(តេហេរ៉ង់)៖ អគ្គមគ្គុទេស​កំពូលអ៊ីរ៉ង់ លោក Ayatollah Ali Khamenei នៅថ្ងៃអង្គារ​បាននិយាយថា អ្វីដែល​ប្រធានាធិបតី​អាមេរិក​លោក ដូណាល់ ​ត្រាំ កំពុងធ្វើ​ជាការបង្ហាញពី​មុខពិត​របស់​សហរដ្ឋអាមេរិក ខណៈការពិត​នៃសិទ្ធិមនុស្ស​នៅក្នុងប្រទេស​មួយនេះ នោះគឺជាការ​ដាក់ខ្នោះដៃសូម្បី​តែក្មេង​អាយុ០៥ឆ្នាំ។ នេះបើតាមការ​ចេញផ្សាយ​ដោយ​សារព័ត៌មាន Sputnik​ នៅព្រឹកថ្ងៃ​ពុធ ទី០៨ ខែកុម្ភៈ ឆ្នាំ២០១៧។

ថ្លែងនៅក្នុងសុន្ទរកថាមួយ​ចំពោះមុខយោធា នៅឯទីក្រុងតេហរ៉ង់ លោក Ali Khamenei បានគូសបញ្ជាក់ថា «យើងអរគុណ​សុភាពបុរស​រូបនេះ (លោក ត្រំា) ពីព្រោះគាត់​បានធ្វើឱ្យយើង​ស្គាល់មុខពិត​របស់​សហរដ្ឋអាមេរិក ដូចដែលយើងធ្លាប់លើកឡើងអស់រយៈពេលជាង៣០ឆ្នាំមកនេះ ស្ដីពីនយោបាយពុករលួយ សេដ្ឋកិច្ច ​សីលធម៌ និងសង្គម នៅក្នុងរង្វង់អំណាចសហរដ្ឋអាមេរិក។ សុភាពបុរសម្នាក់នេះបានបកស្បែក​មុខ​​ពិតសហរដ្ឋអាមេរិក នៅអំឡុងនិងក្រោយយុទ្ធការ​ឃោសនាបោះឆ្នោត ហើយលើសពីនេះទៅទៀត អ្វីដែលគាត់​កំពុងធ្វើក្នុង​ពេលបច្ចុប្បន្ន គឺបានបង្ហាញ​ពីការពិតរបស់​សហរដ្ឋអាមេរិកការពិតនៃ​សិទ្ធិមនុស្ស​ដែល​ពួកគេដាក់ខ្នោះដៃសូម្បីតែក្មេងអាយុ០៥ឆ្នាំ »
 
គួរបញ្ជាក់ថាភាពតានតឹង ​និងសង្រ្គាមពាក្យសម្ដីរវាងអ៊ីរ៉ង់ និងសហរដ្ឋអាមេរិក​ បានចាប់កក្រើក​​ឡើងវិញ ក្រោយពេល​​រដ្ឋបាលលោក​ ដូណាល់ ត្រាំ បានដាក់ចេញបញ្ជា​ប្រធានាធិបតី​ហាមឃាត់​​ប្រជាជនអ៊ីរ៉ង់ និងប្រជាជន​​មកពី​បណ្ដា​ប្រទេស​មូស្លីម​ចំនួន០៦ ផ្សេងទៀត​មិនឱ្យ​ចូល​សហរដ្ឋអាមេរិក ព្រមទាំង​​ការបាញ់សាកល្បងមីស៊ីលផ្លោង​ពីសំណាក់​ទីក្រុង​តេហេរ៉ង់ កាលពីថ្ងៃទី២៩ ខែមករា។ បន្ថែមពី​លើនេះ ប្រទេសទំាងពីរ​​រឹតតែមើលមុខគ្នា​លែងចំ​​ បន្ទាប់ពីរដ្ឋមន្ត្រី​ការពារជាតិ​​អាមេរិក លោក ​James Mattis បាននិយាយជា​​សាធារណៈថា អ៊ីរ៉ង់ជា​រដ្ឋគំាទ្រ​ក្រុមភេរវករ​នៅអំឡុង​ដំណើរ​​ទស្សនកិច្ច​ក្នុង​ប្រទេសជប៉ុន កាលពីថ្ងៃសៅរ៍​​កន្លងទៅ៕