(វ៉ាស៊ីនតោន)៖ ប្រធានាធិបតីអាមេរិកលោក បារ៉ាក់ អូបាម៉ា បានអញ្ជើញទៅដល់រដ្ឋធានីលីម៉ា នៃប្រទេសប៉េរូហើយដើម្បីចូលរួមកិច្ចប្រជុំ ស្តីពីសហប្រតិបត្តិការសេដ្ឋកិច្ចតំបន់ អាស៊ី-ប៉ាស៊ីហ្វិក ឬហៅកាត់ថា APEC ដែលជាកិច្ចប្រជុំលំដាប់អន្តរជាតិចុងក្រោយបង្អស់របស់លោកប្រធានាធិបតី។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅមុននេះបន្តិចនារសៀលថ្ងៃសៅរ៍ ទី១៩ ខែវិច្ឆិកា ឆ្នាំ២០១៦។
គួរបញ្ជាក់ថា នៅមុនពេលចាកចេញពីសេតវិមាននៅខែមករាឆ្នាំក្រោយ លោក បារ៉ាក់ អូបាម៉ា ត្រូវបានគេរំពឹងថា លោកនឹងឆ្លៀតឱកាសបើកកិច្ចពិភាក្សាទ្វេភាគីជាមួយមេដឹកនាំបណ្តាប្រទេសមួយចំនួន នៅក្នុងទីក្រុងលីម៉ា ខណៈប្រធានាធិបតីអាមេរិកដែលជិតផុតអាណត្តិរូបនេះ ទំនងជានឹងជួបសន្ទនាក្រៅផ្លូវការជាមួយប្រធានាធិបតីនៃប្រទេសរុស្ស៊ី លោក វ៉្លាឌីមៀ ពូទីន នៅក្នុងសប្តាហ៍នេះ ប៉ុន្តែគេមិនទាន់ដឹងនឹងពិភាក្សារឿងអ្វីនោះឡើយ។
សម្រាប់បញ្ហាធំៗដែលរដ្ឋបាលលោក អូបាម៉ា បន្សល់ទុកសម្រាប់ប្រធានាធិបតីអាមេរិកថ្មី ដែលទើបជាប់ឆ្នោតគឺលោក ដូណាល់ ត្រាំ នោះមានដូចជា វិបត្តិសង្គ្រាមនៅស៊ីរី, វិបត្តិជនភៀសខ្លួនទាំងក្នុង និងក្រៅប្រទេស, វិបត្តិនៅភាគខាងកើតអ៊ុយក្រែន, និង ទំនាក់ទំនងប្រេះស្រាំរបស់អាមេរិកជាមួយនឹងបណ្តាប្រទេសមួយចំនួននៅលើសកលលោក៕
