(ឡុងដ៍)៖ នៅមុននេះបន្តិចយោងតាមសារព័ត៌មាន BBC ចេញផ្សាយបានឲ្យដឹងថា ក្រុមឧទ្ទាម ISIS ប្រកាសថា ជាអ្នករៀបចំផែនការវាយប្រហារ ភេរវកម្មនៅមុខរដ្ឋសភា របស់ប្រទេសអង់គ្លេស។
នៅក្នុងកិច្ចប្រជុំសភាដ៏បន្ទាន់មួយរបស់ចក្រភពអង់គ្លេស ដើម្បីឆ្លើយតបទៅនឹងការវាយប្រហារដោយអំពើភេរវកម្មដ៏កក្រើកទីក្រុងឡុងដ៍នោះ នាយករដ្ឋមន្ត្រីអង់គ្លេសស្រី Theresa May បានប្រាប់សមាជិកសភាទាំងអស់ថា «យើងមិនភ័យខ្លាចនោះឡើយ» ចំពោះអំពើភេរវកម្ម ខណៈលោកស្រីក៏បានអះអាងទៀតថា ភេរវករមួយរូបនោះគឺជាអ្នកដែលចាប់កំណើតនៅចក្រភពអង់គ្លេសផ្ទាល់តែម្តង។ នេះបើតាមសារព័ត៌មាន BBC ចេញផ្សាយនាល្ងាចថ្ងៃព្រហស្បតិ៍ ទី២៣ ខែមីនា ឆ្នាំ២០១៧។
នៅក្នុងចំណោមជនរងគ្រោះទាំង០៥ខាងលើ មានប៉ូលិសម្នាក់ឈ្មោះ Keith Palmer អាយុ៤៨ឆ្នាំរួមទាំងភេរវករម្នាក់ផងដែរ ហើយការវាយប្រហារនេះកើតឡើងតែប៉ុន្មានថ្ងៃប៉ុណ្ណោះ ក្រោយអង់គ្លេសហាមឃាត់អ្នកដំណើរមកពីអាកាសយានដ្ឋាន នៃបណ្ដាប្រទេសមជ្ឈិមបូព៌ាមួយចំនួន នំាយកគ្រឿងអេឡិចត្រូនិច មានទំហំធំជាងទូរស័ព្ទឡើងលើយន្ដហោះ។
លោក Mark Rowley ប្រធានទីភ្នាក់ងារប្រឆាំងភេរវកម្មរបស់អង់គ្លេសបាននិយាយថា ប៉ូលិសបានកំណត់ជនសង្ស័យជាច្រើននាក់ ដោយជនសង្ស័យដែលត្រូវបានចាប់ខ្លួនមានចំនួន ០៧នាក់ជាជនចំរុះជាតិសាសន៍ក្នុងនោះមានទាំងស្រីអាយុខ្ទង់៤០ឆ្នាំ និងបុរសវ័យខ្ទង់ ៥០ឆ្នាំផងដែរដើម្បីរង់ចាំការសួរចម្លើយ។ សម្រាប់អ្នករងរបួសទាំង៤០នាក់នៅក្នុងអំពើភេរវកម្មនោះ គឺមាន០៧នាក់កំពុងសម្រាកព្យាបាលនៅមន្ទីរពេទ្យនៅឡើយ ដោយសារមានស្ថានភាពធ្ងន់ធ្ងរ។
យោងតាមប៉ូលិសអង់គ្លេស បុរសម្នាក់បានដឹកនាំសកម្មភាពវាយប្រហារភេរវកម្មតែម្នាក់ឯង ដោយដំបូងឡើយរូបគេបានបើករថយន្ដបំបុកសម្លាប់មនុស្ស០២នាក់ និងជាច្រើននាក់ទៀតរងរបួស នៅឯស្ពាន Westminster Bridge ស្ថិតនៅក្បែរសភាក្នុងទីក្រុងឡុងដ៏។ បន្ទាប់មកបុរសនេះដដែល បានចុះពីលើរថយន្ដរត់តម្រង់ទៅកាន់សភា ហើយបានចាក់សម្លាប់ប៉ូលិសម្នាក់ មុនត្រូវបានប៉ូលិសដទៃបាញ់សម្លាប់ ខណៈប៉ូលិសអង់គ្លេសមិនទាន់បានបញ្ជាក់ពីអត្តសញ្ញាណ ភេរវកររូបនេះនៅឡើយទេ៕
