(សេអ៊ូល)៖ កូរ៉េខាងជើងបានបាញ់សាកល្បងមីស៊ីលផ្លោងចំនួន០៤គ្រាប់ នៅព្រឹកថ្ងៃចន្ទនេះ ហើយក្នុងចំណោមមីស៊ីលទំាងនេះមាន ០៣គ្រាប់បានធ្លាក់ចូលក្នុងតំបន់ដែនទឹកសេដ្ឋកិច្ចផ្ដាច់មុខរបស់ជប៉ុន នៅឯសមុទ្រខាងកើត។ នេះបើតាមនាយករដ្ឋមន្ត្រីជប៉ុនលោក ស៊ីនហ្សូ អាបេ ដកស្រង់ដោយសារព័ត៌មាន Channel News Asia នៅព្រឹកថ្ងៃចន្ទ ទី០៦ ខែមីនា ឆ្នាំ២០១៧។
ការបាញ់សាកល្បងមីស៊ីលរបស់កូរ៉េខាងជើង ទំនងជាធ្វើឡើងនៅក្នុងគោលបំណងសម្ដែងការជំទាស់ទៅនឹង ការធ្វើសមយុទ្ធទ្រង់ទ្រាយធំរវាងសហរដ្ឋអាមេរិក និងកូរ៉េខាងត្បូង។ ដោយឡែកជុំវិញបញ្ហានេះដែរ យោធាកូរ៉េខាងត្បូង ក៏បានឱ្យដឹងដែរថាទីក្រុងព្យុងយ៉ាងបានបាញ់មីស៊ីលជាច្រើនគ្រាប់នៅម៉ោង ៧៖៣៦នាទីព្រឹកចេញពីតំបន់ Tongchang-ri នៃខេត្ត Pyongan ខាងជើងឆ្ពោះទៅកាន់តំបន់សមុទ្រជប៉ុន ឬសមុទ្រខាងកើត ដោយគ្រាប់មីស៊ីលទំាងអស់នេះអាចហោះបានចំងាយប្រមាណ១,០០០គីឡូម៉ែត្រឯណោះ។
គួរបញ្ជាក់ថានាយរដ្ឋមន្ត្រីជប៉ុនបានថ្កោលទោសយ៉ាងខ្លំាង ចំពោះការបាញ់សាកល្បងមីស៊ីលពីសំណាក់ទីក្រុងព្យុងយ៉ាង និងបានចាត់ទុកថាវាគឺការគំរាមកំហែង ដ៏ធ្ងន់ធ្ងរដល់សន្តិភាព និងស្ថេរភាពនៅក្នុងតំបន់ ខណៈទីក្រុងសេអ៊ូល និងវ៉ាស៊ីនតោនកំពុងវិភាគលើប្រភេទគ្រាប់មីស៊ីល ក៏ដូចជាភាពជោគជ័យរបស់កូរ៉េខាងជើង៕
