(ម៉ានីល)៖ កម្មករម្នាក់នៅលើទូកវៀតណាមបានស្លាប់ និង០៧អ្នកត្រូវបានចាប់ជម្រិតដោយចោរសមុទ្រដែលត្រូវបានអាជ្ញាធរហ្វីលីពីនសង្ស័យថា ជាទង្វើរបស់ក្រុមសកម្មប្រយុទ្ធអ៊ីស្លាមស្ថិតនៅដែនសមុទ្រសូលូ ចម្ងាយជាង២០គីឡូម៉ែត្រក្បែរកោះ Baguan នៃភាគខាងត្បូងប្រទេសហ្វីលីពីន។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃចន្ទ ទី២០ ខែកុម្ភៈ ឆ្នាំ២០១៧។
ហេតុការណ៍ខាងលើនេះបានកើតឡើងនៅយប់ថ្ងៃអាទិត្យ ដោយឆ្មាំការពារដែនសមុទ្រហ្វីលីពីនបានទទួលសារពីកងល្បាតដែនសមុទ្រវៀតណាមនៅយប់ថ្ងៃអាទិត្យ ដើម្បីឲ្យចាត់ទូកល្បឿនលឿនចំនួនពីរគ្រឿងនិងកងល្បាតដែនសមុទ្រមួយចំនួនទៅកាន់តំបន់កើតហេតុខាងលើនេះ។ ជាលទ្ធផលជនជាតិវៀតណាម ១៧នាក់ត្រូវបានជួយសង្គ្រោះ ខណៈម្នាក់ស្លាប់ និង០៧នាក់ផ្សេងទៀតត្រូវបានចាប់ជម្រិត។
រហូតមកដល់ពេលនេះពុំទាន់មានព័ត៌មានបន្ថែមពីជន ដែលត្រូវបានចាប់ជម្រិតនោះឡើយ ប៉ុន្តែអាជ្ញាធរហ្វីលីពីនបានដាក់ការសង្ស័យលើក្រុមឧទ្ទាមអាប៊ូសាយយ៉ាហ្វ ដែលនៅពីក្រោយពួកសកម្មប្រយុទ្ធអ៊ីស្លាម មានមូលដ្ឋាននៅតំបន់កោះ Basilan ដ៏ដាច់ស្រយាលនៅភាគខាងត្បូងហ្វីលីពីន។ សកម្មភាពចោរសមុទ្របានកក្រើកឡើងវិញជាខ្លាំងក្រោយពី ហ្វីលីពីន, ម៉ាឡេស៊ី, និងឥណ្ឌូណេស៊ីសម្រេចចិត្តផ្អាកកិច្ចព្រមព្រៀងស្តីពីការទប់ស្កាត់ចោរសមុទ្រនៅតាមព្រំដែន៕
