(បាងកក)៖ រឿងក្តីប្រឆាំងនឹងអតីតនាយករដ្ឋមន្រ្តីថៃលោកស្រី យីងឡាក់ ស៊ីណាវ៉ាត់ ដែលជាមេដឹកនាំ​ស្រ្តីដំបូងគេនៅក្នុងប្រទេសថៃជុំវិញកម្មវិធីទិញស្រូវ​បរាជ័យ​ដែលបានចាប់ផ្តើម​តាមនីតិវិធីតាំង​ពីឆ្នាំ​២០១៥ មកនោះនឹងត្រូវបិទបញ្ចប់​នៅចុងខែកក្កដា ឆ្នាំ២០១៧។ នេះបើតាមការចេញផ្សាយដោយទីភ្នាក់ងារ ព័ត៌មាន Reuters នៅមុននេះបន្តិចនារសៀលថ្ងៃសុក្រ ទី០៩ ខែធ្នូ ឆ្នាំ២០១៦។

លោក យីងឡាក់ បានជាប់ចោទពីបទធ្វេសប្រហែសពាក់ព័ន្ធ នឹងគំរោងនៃការទិញស្រូវអង្ករ​ដែលបានជួយ​លោកស្រីឈានទៅចាប់យកតំណែងជានាយករដ្ឋមន្រ្តីថៃ នៅក្នុងការបោះឆ្នោតជាតិ កាលពីឆ្នាំ​២០១១ ដែលគំរោងនេះត្រូវបានរៀបចំឡើងក្នុងគោលបំណង បង្កើនប្រាក់ចំណូលរបស់ប្រជាកសិករថៃ ហើយពី​ដំបូងវាបាន​ទទួល​ប្រិយភាពខ្ពស់ពីសំណាក់អ្នករស់នៅតាមទីជនបទ ប៉ុន្តែក្រោយមក​ក៏ទទួលបរាជ័យវិញ។

ជុំវិញបញ្ហានេះក្រសួងហិរញ្ញវត្ថុ​ថៃបានព្យាករណ៍ថា គំរោងទិញ​ស្រូវនេះបានបណ្តាលឲ្យ​ខាតបង់ថវិកាជាតិ អស់ដល់ទៅប្រមាណ ១៥.០២ពាន់លានដុល្លារអាមេរិក។ លោក Sommai Koosap មេធាវីការពារក្តី​របស់​លោកស្រី យីងឡាក់ ស៊ីណាវ៉ាត់ បានថ្លែងប្រាប់អ្នកសារព័ត៌មាន Reuters ថា «ពួកយើងយល់ថាតុលាការ​ក្រុង​បាងកក នឹងប្រកាសសាលក្រមក្នុងរឿងក្តីទិញស្រូវនេះ​នាឆ្នាំក្រោយ បន្ទាប់ពីបានធ្វើការសាកសួរទៅលើ សាក្សីចុងក្រោយនៅពាក់កណ្តាលខែកក្កដា»

ដោយឡែកនៅពេលដែលឡើងតុលាការ​ជាលើកដំបូងកាលពី​ឆ្នាំ២០១៥ លោកស្រី យីងឡាក់ បានបដិសេធ​ថា​លោកស្រីមិនបានប្រព្រឹត្តខុសអ្វីទាំងអស់ ប៉ុន្តែលោកស្រីកំពុងប្រឈម​នឹងការជាប់​ពន្ធនាគារ​រហូត​ដល់​១០ឆ្នាំប្រសិនបើត្រូវបានរកឃើញថា ពិតជាមានទោសប្រាកដមែននោះ ហើយនាពេលថ្មីៗនេះលោកស្រី​អតីតនាយករដ្ឋមន្រ្តីថៃបានអះអាងយ៉ាងអង់អាចថា នឹងធ្វើការតស៊ូឲ្យ​ដល់ទីបញ្ចប់ និងមិនរាថយឡើយ។

គួរបញ្ជាក់ថាប្រទេសថៃធ្លាប់ជាប់ឈ្មោះ ជាអ្នកនាំចេញស្រូវអង្ករលេខមួយ​លើពិភពលោក ប៉ុន្តែវាបានរបូតទៅ​ឲ្យប្រទេសឥណ្ឌាវិញ នៅក្រោយការបរាជ័យនៃគំរោងទិញស្រូវរបស់លោកស្រី យីងឡាក់ ដែល​បានធានាថា​ប្រជាកសិករថៃគ្រប់រូបត្រូវបានទ្រទ្រង់ ដោយធនឧបត្ថម្ភ ខណៈរដ្ឋាភិបាលថៃនឹងទិញស្រូវអង្ករពីពួកគេ​ក្នុងតម្លៃទ្វេដងលើអត្រានៃតម្លៃស្រូវក្នុងទីផ្សារ។ ការរលាយសាប​សូន្យទៅនៃ​គំរោងនេះ បានបន្សល់ទុក​នូវស្រូវក៏ដូចជាអង្ករប្រមាណ ៨លានតោនគរចោលដូចភ្នំ​ដែលរដ្ឋាភិបាលយោធាថៃ កំពុងព្យាយាមដោះស្រាយ៕

_