្ទុះ-ឆេះរថយន្ដក្រុង ក្នុងខេត្តសានទុងប្រទេសចិន បង្កឲ្យក្មេងៗមត្តេយ្យកូរ៉េខាងត្បូងនិងចិនសរុបចំនួន១១នាក់ស្លាប់៕
