(ឡុងដ៏)៖ ប៉ូលិសអង់គ្លេសបានឱ្យដឹងថា មនុស្ស០៥នាក់បានស្លាប់ និង៤០នាក់ផ្សេងទៀត បានរងរបួសនៅក្នុងការវាយប្រហារ ភេរវកម្មក្នុងសង្កាត់ Westminster និងនៅបរិវេណសភា ក្នុងទីក្រុងឡុងដ៏កាលពីថ្ងៃពុធ។ ព្រមពេលជាមួយគ្នាប៉ូលិសអង់គ្លេស ក៏បានបញ្ជាក់ដែរថា ភេរវករមិនមែនមានបំណងត្រឹមតែការសម្លាប់នោះទេ តែពួកគេចង់បង្កការភ័យខ្លាច និងបង្កចលាចល ខណៈការវាយប្រហារនេះត្រូវបានគេសន្និដ្ឋានថា មានការត្រៀមទុកជាមុនយូរមកហើយ។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃព្រហស្បតិ៍ ទី២៣ ខែមីនា ឆ្នាំ២០១៧។
យោងតាមប៉ូលិសអង់គ្លេស បុរសម្នាក់បានដឹកនាំសកម្មភាពវាយប្រហារភេរវកម្មតែម្នាក់ឯង ដោយដំបូងឡើយរូបគេបានបើករថយន្ដបំបុកសម្លាប់មនុស្ស០២នាក់ និងជាច្រើននាក់ទៀតរងរបួស នៅឯស្ពាន Westminster Bridge ស្ថិតនៅក្បែរសភាក្នុងទីក្រុងឡុងដ៏។ បន្ទាប់មកបុរសនេះដដែល បានចុះពីលើរថយន្ដរត់តម្រង់ទៅកាន់សភា ហើយបានចាក់សម្លាប់ប៉ូលិសម្នាក់ មុនត្រូវបានប៉ូលិសដទៃបាញ់សម្លាប់ ខណៈប៉ូលិសអង់គ្លេសមិនទាន់បានបញ្ជាក់ពីអត្តសញ្ញាណ ភេរវកររូបនេះនៅឡើយទេ។
គួរបញ្ជាក់ថានៅក្នុងចំណោមជនរងគ្រោះទាំង០៥ខាងលើ មានប៉ូលិសម្នាក់ឈ្មោះ Keith Palmer អាយុ៤៨ឆ្នាំរួមទាំងភេរវករម្នាក់ផងដែរ ហើយការវាយប្រហារនេះកើតឡើងតែប៉ុន្មានថ្ងៃប៉ុណ្ណោះ ក្រោយអង់គ្លេសហាមឃាត់អ្នកដំណើរមកពីអាកាសយានដ្ឋាន នៃបណ្ដាប្រទេសមជ្ឈិមបូព៌ាមួយចំនួន នំាយកគ្រឿងអេឡិចត្រូនិច មានទំហំធំជាងទូរស័ព្ទឡើងលើយន្ដហោះ៕
