(ពិភពលោក)៖ នៅថ្ងៃព្រហស្បតិ៍ ទី២៧ ខែមេសា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗជាច្រើនបានកើតឡើង។ ចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះសូមទស្សនាដូចខាងក្រោម៖
១៖ កងទ័ពអ៊ីស្រាអែល នៅថ្ងៃព្រហស្បតិ៍នេះ បានដឹកនាំការវាយប្រហារតាមផ្លូវអាកាសលើឃ្លំាងស្ដុកអាវុធ របស់ក្រុមឧទ្ទាមហេសប៊ូលឡា នៅក្បែរ អាកាសយានដ្ឋានទីក្រុងដាម៉ាស់ ប្រទេសស៊ីរី។ ក៏ប៉ុន្តែ នេះមិនមែនជាលើកទីមួយទេ ដែលអ៊ីស្រាអែល វាយប្រហារតាមផ្លូវអាកាសនៅស៊ីរី ពោលគឺបើ ទោះជាធ្លាប់អះអាងពីនយោបាយអព្យាក្រឹតក៏ដោយ ក៏ទីក្រុងតែលអាវីវ ម្ដងម្កាល តែងតែដឹកនាំការវាយប្រហារនៅស៊ីរី ដើម្បីកម្ទេចឃ្លាំងស្ដុកអាវុធឬក្បួន រថយន្ដដឹកអាវុធឱ្យក្រុមឧទ្ទាមហេសប៊ូលឡា ដែលជាសត្រូវស៊ូពូជរបស់ខ្លួន៕
២៖ ប្រឈមមុខនឹងការគំរាមកំហែងពីកូរ៉េខាងជើង សហរដ្ឋអាមេរិក និងកូរ៉េខាងត្បូង កាន់តែប្រញាប់ញាល ក្នុងការដាក់ឱ្យដំណើរការប្រព័ន្ធខែលការពារ មីស៊ីល THAAD បើទោះជាចិន និងរុស្ស៊ីបានសម្ដែងការជំទាស់យ៉ាងខ្លាំង ក្រោមហេតុផលសន្តិសុខជាតិក៏ដោយ។ បើតាមទីក្រុងសេអ៊ូល THAAD នឹង ត្រូវដាក់ឱ្យដំណើរយ៉ាងពិតប្រាកដ នាពេលដ៏ខ្លីខាងមុខនេះ៕
៣៖ បន្ទាប់ពីផ្ទុះហេតុការណ៍អូសទាញអ្នកដំណើរម្នាក់ទាំងកម្រោល ចេញពីលើយន្តហោះ ដែលបានធ្វើឲ្យកក្រើកបណ្តាញទំនាក់ទំនងសង្គម នាពេលថ្មី ៗនេះ នៅទីបំផុតក្រុមហ៊ុនអាកាសចរណ៍អាមេរិក United Airlines បានសម្រេចផ្លាស់ប្តូរគោលការណ៍មួយចំនួនរបស់ខ្លួន ហើយថែមទាំងបានប្រកាសថា នឹងផ្តល់ប្រាក់រហូតដល់ទៅ ១០,០០០ដុល្លារ សម្រាប់អ្នកដំណើរណា ដែលស្ម័គ្រចិត្តផ្តល់កន្លែងអង្គុយ នៅក្នុងករណីចំាបាច់ តម្រូវឱ្យផ្ដល់ដល់បុគ្គលិក របស់ខ្លួន៕
៤៖ ខណៈកំពុងមានភាពតានតឹងនិងដើម្បីកំញើញកូរ៉េខាងជើង កងទ័ពជើងអាកាសរបស់សហរដ្ឋអាមេរិក បានធ្វើតេស្តសាកល្បងដោយជោគជ័យប្រព័ន្ធ មីស៊ីលផ្លោងអន្តរទ្វីប (ឆ្លងទ្វីប) Minuteman III ដែលមានបំពាក់នូវក្បាលគ្រាប់នុយក្លេអ៊ែរ ដោយវាអាចហោះទៅកាន់គោលដៅបានចម្ងាយ ៦,៧៦០គីឡូម៉ែត្រ៕
៥៖កងកម្លាំងគាំទ្ររដ្ឋាភិបាលអ៊ីរ៉ាក់ Hashd Shaabi ឬហៅថា «ចលនាប្រជាជន» បានវាយដណ្ដើមយកទីក្រុងបុរាណ Hatra ស្ថិតនៅតំបន់វាយខ្សាច់នៃ ភាគអាគ្នេយ៍ទីក្រុងម៉ូស៊ុលពីពួក ISIS មកវិញ បន្ទាប់ពីការវាយប្រយុទ្ធគ្នាអស់រយៈពេលជាច្រើនម៉ោងកាលពីថ្ងៃពុធ៕
៦៖ ខណៈសហរដ្ឋអាមេរិក កំពុងបន្តដើរតាមគន្លងយុទ្ធសាស្ត្រ គ្រប់គ្រងពិភពលោកទំាងមូល តាមរយៈការអភិវឌ្ឍ និងដាក់ពង្រាយប្រព័ន្ធខែលការពារ មីស៊ីលនៅអឺរ៉ុបនិងតំបន់អាស៊ីប៉ាស៊ីហ្វិក មេបញ្ជាការយោធារុស្ស៊ីលោក Viktor Poznikhir បានព្រមានទុកមុនថា រុស្ស៊ីគួរតែត្រៀមខ្លួនទប់ទល់ការវាយ ប្រហារនុយក្លេអ៊ែរ របស់សហរដ្ឋអាមេរិក នៅថ្ងៃណាមួយ៕
