(បាងកក)៖ រថយន្តមួយគ្រឿងបានផ្ទុះឆាបឆេះឡើងយ៉ាងសន្ធោសន្ធៅ បន្ទាប់ពីបានបោះពួយទៅបុកដើមឈើមួយដើមនៅភាគកណ្តាលឈាងខាងត្បូងប្រទេសថៃ ហើយបានបណ្តាលឲ្យមនុស្សចំនួន ០៥នាក់បាត់បង់ជីវិត។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាល្ងាចថ្ងៃអង្គារ ទី០៣ ខែមករា ឆ្នាំ២០១៧។
ប្រភពដដែលបានឲ្យដឹងទៀតថា គ្រោះថ្នាក់ចរាចរណ៍ខាងលើបានកើតឡើងនាវេលាព្រឹកថ្ងៃអង្គារនេះ នៅពេលដែលរថយន្តស៊េរី Mercedes-Benz ពណ៌ខ្មៅមួយគ្រឿងបានជ្រុលចង្កូតទៅបុកចំដើមឈើមួយដើមហើយធ្លាក់ទៅក្នុងប្រឡាយអមសងខាងផ្លូវនៅក្នុងខេត្ត Chachengsao ភាគខាងកើតទីក្រុងបាងកក ហើយក្រោយមករថយន្តនោះបានផ្ទុះឆេះ ដោយឆក់យកជីវិតមនុស្សចំនួន០៣នាក់នៅហ្នឹងកន្លែងកើតហេតុតែម្តង ខណៈអ្នកដំណើរពីរនាក់ផ្សេងទៀតដែលបានទទួលរងរបួសធ្ងន់ធ្ងរបានដាច់ខ្យល់ស្លាប់នៅឯមន្ទីរពេទ្យ។
គួរបញ្ជាក់ថា នាពេលនេះមូលហេតុដែលបានបង្កជាហេតុការណ៍ដ៏អាក្រក់មួយនេះកំពុងស្ថិតក្រោមការស៊ើបអង្កេត ហើយជាបឋមមន្រ្តីប៉ូលិសថៃបានសន្និដ្ឋានថាអ្នកបើកបរបានងងុយដេក និងលង់លក់មួយភាំងទើបបង្កគ្រោះថ្នាក់កើតឡើង។ ដោយឡែកចំនួនមនុស្សស្លាប់ដោយសារគ្រោះថ្នាក់ចរាចរណ៍ក្នុងប្រទេសថៃនៅអំឡុងឱកាសចូលឆ្នាំថ្មីនេះ បើគិតចាប់ពីថ្ងៃទី២៩ ខែធ្នូ ឆ្នាំ២០១៦ បានកើនឡើងដល់ទៅជាង ៣៧០នាក់ហើយ៕
