(លីម៉ា)៖ តុលាការប៉េរូបានចេញដីកាបណ្ដោះអសន្នមួយ បង្គាប់ឱ្យចាប់ខ្លួនអតីតប្រធានាធិបតី លោក Alejandro Toledo ពីបទប្រព្រឹត្តអំពើពុករលួយ។ ក៏ប៉ុន្តែក្នុងពេលបច្ចុប្បន្ន អាជ្ញាធរពុំទាន់អាចកំណត់ទីតាំងជាក់លាក់ដែលលោក Toledo ស្នាក់នៅនោះទេ ខណៈមានសេចក្ដីរាយការណ៍ថា លោកបានធ្វើដំណើរទៅកាន់ប្រទេសបារាំងនារយៈពេលប៉ុន្មានថ្ងៃចុងក្រោយនេះ។ នេះបើតាមការចេញផ្សាយដោយទីភ្នាក់ងារសារព័ត៌មានចិនស៊ិនហួរ នៅរសៀលថ្ងៃសុក្រ ទី១០ ខែកុម្ភៈ ឆ្នាំ២០១៧។
ចៅក្រមលោក Richard Concepcion Carhuancho បានចេញដីកាឃាត់ខ្លួនថ្នាក់ជាតិ និងអន្តរជាតិ ប្រឆាំងនឹងលោក Toledo និងបានអំពាវនាវឱ្យកំណត់ទីតាំងស្នាក់ នៅរបស់លោកនៅឯបរទេសឱ្យបានឆាប់រហ័ស។ ជាងនេះទៅទៀតលោកចៅក្រម ក៏បានសម្រេចចេញដីកាឃុំខ្លួនជាបណ្ដោះអាសន្ន អតីតប្រធានាធិបតីរូបនេះចំនួន ១៨ខែ ផងដែរពីបទពុករលួយ និងរំលោភអំណាច។
គួរបញ្ជាក់ថា លោក Alejandro Toledo ធ្លាប់កាន់តំណែងជាប្រធានាធិបតីប៉េរូ ពីឆ្នាំ២០០១ ដល់ឆ្នាំ២០០៦ ត្រូវបានគេចោទប្រកាន់ថា មានជាប់ពាក់ព័ន្ធនឹងអំពើពុករលួយក្នុងទឹកប្រាក់ជាង ២០លានដុល្លារ ក្នុងសំណុំរឿងគំរោងសាងសង់ផ្លូវ Highway តភ្ជាប់ពីប្រទេសប៉េរូទៅកាន់ប្រទេសប្រេស៊ីល ក្រោមការដឹកនាំគំរោងដោយក្រុមហ៊ុន Odebrecht និងក្រុមហ៊ុនសំណង់ប្រេស៊ីលមួយចំនួន៕
