(ហ្សាការតា)៖ សាឡង់ដឹកដំណើរ ១០០នាក់នៅឥណ្ឌូណេស៊ីក្នុងថ្ងៃទី១ នៃឆ្នាំ២០១៧នេះ បានបណ្តាលឲ្យមនុស្ស ១០នាក់ស្លាប់ និង៩០នាក់ផ្សេងទៀតត្រូវបានជួយសង្គ្រោះទាន់ពេល ប៉ុន្តែពួកគេមួយចំនួនបានទទួលរងរបួស។ នេះបើតាមទីភ្នាក់ងារព័ត៌មានចិនស៊ិនហួរ នៅមុននេះបន្តិចនារសៀលថ្ងៃអាទិត្យ ទី០១ ខែធ្នូ ឆ្នាំ២០១៦។
លោក Doni Pratama សមាជិកក្រុមសង្គ្រោះឥណ្ឌូណេស៊ីខាងលើនេះ បានប្រាប់ស៊ិនហួរ យ៉ាងដូច្នេះថា «យើងបានស្រង់ និងវេចខ្ចប់សាកសពចំនួន ១០នាក់រួចរាល់ហើយ ដើម្បីយកទៅមន្ទីរតម្កល់សាកសពរង់ចាំសាច់ញាតិមកយក ខណៈក្រុមសង្គ្រោះកំពុងព្យាយាមសង្គ្រោះអ្នករងរបួសរាប់សិបនាក់ផ្សេងទៀត»។
គួរបញ្ជាក់ថាសាឡង់ខាងលើនេះ ដឹកអ្នកដំណើរសរុប ១០០នាក់ ជារបស់ក្រុមហ៊ុន Zahro Express បានគ្រោងធ្វើដំណើរពីកំពុងផែ Muara Angke ឆ្ពោះទៅកោះ Tidung ប៉ុន្តែពេលមកដល់ឈូងសមុទ្រនៃទីក្រុងហ្សាការតា ភាគកណ្តាលប្រទេសឥណ្ឌូណេស៊ី វាក៏បានឆាបឆេះដល់ថ្នាក់លិចតែម្តង នៅព្រឹកថ្ងៃអាទិត្យ ទី០១ ខែមករានេះ៕
